لاہور(ویب ڈسک)وزیراعلیٰ پنجاب شہبازشریف آج اتوار کی صبح لندن روانہ ہوگئے جس کے بعد دوپہر کو وزیراعظم شاہد خاقان عباسی بھی پی آئی اے کی پرواز 785 سے لندن چلے گئے۔ وزیراعلیٰ پنجاب شہبازشریف لندن جاتے ہوئے قطر میں ٹہریں گے اور اہم ملاقاتیں بھی کریں گے۔ شہباز شریف لندن میں نواز شریف سے ملاقات اور علیل بھابی بیگم کلثوم نواز کی عیادت کریں گے۔ادھر وزیر خارجہ خواجہ آصف بھی خصوصی پرواز کے ذریعے سعودی عرب پہنچ گئے ہیں جہاں وہ نواز شریف سے ملاقات کریں گے جب کہ کل تک کابینہ کے دیگر وزرا کے بھی لندن پہنچنے کا امکان ہے۔ اہم امور پر مشاورت کے بعد مسلم لیگ (ن) کے صدر اور سابق وزیراعظم نوازشریف جدہ سے لندن روانہ ہوجائیں گے۔نوازشریف اپنے قریبی ساتھیوں سے مشاورت کے بعد پاکستان آئیں گے اور ممکنہ طور پر آئندہ سماعت پر احتساب عدالت میں پیش ہوسکتے ہیں۔واضح رہے کہ نواز شریف نے 23 اکتوبر کو لندن سے پاکستان آنا تھا تاہم ان کی واپسی کا شیڈول تین بار تبدیل ہوا اور وہ سعودی عرب چلے گئے جہاں انہوں نے عمرہ کرنے کے ساتھ ساتھ والدہ سے بھی ملاقات کی۔ نیب ریفرنس کی گزشتہ سماعت میں نواز شریف پیش نہیں ہوئے جس پر عدالت نے ان کے وارنٹ گرفتاری جاری کردیے تھے۔
