پیرس :پاکستان ریلوے کے تاریخی ورثے کی فوٹوگرافی نمائش،پاکستانی سفیر کی شرکت

پیرس (بیورو رپورٹ) فرانس میں پاکستان کی سفیر ممتاز زہرا بلوچ نے پیرس کی معروف گیلری منسکی میں معروف فوٹوگرافر پیٹرو پیٹروماچی کی اسٹیم پاور کے عنوان سے منعقدہ فوٹوگرافی نمائش میں شرکت کی جس میں پاکستان ریلوے کے تاریخی ورثے، بھاپ سے چلنے والے قدیم انجنوں اور ان سے وابستہ انسانی زندگیوں کو فنکارانہ انداز میں اجاگر کیا گیا ہے۔ نمائش میں پیش کی گئی بلیک اینڈ وائٹ تصاویر2021 کے دوران پاکستان کے صوبہ پنجاب میں بنائی گئیں۔ ان تصاویر میں فوٹوگرافر نے بھاپ سے چلنے والے دیوہیکل فولادی انجنوں، ان کی صنعتی اہمیت اور ریلوے کے ایک تاریخی دور کی یادوں کو اپنے کیمرے میں محفوظ کیا ہے۔ تصاویر میں صرف قدیم انجنوں اور ریلوے نظام کی تکنیکی و تاریخی اہمیت ہی کو موضوع نہیں بنایا گیا بلکہ اس ورثے سے وابستہ انسانی کہانیوں کو بھی نمایاں جگہ دی گئی ہے۔ فوٹوگرافر نے اپنے فن کے ذریعے ریلوے ملازمین کی محنت، ان کی روزمرہ زندگی اور ان لوگوں کے تجربات کو بھی عکس بند کیا ہے جو بھاپ سے چلنے والی ٹرینوں کے دور سے وابستہ رہے۔ یوں یہ تصاویر پاکستان کے ریلوے ماضی کی محض دستاویزی جھلک نہیں بلکہ ایک ایسے عہد کی یادوں، روایات اور انسانی رشتوں کی عکاسی بھی کرتی ہیں جو وقت گزرنے کے ساتھ تاریخ کا حصہ بنتا جارہا ہے۔ فوٹو گرافر پیٹرو پیٹروماچی نے پاکستانی سفیر ممتاز زہرا بلوچ کو نمائش میں رکھی گئی تصاویر کے بارے میں بتایا۔ انہوں نے پاکستان کو ایک خوبصورت ملک قرار دیتے ہوئے کہا کہ یہاں کا ثقافتی اور تاریخی ورثہ نہایت مالا مال ہے۔ انہوں نے پاکستان کے تاریخی مقامات، ثقافتی تنوع بالخصوص ریلوے کے ورثے میں اپنی دلچسپی کا اظہار کرتے ہوئے کہا کہ وہ پاکستان کا دوبارہ دورہ کرنا چاہتے ہیں تاکہ ملک کے ریلوے شعبے میں ہونے والی پیش رفت اور ترقی کا خود مشاہدہ کر سکیں۔ اسٹیم پاور کے عنوان سے منعقدہ یہ نمائش پاکستان کے تاریخی ریلوے ورثے کو بین الاقوامی سطح پر متعارف کرانے کے ساتھ ساتھ فوٹوگرافی کے ذریعے ملک کی ثقافتی اور صنعتی تاریخ کے مختلف پہلوئوں کو اجاگر کرنے کا ذریعہ بھی ہے۔