خطرات سے آگاہ، دنیا کی کوئی طاقت پاک وطن کو ختم نہیں کر سکتی، سپہ سالار کا دبنگ خطاب

راولپنڈی (بیورورپورٹ)آرمی چیف جنرل قمر جاوید باجوہ کہتے ہیں کہ دنیا کی کوئی طاقت پاکستان کوختم نہیں کرسکتی، ملک کودرپیش خطرات سے آ گاہ ہیں، خطرات سے نمٹنے کیلئے پیشہ ورانہ تیاری ضروری ہے، قوم اورتمام ریاستی ادارے ملکی مفادکیلئے مل کرکام کریں۔پاک فوج کے شعبہ تعلقات عامہ (آئی ایس پی آر )کے مطابق آرمی چیف جنرل قمر جاوید باجوہ کامنگلا کورمیں جاری ٹریننگ کے معائنے کے دوران افسروں اور جوانوں سے خطاب میں کہنا تھا کہ ہم چیلنجزکاسامناکرتے ہوئے بہت آگے تک آچکے ہیں، انشا اللہ پاکستان کاابھرنا یقینی ہے، پوری قوم کومتحد اورپرعزم ہوناچاہیئے۔منگلا کور آمدپر آرمی چیف کااستقبال کورکمانڈرلیفٹیننٹ جنرل اظہرصالح نے کیا ،جبکہ اس موقع پر آئی جی ٹریننگ اینڈایولیویشن لیفٹیننٹ جنرل ہدایت الرحمان بھی موجودتھے۔آرمی چیف جنرل قمر جاوید باجوہ نے ا فسروں اور جوانوں کے عزم اورپیشہ ورانہ صلاحیتوں کوسراہا۔آرمی چیف نے اپنے خطاب میں قائداعظم کے قول”دنیاکی کوئی طاقت پاکستان کو ختم نہیں کرسکتی “کو دہرایا، جنرل قمر جاوید باجوہ نے کہا ہے کہ داخلی سلامتی اور مغربی سرحد پر فرائض کے باوجود روایتی خطرے کو نظر انداز نہیں کرسکتے ،خطرات کے پیش نظر اعلیٰ تربیتی معیار اور آپریشنل تیاریاں ناگزیر ہیں،ملک کے بہترین مفاد کےلئے قوم اور تمام ملکی اداروں کو مربوط انداز میں کام کرنا ہوگا ، قومی ترقی کےلئے صرف اور صرف عزم صمیم اور اتحاد ضروری ہے۔ملک کے بہترین مفاد کےلئے قوم اور تمام ملکی اداروں کو مربوط انداز میں کام کرنا ہوگا ، طویل سفر کے بعد چیلنجز پر قابو پا چکے ہیں ۔انہوں نے کہاکہ انشاءاللہ پاکستان جلد اقوام عالم کی صف اول میں شامل ہوگا ، قومی ترقی کےلئے صرف اور صرف عزم صمیم اور اتحاد ضروری ہے ۔