اسلام آباد: (ویب ڈیسک) وزیراعظم شہباز شریف کے زیر صدارت نیشنل ایپکس کمیٹی کا اجلاس ہوا جس میں دہشت گردی کے خلاف زیرو ٹالرنس کے عزم کا اعادہ کیا گیا۔
اجلاس سے خطاب کرتے ہوئے وزیر اعظم شہباز شریف نے کہا کہ آپریشنل تیاری، پولیس کی استعداد میں اضافے پر فوری توجہ دینا ہوگی، دہشت گردی کا ناسور ختم کرنے کے لئے پوری ریاستی قوت اور اشتراک عمل کو بروئے کار لانا ہوگا۔
ذرائع کے مطابق اجلاس میں کراچی پولیس آفس پر دہشت گردوں کے حملے کی مذمت کی گئی، وزیر اعظم شہباز شریف نے کراچی دہشت گردی کے واقعہ کو ناکام بنانے پر سکیورٹی اداروں کی تعریف کی۔
اجلاس میں سکیورٹی اہلکاروں کے لئے فاتحہ خوانی کی گئی، اس موقع پر وزیر اعظم نے کہا کہ پولیس، رینجرز اور افواج پاکستان کے جوانوں کو شاباش دیتا ہوں۔
وزیر اعظم کا کہنا تھا کہ بہادر جوانوں نے کراچی میں دہشت گردوں کا بہادری سے مقابلہ کر کے ان کا قلع قمع کیا، اجلاس میں شرکا نے دہشت گردی کیخلاف زیرو ٹالرنس کے عزم کا اعادہ کیا۔

اسلام آباد: (ویب ڈیسک) وزارت مذہبی امور نے سرکاری حج سکیم کا 25 فیصد کوٹہ ڈالرز جمع کرانے والوں کے لئے مختص کرنے کا فیصلہ کر لیا۔ 22 ہزار 4 سو سے زائد عازمین ڈالرز جمع کرانے پر حج قرعہ اندازی کے بغیر حج کریں گے۔
ڈالر بحران حج پر بھی اثر انداز ہو گیا، ڈالرز لانے والوں کو خصوصی رعایت دینے کا فیصلہ کر لیا گیا، ڈالرز لاؤ حج قرعہ اندازی سے مستثنیٰ ہو جاؤ، مجوزہ حج پالیسی 2023ء کے اہم نکات سامنے آگئے۔
ذرائع وزارت مذہبی امور کے مطابق سرکاری سکیم کا 25 فیصد کوٹہ سپانسر شپ سکیم کے تحت ڈالر دینے والوں کیلئے مختص ہو گا، پاکستانی روپے میں حج اخراجات جمع کرانے والے افراد کو قرعہ اندازی میں شامل ہونا ہو گا۔
وزارت مذہبی امور کے مطابق حج اخراجات بیرون ملک سے بھیجے گئے ڈالرز سے جمع کرائے جاسکیں گے، وزارت خزانہ نے حج اخراجات کیلئے ڈالرز کے انتظام سے معذرت کر لی تھی، ڈالرز کی قلت کے سبب حکومت نے 40 کے بجائے 50 فیصد حج کوٹہ پرائیویٹ حج آپریٹرز کو دینے کا فیصلہ کیا۔
ذرائع کا کہنا ہے کہ ڈالرز کی قلت کے سبب سرکاری سکیم کا مزید حج کوٹہ پرائیویٹ آپریٹرز کو دیا جا سکتا ہے، سرکاری سکیم کے تحت فی کس حج اخراجات 12 سے 13 لاکھ روپے تک جا پہنچے۔

اسلام آباد: (ویب ڈیسک) وزیراعظم شہباز شریف سے آرمی چیف اور ڈی جی آئی ایس آئی نے ملاقات کی جس میں ملکی سیکیورٹی امور پر تبادلہ خیال کیا گیا۔
وزیراعظم شہباز شریف سے آرمی چیف جنرل عاصم منیر اور ڈی جی آئی ایس آئی نے وزیراعظم ہاؤس میں ملاقات کی۔ ملاقات میں ملک کی سیکیورٹی صورتحال پر تبادلہ خیال کیا گیا۔
وزیراعظم کی زیر صدارت اس وقت اپیکس کمیٹی کا اجلاس جاری ہے جس میں عسکری و سول قیادت موجود ہے۔ اس اجلاس سے قبل یہ ملاقات ہوئی۔
ملاقات میں دہشت گردی کے خلاف آپریشن کے بارے میں بات کی گئی۔

لاہور: (ویب ڈیسک) پی ٹی آئی رہنما فواد چوہدری نے کہا ہے کہ سپریم کورٹ میں انتخابات کیس کی سماعت شروع ہوگئی ہے اور مریم نواز اپنے بیانات کے ذریعے عدلیہ کو دباؤ میں لانے کی کوشش کررہی ہیں۔
لاہور میں میڈیا سے بات کرتے ہوئے فواد چوہدری نے کہا کہ انتخابات کے حوالے سے سپریم کورٹ میں سماعت چل رہی ہے لیکن پی ڈی ایم کی حکومت عدلیہ کے ساتھ محاذ آرائی کے لیے تیار ہوگئی ہے اور مریم نواز بیانات کے ذریعے عدلیہ کو دباؤ میں لانے کی کوشش کر رہی ہیں۔
فواد چوہدری نے کہا کہ دوسروں کو برابھلا کہہ کر یہ اپنی کارکردگی سے منہ چھپانا چاہتے ہیں، پہلے بھی مریم نواز اینڈ کمپنی نے عدلیہ کے خلاف محاذ کھولا تھا جب کہ ماضی میں بھی ن لیگ عدلیہ کے خلاف محاذ کھول چکی ہے۔
پی ٹی آئی رہنما نے کہا کہ جن ججوں نے قاسم سوری کی رولنگ کو کالعدم قرار دیا تو وہ بھی اس بینچ کا حصہ ہیں لیکن ڈپٹی اسپیکر کی رولنگ کالعدم قرار دینے کے خلاف پی ٹی آئی نے ججز کے خلاف کوئی محاذ نہیں کھولا۔
انہوں ںے کہا کہ مریم نواز کا خیال ہے کہ وہ عدلیہ کو دباؤ میں لے آئیں گی، پورے پاکستان کو اس وقت ایک بلیک میلر حکومت کا سامنا ہے، کچھ لوگوں کو آڈیو اور کچھ کو ویڈیوز کے ذریعے بلیک میل کیا جارہا ہے، آڈیو اور ویڈیو کے ذریعے بلیک میل کرنا بہت خطرناک ٹرینڈ ہے، اس سے پہلے ثاقب نثار کی آڈیو پر بھی پروپیگنڈا کیا گیا اور آڈیو پر ایک تماشا لگا دیا گیا، عدلیہ سے گزارش ہے کہ وہ کسی کے دباؤ میں نہ آئے۔