جنگی طیارے میں پرواز, .وزیراعظم نے تاریخ رقم کردی

سرگودھا(آن لائن،اے این این) وزیراعظم شاہد خاقان عباسی نے کہا ہے کہ پاک فضائیہ دہشت گردی کے ناسور کے خاتمے میں بھی اہم کردار ادا کررہی ہے۔وزیراعظم شاہد خاقان عباسی نے مصحف بیس سرگودھا کا دورہ کیا جہاں انہیں پاک فضائیہ کی آپریشنل تیاریوں پر بریفنگ دی گئی۔وزیراعظم کو قدرتی آفات سے نمٹنے اورامدادی کاموں پر پاک فضائیہ کی خدمات، تعلیم اور صحت کے شعبوں میں بھی پاک فضائیہ کی خدمات پر بھی بریفنگ دی گئی۔اس موقع پر وزیراعظم نے پاکستان ایئرفورس کے وطن کے دفاع کے لیے بہترین کردار کو سراہتے ہوئے کہا کہ فضائی حدود کے تحفظ میں پاک فضائیہ کا کردارقابل تعریف ہے اور پاک فضائیہ دہشت گردی کے ناسور کے خاتمے کے لیے بھی اہم کردار ادا کررہی ہے۔وزیراعظم نے کہا کہ دہشت گردی کیخلاف پاک فوج نے بے پناہ قربانیاں دیں جن کو دنیا قدر کی نگاہ سے دیکھتی ہے اور ہم ملکر اس جنگ کو منطقی انجام تک پہنچائیں گے ۔ انہوں نے کہاکہ پاکستان نے دہشت گردی کیخلاف بڑی کامیابیاں بھی حاصل کی ہیں اور پاک افواج ،خفیہ اداروں،پولیس سمیت تمام سکیورٹی اداروں اور سیاسی قیادت نے اس جنگ کو جیتنے کا عزم کررکھا ہے اس جنگ میں ہمیں عوام کا بھی بے پناہ تعاون حاصل ہے اور انشاءاللہ ہم یہ جنگ ضرور جیتیں گے ۔وزیراعظم شاہد خاقان عباسی نے تاریخ میں پہلی بار بحیثیت وزیراعظم پاکستان ایف سولہ طیارے میں بیٹھ کر جنگی مشقوں میں شرکت کی۔ترجمان پاک فضائیہ کی جانب سے جاری ہونے والے بیان کے مطابق وزیراعظم شاہد خاقان عباسی نے پاک فضائیہ کے آپریشنل بیس کا دورہ کیا، اس موقع پر ائیرچیف مارشل سہیل امان نے وزیراعظم کا استقبال کیا۔ وزیراعظم نے نئے تعمیر شدہ ائیرپاور سینٹر آف ایکسی لینس کادورہ کیا۔ترجمان کے مطابق وزیراعظم شاہد خاقان عباسی کو قومی تعمیر وترقی میں پاک فضائیہ کے کردار، سیفرون بینڈڈ نامی فوجی مشقوں اور ائیرپاور سینٹر آف ایکسی لینس کے حوالے سے بریفنگ دی گئی۔ ترجمان نے بتایا کہ ائیرپاور سینٹر جدید ترین آلات سے لیس ادارہ ہے اور ایوی ایشن سٹی پرجیکٹ کامرہ میں ایک جدید سوچ کے ساتھ تعمیر کیا گیا ہے۔ شاہد خاقان عباسی کو بتایا گیا کہ رواں برس اکتوبر میں پاک فضائیہ کثیرالملکی فوجی مشقوں کی میزبانی بھی کرے گا جس میں 19 ممالک کے فضائی دستے شرکت کریں گے۔ترجمان پاک فضائیہ کے مطابق وزیراعظم شاہد خاقان عباسی نے ایف 16 جنگی طیارے میں فائٹرپائلٹ کی پچھلی نشست رئیرکاک پٹ میں بیٹھ کر فوجی مشقوں کا جائزہ لیا اور وہ تاریخ کے پہلے وزیراعظم بن گئے ہیں جنہوں نے جہاز میں بیٹھ کر فوجی مشق میں شرکت کی، جب کہ دوسرے ایف 16 جہاز میں پاک فضائیہ کے سربراہ سہیل امان نے فوجی مشق میں شرکت کی۔اس موقع پر وزیراعظم نے ائیرفورس کے کمبیٹ افسران اور گرانڈ کریو کے ساتھ ملاقات کی جب کہ پاک فضائیہ کو جدید خطوط پر استوار کرنے اور عزم حوصلے کو سراہتے ہوئے اظہار اطمنان کیا۔