واشنگٹن (این این آئی )کافی اپنی منفرد رنگت، خوشبو اور انسان کے حواس کو بیدار کرنے کی صلاحیت کے باعث اپنی مختلف اقسام اور تیاری کے طریقوں کے ساتھ بہت سے لوگوں کی صبح کا مستقل حصہ ہے۔ تاہم کافی کا ایک پیالہ عمر بڑھنے کے ساتھ دماغی صحت سے بھی منسلک ہو سکتا ہے کیونکہ ایک طویل مدتی تحقیق سے معلوم ہوا ہے کہ کیفین والی کافی کا استعمال ڈیمینشیا کے خطرے میں کمی اور ادراکی صلاحیتوں میں بہتری سے منسلک ہے۔عرب ٹی وی کے مطابق یہ تحقیق 43 سال تک کے عرصے پر محیط امریکی بالغ افراد کے مشاہدے پر مبنی تھی جس سے ظاہر ہوا کہ کیفین والی کافی پینے کے عادی افراد میں ڈیمینشیا کی شرح کم تھی۔ دوسری طرف کبھی کبھی پینے والوں یا بالکل نہ پینے والوں میں یہ شرح زیادہ تھی۔ تحقیق میں دیکھا گیا چائے پینا بھی بہتر ادراکی نتائج سے منسلک رہا اور سب سے مضبوط تعلق روزانہ ایک سے دو کپ چائے پینے پر دیکھا گیا۔
