واشنگٹن(ویب ڈیسک) عالمی ذرائع کے مطابق ایسی خبریں زور پکڑ رہی ہیں کہ عظیم باکسر محمد علی کو قتل کیا گیا ہے۔70کی دہائی میں ان کے جسم میں انجکشن کے زریعے ایسی دوا داخل کی گئی جس سے رعشے کا سبب پیدا ہوا۔ذرائع کے مطابق اس کا مقصد امریکی حکومت کی جانب سے اپنے خطرناک نافذ کی جسمانی طاقت سلب کرنا تھا۔رپورٹ کے مطابق اکثر باکسرز کو کیرئیر کے دوران محمد علی سے کہیں زیادہ ضربیں لگیں لیکن ان میں سے کسی کو بھی یہ بیماری لاحق نہیں ہوئی۔اگر رپورٹس میں ثابت ہوگیا کہ محمد علی کے جسم میں ”ایم پی ٹی پی“ داخل کی گئی تو پھر امریکی حکومت مجرم قرار پائیگی

لندن (خصوصی رپورٹ)بھارت میں پولیس کا کہنا ہے کہ انھوں نے گذشتہ ہفتے ایک کبوتر گرفتار کیا جو پاکستان سے پیغام لے جا رہا تھا۔ بھارتی مصنف شوون چودھری نے اسے ایک طنز نگار کی نگاہ سے دیکھتے ہوئے لکھا میں کہوں گا کبوتر کے معاملے میں ساری غلطی موبائل سروس فراہم کرنے والوں کی ہے۔ وہ زیادہ خدمات فراہم نہیں کر رہے ہیں۔ دہلی میں ہمارے گھر تو صورت حال یہ ہے ہم صرف اسی وقت بات کرسکتے ہیں جب ہم کسی خاص کمرے کی کھڑکی سے ہاتھ باہر نکال کر فون پکڑے کھڑے رہیں۔ اس سے پتہ چلتا ہے آخر کیوں چند پاکستانی محبانِ وطن نے بھارت کے وزیراعظم مودی کے نام پیغام کبوتر کے گلے میں ڈال کر سرحد پار روانہ کر دیا۔ اس کی وجہ ضرور یہ رہی ہوگی ان کا فون نہیں کام کر رہا۔ انھوں نے دہشت گرد کبوتروں کو تعینات کر دیا۔ یہ بات قابل غور ہے وہ ایک نہیں بلکہ دو کبوتر تھے جس کا مطلب یہ ہوا کہ وہ ہم پر پے در پے حملہ کر رہے ہیں اور وہ دور تک اندر چلے آئے۔ دونوں حملے پنجاب کے دارالحکومت امرتسر سے بہت قریب تھے جہاں مرد مرد ہے اور گھی مکھن بہتے ہیں۔ درانداز کبوتر کو پنجاب پولیس نے روکا اور پولیس ڈائری میں اس کا اندراج ‘مشتبہ جاسوس’ کے طور پر کیا گیا۔ اور اسے فی الحال ایک ایئر کنڈیشنڈ کمرے میں پولیس کی سخت نگرانی میں رکھا گیا ہے۔ پٹھان کوٹ کے پولیس افسر راکیش کمار نے خبررساں ادارے اے ایف پی کو بتایا پولیس اس معاملے کی سنجیدگی سے جانچ کر رہی ہے۔ ہم نے یہاں چند جاسوس پکڑ رکھے ہیں۔ یہ حساس علاقہ ہے کیونکہ یہ جموں سے قریب ہے اور جہاں دراندازی بہت عام ہے۔ قسمت کی خوبی دیکھیے کہ بھارت میں پولیس کو جنگلی جانوروں کا بھی بہت تجربہ ہے کیونکہ اترپردیش میں ایک معروف سیاست داں کی بھینس جب اغوا ہو گئی تو 100 سے زیادہ پولیس اہلکاروں اور دو اعلی افسران کو تفتیش پر تعینات کیا گیا حالانکہ ان کی شناخت کے بارے میں بعض سوالات اٹھے تھے تاہم انھوں نے ایک ہفتے میں بھینس بازیاب کرا لی۔ اس امکان سے انکار نہیں کیا جا سکتا کہ بھینس بدل گئی ہو گی لیکن کیس کو بند کر دیا گیا۔ اس طرح ہم امید کر سکتے ہیں وہ کامیابی کے ساتھ جہادی کبوتروں کے خطرے سے نمٹ لیں گے۔ فی الحال انھوں نے کوئی دقیقہ نہیں اٹھا رکھا ہے۔ اطلاعات کے مطابق وہ مختلف قسم کے سوالات پر غور کر رہے ہیں۔ جیسے: کبوتر مسلمان ہے یا پھر ہندو؟ کیا اس میں کسی طور گائے کے گوشت کا تو معاملہ شامل نہیں؟ اگر کبوتر کو ضمانت پر رہائی مل جاتی ہے تو کیا وہ گواہوں کو متاثر کرنے کی کوشش تو نہیں کرے گا؟ کیا اسے انڈیا کے کبوتر سے کسی قسم کی مدد ملی ہے؟ کیا ہمیں فضائیہ کا استعمال کرنا چاہیے؟ یہ جتنا کھانا کھا رہا ہے اس کا بل کون ادا کرے گا؟ ہم اپنی سکیورٹی فورسز کی عزت کرتے رہیں گے نہیں تو وہ ہمیں گولی مار سکتے ہیں لیکن کبوتر کے بارے میں بھی تو ذرا سوچیں۔ یہ معصوم کبوتر جو کبھی امن کے علمبردار ہوتے تھے اب جہادی ان کی بھی برین واشنگ کی جا رہی ہے۔

واشنگٹن (خصوصی رپورٹ) امریکہ کے صدارتی امیدوار ڈونلڈ ٹرمپ اپنی رنگین مزاج شخصیت اور بے تکے بیانات و حرکات کے باعث مزید متنازعہ بن گئے ہیں۔ اخلاقیات کی حد سے گری ہوئی ویڈیو کے بعد ٹرمپ کی آڈیو ٹیپ بھی سامنے آ گئی ہے جس کے بعد ان کی اپنی جماعت ری پبلکن پارٹی کی جانب سے بھی ان سے دستبردار ہونے کا مطالبہ کیا جانے لگا ہے‘ تاہم ٹرمپ کی جانب سے دستبردار ہونے سے صاف انکار کے بعد عالمی خفیہ تنظیم ”ورلڈ ایڈہاک ایسوسی ایشن“ انہیں صدارتی دوڑ سے دستبردار کرانے کیلئے میدان میں آ گئی ہے۔ اس تنظیم میں ماہر جادوگر بھی شامل ہیں جو جادو ٹونے کے ذریعے ٹرمپ کے دماغ کو قابو کر کے انہیں خود دستبردار ہونے پر مجبور کرنا چاہتی ہے۔ ایسوسی ایشن نے دنیا بھر کے ماہر جادوگروں اور جادوگرنیوں سے بھی اپیل کی ہے کہ وہ اس کارخیر میں اس کا ساتھ دیں۔ برطانوی اخبار ڈیلی سٹار کے مطابق اگرچہ امریکی عوام اور سیاستدانوں کا سنجیدہ طبقہ ڈونلڈ ٹرمپ کو کسی صورت ملک کا صدر دیکھنا نہیں چاہتا‘ لیکن اب ٹرمپ کے پے در پے سامنے آنے والے سکینڈلز کے بعد ان کی اپنی جماعت کے بیشتر رہنما بھی چاہتے ہیں کہ ٹرمپ صدارتی انتخابات سے خود دستبردار ہو جائیں۔ رپورٹ کے مطابق گزشتہ دنوں ڈونلڈ ٹرمپ کی ویڈیو کے بعد آڈیو ٹیپ بھی سامنے آ گئی ہے‘ جس میں وہ فحش گوئی کی تمام حدوں کو پار کر گئے ہیں۔ ٹرمپ کی بے ہودہ باتیں سن کر ری پبلکن سنیٹرز اور اراکین کانگریس نے کانوں کو ہاتھ لگا لئے ہیں۔ ٹرمپ کی اب تک حمایت کرنے والے کئی سنیٹروں نے ان کی توثیق بھی واپس لے لی ہے۔ نائب صدارتی امیدوار مائیک پنس کو کہنا پڑا کہ وہ ٹرمپ کے بیان کا دفاع نہیں کر سکتے۔ ری پبلکن پارٹی کے کئی سینئر رہنماﺅں نے ٹرمپ سے مستعفی ہونے اور جارج پنس ہی سے ان کی جگہ لینے کا مطالبہ کر دیا ہے۔ سنیٹر مارک کرک کہتے ہیں کہ ”ہمیں ہنگامی متبادل کی ضرورت ہے۔“ سنیٹر مائیک لی کا کہنا ہے کہ ٹرمپ ہٹ جائیں‘ کسی اور کو اصولوں کی پاسداری کا موقع دیں۔ مک موریس سمیت ری پبلکن پارٹی کے متعدد رہنماﺅں نے تسلیم کیا ہے کہ ٹرمپ جیسے امیدوار کے ذریعے وائٹ ہاﺅس تک پہنچنے کا خواب شرمندہ¿ تعبیر نہیں ہو سکتا۔ ٹرمپ نے اگرچہ معافی مانگ لی ہے لیکن ان کی فحش گوئی کے بعد مخالف پارٹی سمیت سبکدوش ہونے والے صدارتی امیدواروں کو بھی ری پبلکن پارٹی پر تنقید کا نیا موقع ملا ہے اور وہ ٹرمپ کی معذرت قبول کرنے کو بھی تیار نہیں ہیں۔ واضح رہے کہ ان ویڈیو اور آڈیو ٹیپ میں ٹرمپ نے خواتین کے خلاف انتہائی نازیبا کلمات استعمال کئے ہیں‘ حتیٰ کہ انہوں نے اپنی بیوی اور بیٹی کو بھی نہیں بخشا۔ اسکائی نیوز نے متعدد امریکی سیاسی تجزیہ کاروں کے حوالے سے لکھا ہے کہ سیاہ فاموں‘ مسلمانوں‘ تارکین وطن اور تمام خواتین کی مخالفت کا سامنا کر کے ٹرمپ کیلئے انتخابات میں کامیاب ہونا ممکن نہیں ہے۔ بہتر یہی ہے کہ ری پبلکن پارٹی کسی اور کو اپنا امیدوار چن لے۔ امریکی اخبار نیویارک ٹائمز نے لکھا ہے کہ ری پبلکن پارٹی کے ان 1725مندوبین کو چاہئے جنہوں نے پارٹی اجتماع میں ٹرمپ کو بطور امیدوار منتخب کیا تھا کہ وہ دوبارہ پارٹی کا اجتماع بلا کر کسی ہوشمند شخص کو اپنا امیدوار منتخب کریں مگر سوال سب کے سامنے یہی ہے کہ ٹرمپ کو دستبردار ہونے کیلئے کیسے تیار کیا جائے؟ اس مسئلے کو حل کرنے کیلئے دنیا کی ایک پراسرار تنظیم میدان میں آ گئی ہے۔ ورلڈ ایڈہاک ایسوسی ایشن نامی اس تنظیم نے عزم ظاہر کیا ہے کہ وہ جادو اور ٹونے کی مدد سے ٹرمپ کو صدارتی انتخاب کی دوڑ سے از خود دستبردار ہونے پر مجبور کر دے گی۔ ایسوسی ایشن نے اعلان کیا ہے کہ ”اب ہم امریکی انتخابات کا فیصلہ جادو کے ذریعے کریں گے‘ دوسرے ناکام ہو گئے ہیں‘ مگر ہم جادو کے ذریعے ڈونلڈ ٹرمپ کو امریکہ کا صدر بننے سے روکنے میں کامیاب ہو جائیں گے۔“ اس مقصد کیلئے ایسوسی ایشن نے دنیا بھر کے جادوگروں اور جادوگرنیوں کو دعوت دی ہے کہ وہ اس مشن میں ان کا ساتھ دیں۔ اس پراسرار اور خفیہ طاقتوں سے کام کرانے والی تنظیم کے بارے میں کہا جاتا ہے کہ اس کے ارکان میں بھی بڑے ماہر جادوگروں کی کمی نہیں ہے۔ اسکاٹ لینڈ سے تعلق رکھنے والے اس ایسوسی ایشن کے ترجمان پیٹر گوور نے دی ٹیلیگراف سے گفتگو کرتے ہوئے بتایا کہ ہم ڈونلڈ ٹرمپ کو جسمانی اعتبار سے کوئی نقصان نہیں پہنچائیں گے۔ ہم جادو کے ذریعے اس کے ذہن میں یہ خیال ڈالیں گے کہ وہ الیکشن سے دستبردار ہو جائیں۔ یہی ایک خیال ہے جو اس انتہائی خطرناک آدمی کا دماغ قبول کرے گا اور ہم جہاں تک ممکن ہو سکے‘ اس بات کو یقینی بنائیں گے۔ ممکن ہے کہ اپنے دماغ میں یہ خیال ڈالے جانے کے بعد وہ اپنے کسی مباحثے میں خود ہی یہ اعلان کر دیں کہ ”میں الیکشن سے دستبردار ہو رہا ہوں۔“