اسلام آباد: (ویب ڈیسک) پولیس نے پارلیمنٹ ہاؤس جانے والے راستے سیل کردیے۔
پارلیمنٹ ہاؤس جانے والے راستے خاردارتاریں اوربیریئر لگا کر سیل کیے گئے ہیں، ڈی چوک اور نادرا چوک سے پارلیمنٹ کے انٹری پوائنٹ کو سیل کیا گیا ہے۔
حکام کاکہنا ہے کہ یہ اقدام جے یو آئی (ف) کے ممکنہ احتجاج کے باعث کیا گیا ہے۔
واضح رہےکہ گزشتہ روز پارلیمنٹ لاجز میں پولیس کے آپریشن اور گرفتاریوں کے بعد جے یو آئی نے ملک بھر میں احتجاج کا اعلان کیا تھا تاہم پولیس نے جے یو آئی کے رکن اسمبلی سمیت دیگر افراد کو ضمانت پر رہا کردیا۔

لاہور: (ویب ڈیسک) جہانگیر ترین گروپ کے ارکان نے حکومت پر انتقامی کارروائیوں کا الزام لگایا ہے۔
عون چوہدری کی رہائش گاہ پر ترین گروپ کا اجلاس ہوا جس کے بعد میڈیا سے گفتگو میں ترین گروپ کے ترجمان سعید اکبر نوانی نے الزام لگایا کہ حکومت انتقامی کارروائیوں کے ذریعے دبانا چاہتی ہے۔
انہوں نے کہا کہ صوبائی وزیر اجمل چیمہ کے پیٹرول پمپس اور ٹرانسپورٹ کو بند کرکے اگرکسی کا خیال ہے کہ اس طرح ہمیں دبایا جاسکتا ہے تو یہ غلط فہمی ہے۔اکبر نوانی کا کہنا تھا کہ ترین گروپ میں ابھی تک وزارت اعلیٰ کے کسی نام پر بحث نہیں ہوئی، علیم خان ہمارے گروپ کا حصہ ہیں جب کہ وزیر اعظم سے ملنے والے صمصام بخاری اور آصف نکئی کبھی بھی ترین گروپ کا حصہ نہیں رہے۔
ترجمان ترین گروپ نے واضح کیا کہ چوہدری پرویز الٰہی سے ملاقات بطور اسپیکر پنجاب اسمبلی ہوئی، وزارت اعلیٰ کے لیے جب کوئی نام سامنے آئے گا تو فیصلہ کریں گے کس کو مائنس کرنا ہے اور کس کو پلس کرنا ہے۔

لاہور: (ویب ڈیسک) پاکستان میں مچھروں سے پھیلنے والی نئی بیماری ویسٹ نائل بخار کے شواہد سامنے آنے لگے ہیں۔
طبی ماہرین نے پاکستان میں بڑی تعداد میں پرندوں کے مرنے پر تشویش کا اظہار کرتے ہوئے کہا ہے کہ پرندوں کا بغیر کسی وجہ کے بڑی تعداد میں مرنا ویسٹ نائل وائرس کی وجہ سے ہو سکتا ہے۔
ڈاکٹر فیصل محمود کا کہنا ہے کہ ویسٹ نائل وائرس ڈینگی اور ملیریا کی طرح مچھروں سے پھیلتا ہے، ویسٹ نائل وائرس پھیلانے والا مچھر کیولیکس بھی پاکستان میں موجود ہے۔
تاہم طبی ماہرین کا یہ بھی کہنا ہے کہ ویسٹ نائل وائرس کی پاکستان میں موجودگی سے پریشان ہونے کی ضرورت نہیں ہے۔
ڈاکٹر ارم خان کا کہنا ہے کہ 2016 میں تحقیق کے ذریعے ویسٹ نائل وائرس کی پاکستان میں موجودگی ثابت کر چکے ہیں، ویسٹ نائل وائرس پولیو کی طرز کی معذوری کا سبب بن سکتا ہے۔
ڈی جی ہیلتھ پاکستان ڈاکٹر رانا محمد صفدر کا کہنا ہے کہ ویسٹ نائل وائرس کی موجودگی کی غیر مصدقہ اطلاعات ہیں، قومی ادارہ برائے صحت کو ویسٹ نائل وائرس پر تحقیقات کے لیے کہہ دیا ہے۔

لاہور: (ویب ڈیسک) اسپیشل کورٹ سینٹرل نے شہباز شریف اور حمزہ شہباز کے خلاف منی لانڈرنگ ٹرائل روزانہ کی بنیاد پرکرنےکی درخواست مسترد کرنے کا تحریری فیصلہ جاری کردیا۔
اسپیشل جج سینٹرل اعجاز حسن اعوان نے 6 صفحات پر مشتمل تحریری فیصلہ جاری کیا جس میں کہا گیا ہےکہ ایف آئی اے نے مقدمے کا چالان ایک سال سے بھی زائد عرصے میں جمع کرایا ، فرد جرم میں تاخیر کے ذمہ دار شہباز شریف نہیں ہیں۔فیصلے میں کہا گیا ہےکہ کرمنل لاء ترمیمی ایکٹ 1958 میں کہیں نہیں لکھاکہ ٹرائل روزانہ کی بنیادپرکیا جائے، عدالت پوری کوشش کرےگی کہ شہباز شریف کیس کوترجیجی بنیادوں پر سنا جائے، ایف آئی اے نے دسمبر 2021 میں درج مقدمے کاچالان ایک سال سے زائدعرصے میں پیش کیا، چالان تاخیر سے پیش کرنےکا الزام ملزمان پرنہیں لگایا جاسکتا۔
فیصلے میں کہا گیا ہے کہ ایف آئی اے نے ابھی تک ملزمان کو 24 بینکرزکے بیانات کی کاپیاں فراہم نہیں کیں، چالان سے منسلک دستاویزات کی کاپیاں فراہم کرنےکےحکم پرپراسیکیوشن نے ابھی تک عمل نہیں کیا۔
فیصلے میں مزید کہا گیا ہےکہ ضابطہ فوجداری کی دفعہ 241 اے اور 265 سی پرعمل کیے بغیر فردجرم عائد نہیں ہوسکتی۔

لاہور : (ویب ڈیسک) نیب لاہور نے آمدن سے زائد اثاثہ جات بنانے کے الزام میں مسلم لیگ (ن) کے رکن قومی اسمبلی اظہر قیوم ناہرہ کو طلب کرلیا۔
نیب لاہور نے آمدن سے زائداثاثہ جات کے الزام میں گوجرانوالہ سے (ن) لیگ کے رکن قومی اسمبلی اظہر قیوم ناہرہ اور ان کے بھائی مدثر قیوم ناہرہ کو آج طلبی کا نوٹس جاری کیا ہے۔
ناہرہ برادران نے نیب کی جانب سے طلب کیے جانے پر ایک بیان میں کہا ہے کہ نیب ہمیں ان الزامات میں انکوائری کے بعد کلیئرنس جاری کرچکا ہے، ڈھائی سال بعد ہمیں دوبارہ طلب کرناسیاسی بلیک میلنگ ہے،کسی بلیک میلنگ میں آکرن لیگ کونہیں چھوڑیں گے۔

لاہور : (ویب ڈیسک) وزیراعظم کے معاون خصوصی ڈاکٹر شہباز گل کا کہنا ہے کہ عمران خان جہانگیر ترین کے ساتھ رابطے میں ہے۔
لاہور میں میڈیا سے گفتگو کرتے ہوئے شہباز گل کا کہنا تھا کہ عدم اعتماد کی تحریک کو ناکام بنانے کی حکمت عملی تیار کر لی ہے۔
ایک سوال کے جواب میں شہباز گل کا کہنا تھا کہ عمران خان جب تک چاہیں گےعثمان بزدار وزیراعلیٰ پنجاب رہیں گے، کچھ عالمی طاقتیں پاکستان کے نظام پر حملہ آور ہیں اور اپوزیشن ان کے اشارے پر چل رہی ہے۔چیئرمین پیپلز پارٹی بلاول بھٹو زرداری کی وزیراعظم پر تنقید کے حوالے سے شہباز گل نے کہا کہ بلاول کی خاتون اول پر الزام تراشی شرمناک ہے، بلاول گھریلو خواتین پر کیچڑ اچھالیں گے تو جواب بھی اُتنی شدت سے دیا جائے گا۔
شہباز گل کا کہنا تھا کہ عدم اعتماد کی تحریک سے فارغ ہو کر بلاول بھٹو زرداری کو سرکاری خرچ پر اُردو سیکھائیں گے۔

کراچی: (ویب ڈیسک) نیٹی جیٹی پل کے قریب ٹریلر کی موٹر سائیکل کو ٹکر کے نتیجے میں باپ اور دو بیٹے جاں بحق ہو گئے۔
پولیس کے مطابق حادثے میں جاں بحق ہونے والے تینوں افراد موٹر سائیکل پر سوار تھے جبکہ حادثے کے بعد ٹریلر ڈرائیور موقع سے فرار ہو گیا۔
پولیس کا کہنا ہے کہ جاں بحق تینوں افراد کی لاشیں اسپتال منتقل کی گئیں، جاں بحق افراد میں باپ اور دو بیٹے شامل ہیں۔
پولیس کا بتانا ہے کہ تینوں باپ بیٹےکیماڑی کے رہائشی تھے، آگرہ تاج میں محنت مزدوری کے بعد واپس گھر جا رہے تھےکہ حادثے کا شکار ہو گئے۔
پولیس کے مطابق متاثرہ موٹرسائیکل اور ٹریلر کو تھانے منتقل کر دیا گیا ہے اور حادثے کا مقدمہ درج کر کے تحقیقات کا آغاز کر دیا گیا ہے۔