اسلام آباد : (ویب ڈیسک) وفاقی دارالحکومت میں زلزلے کے شدید جھٹکے محسوس کئے گئے ہیں۔
وفاقی دارالحکومت اسلام آباد اور اس کے گردو نواح میں زلزلے کے شدید جھٹکے محسوس کئے گئے، اور ریکٹر سکیل پر زلزلے کی شدت 6 اعشاریہ 2 ریکارڈ کی گئی۔
زلزلہ پیما مرکز کے مطابق زلزلے کا مرکز تاجکستان کا بارڈر تھا اور اس کی زیر زمین گہرائی 60 کلومیٹر تھی۔
زلزلے کے جھٹکے ایبٹ آباد اور مالاکنڈ میں بھی محسوس کیے گئے ہیں۔
لاہور : (ویب ڈیسک) پاکستان تحریک انصاف ( پی ٹی آئی ) کی جیل بھرو تحریک کا آغاز صوبائی دارالحکومت سے ہو چکا ہے، تحریک کے پہلے روز پارٹی کے وائس چیئرمین شاہ محمود قریشی ، جنرل سیکرٹری اسد عمر سمیت کئی رہنماؤں اور 80 سے زائد کارکنوں نے رضاکارانہ گرفتاریاں پیش کیں، گرفتاری دینے والے رہنماؤں اور کارکنان کو کوٹ لکھپت جیل منتقل کیا گیا۔
گزشتہ روز پی ٹی آئی کی جانب سے پارٹی کے صوبائی دفتر میں تقریب کے دوران رہنماؤں اور کارکنوں کو پھولوں کے ہار پہنائے گئے اور پھر تمام رہنما جیل روڈ سے ریلی کی شکل میں گرفتاریاں دینے کے لئے مال روڈ پہنچے ، شاہ محمود قریشی نے مال روڈ کے بجائے کیپٹل سٹی پولیس آفیسر ( سی سی پی او ) آفس کے باہر گرفتاری دینے کا اعلان کیا تاہم وہ جونہی کنٹینر سے اترے تو پولیس نےان کو تحویل میں لے لیا۔
بعدازاں اسد عمر ، سینیٹر اعظم سواتی ،سابق گورنر پنجاب عمر سرفراز چیمہ ، سینیٹر ولید اقبال ، محمد خان مدنی اوردیگر نے گرفتاری پیش کی۔
قیادت کی جانب سے گرفتاریاں دینے کے بعد سینکڑوں کی تعداد میں کارکن خود قیدیوں کی وین کے اندر داخل ہوئے اور کچھ چھت پر سوار ہو گئے ، رضا کارانہ گرفتاریاں دینے والے کارکن نعرے بازی بھی کرتے رہے ، اس دوران پولیس نے پارٹی رہنما زبیر خان نیازی کو بھی گرفتارکرلیا، تاہم سیخ پا کارکنوں نے انہیں پولیس سے چھڑ والیا۔
چند سیخ پا کارکنوں نے پولیس گاڑی کی بھی توڑ پھوڑ کی جس پر پولیس نے پارٹی رہنما عباد فاروق کو گرفتار کر لیا۔
پولیس نے چیئرمین پی ٹی آئی عمران خان کے فوکل پرسن برائے سوشل میڈیا اظہر مشوانی کو بھی گرفتار کیا مگر بعدازاں انہیں رہا کر دیا گیا ، انہوں نے اپنی رہائی کی تصدیق اپنے آفیشل ٹوئٹر اکاؤنٹ کے ذریعے کی۔
دوسری جانب پارٹی رہنما فواد چودھری نے دعویٰ کیا کہ پولیس نے پانچ سے سات سو کارکنوں کو گرفتارکرلیا ہے۔
کوئٹہ: (ویب ڈیسک) بلوچستان کے علاقے بارکھان سے تعلق رکھنے والے خان محمد مری کے خاندان کے 6 افراد کو بازیاب کرا لیا گیا، بازیاب ہونے والوں میں ان کی بیوی گراں ناز، بیٹی فرزانہ ، بیٹے عمران ، عبدالمجید ، غفار اور ستار شامل ہیں۔
ذرائع کے مطابق لیویز فورس کی جانب سے کی جانے والی مختلف کارروائیوں میں 45 سالہ گراں ناز ، 18 سالہ فرزانہ اور 12 سالہ عمران کو سبی رینج کوہلو کے پہاڑی علاقے جبکہ 19 سالہ عبدالمجید کو دکی اور 15 سالہ غفار اور 11 سالہ ستار کو ڈیرہ بگٹی بارڈر ایریا بارکھان سے بازیاب کرایا گیا ہے۔
قبل ازیں ذرائع نے بتایا تھا کہ مزید مغویان کے ملتان میں قید ہونے کی اطلاعات ہیں اور بازیابی کے لئے چھاپے مارے جا رہے ہیں۔
دوسری جانب بارکھان میں کنویں سے ملنے والی لاشوں کا پوسٹ مارٹم مکمل کرلیا گیا ہے اور پولیس سرجن ڈاکٹرعائشہ فیض نے بتایا کہ لاشوں میں سے ایک لڑکی کی لاش ہے جس کی عمر 17 سے 18 سال ہے، مقتولہ کو جنسی زیادتی اور تشدد کے بعد سر پر تین گولیاں مار کر قتل کیا گیا ہے اور شناخت چھپانے کے لیے چہرے اور گردن پر تیزاب پھینکا گیا۔
ڈاکٹر عائشہ فیض نے مزید بتایا کہ قتل کی گئی لڑکی گراں ناز کی بیٹی ہوسکتی ہے جبکہ دیگر دونوں لاشوں کا پوسٹ مارٹم بھی مکمل کرلیا گیا، دونوں نوجوانوں کو تشدد کے بعد قتل کیا گیا۔
اسلام آباد: (ویب ڈیسک) وزیر خارجہ بلاول بھٹو زرداری نے کہا ہے کہ پاکستان ہنگری کے ساتھ باہمی تعاون کو مزید فروغ دینے کا خواشمند ہے اور وہ ہنگری سے اپنے دوستانہ تعلقات کو انتہائی اہمیت دیتا ہے۔
ہنگری کے دورے کے موقع پر اپنے ہم منصب کے ساتھ مشترکہ پریس کانفرنس سے خطاب کرتے ہوئے وزیر خارجہ نے کہا کہ دونوں ممالک کے درمیان دیرینہ دوستانہ تعلقات قائم ہیں، دورے کے دوران ہنگری میں اعلیٰ تعلیم کے لئے پاکستانی طلباءکے وظائف پر بات ہوئی۔
بلاول بھٹو زرداری نے کہا کہ ان کا دورہ ہنگری پاکستان اور ہنگری کے درمیان تعلقات کے ایک نئے دور کا آغاز ہے، انہوں نے دورے کی دعوت پر ہنگری کے اپنے ہم منصب کا شکریہ ادا کرتے ہوئے کہا کہ میں نے دونوں ملکوں کے درمیان تعاون کو بڑھانے کے لئے سہولتی کردار ادا کیا۔
وزیر خارجہ نے کہا کہ پاکستان اور ہنگری نے آج مفاہمت کی تین یادداشتوں پر بھی دستخط کئے ہیں، جن میں سے ایک کھیلوں میں تعاون، سفارتی اکیڈمیوں کے درمیان تعاون قائم ہو گا، پاکستان اور ہنگری کی فارن سروس اکیڈمیاں ایک دوسرے کے سفارت کاروں کو تربیت فراہم کریں گی جبکہ تیسری مفاہمتی یادداشت کا تعلق ہنگری کی یونیورسٹیوں میں پاکستانی طلبا کے لئے دستیاب سکالرشپس کو بڑھانا ہے، انہوں نے کہا کہ ہنگری کی حکومت کا یہ اقدام قابل تعریف ہے۔
بلاول بھٹو زرداری نے کہا کہ پاکستان اور ہنگری کے درمیان مفاہمت کی اس یادداشت کے نتیجے میں سکالرشپس کی تعداد 2 سو سے بڑھ کر 4 سو ہوجائے گی، انہوں نے کہا کہ پاکستان اور ہنگری کے درمیان اقتصادی تعلقات کو بھی فروغ دیا جائے گا، دونوں ملکوں کے درمیان زبردست باہمی مشاورت ہوئی جس سے مختلف مواقع پیدا ہوں گے۔
اسلام آباد: (ویب ڈیسک) سندھ حکومت کے ترجمان بیرسٹر مرتضیٰ وہاب نے کہا ہے کہ عمران خان اپنے کارکنوں کو جیل میں بھیج کر خود گھر میں عیش کر رہا ہے۔
تحریک انصاف کی جیل بھرو تحریک پر ردعمل دیتے ہوئے مرتضیٰ وہاب نے کہا کہ پاکستان کا نام نہاد نیلسن منڈیلا عمران خان ہے، عمران خان پاکستان کو اپنی انا کی بھینٹ چڑھا رہا ہے، پہلے ہی کہہ چکا ہوں یہ تحریک انتشار ہے، عمران نیازی کو کوئی سروکار نہیں پاکستان کو کن حالات کا سامنا ہے۔
سندھ حکومت کے ترجمان بیرسٹر مرتضیٰ وہاب نے مزید کہا کہ عمران خان نے ملک کو ان حالات سے دوچار کیا ہے، پاکستانی قوم ان کے ہتھکنڈوں کو مسترد کر چکی ہے، اب وقت آگیا ہے ایسے شخص سے نجات حاصل کی جائے، پاکستانی قوم عمران نیازی کو ملکی سیاست سے باہر کرے گی۔
اسلام آباد: (ویب ڈیسک) وفاقی وزیر داخلہ رانا ثنا اللہ نے کہا ہے کہ عمران خان کی جیل بھرو تحریک شروع ہونے سے پہلے ہی ختم ہوگئی، ہم سمجھ رہے تھے کہ 500 کارکنان گرفتاریاں دیں گے مگر چند درجن نے ہی گرفتاری دی۔
اسلام آباد میں پریس کانفرنس کرتے ہوئے رانا ثنا اللہ نے کہا کہ عمرانی ٹولے نے ملک کو فتنے میں مبتلا کر دیا، دارالحکومت میں عوام کے سمندر کو لانے والا چند ہزار لوگ بھی نہیں لا سکا، اب عمرانی ٹولے نے جیل بھرو تحریک کا فتنہ پھیلانا شروع کردیا۔
انہوں نے کہا کہ جیل بھرو تحریک شروع ہونے سے پہلے ہی ختم ہوگئی، ہمارا اندازہ تھا کہ 500 لوگ گرفتاری دیں گے مگر چند درجن ہی پولیس کی گاڑیوں میں بیٹھے اور باقی چلے گئے، عوام نے اس فتنے کو تیسری مرتبہ بھی مسترد کردیا۔
رانا ثنا اللہ نے کہا کہ وزیراعظم شہباز شریف انتخابات کا اعلان کر دیتے اگر عمران خان حکومت کو نہ دھمکاتے، پی ٹی آئی کے چیئرمین کی دھمکی کے بعد پی ڈی ایم کی قیادت نے کسی صورت دباؤ میں نہ آنے کا فیصلہ کیا۔ انہوں نے کہا کہ 31 مئی 2018 اور اس کے بعد کی مہنگائی کا عوام جائزہ لیں، ہمارے آٹھ ماہ نکال کر باقی پی ٹی آئی حکومت کے پیدا کردہ مسائل کی وجہ سے ہوشربا مہنگائی ہوئی۔
وزیر داخلہ کا کہنا تھا کہ لاہور اور پنجاب کے عوام کا اس فتنے کو مسترد کرنے پر حکومت اور اتحادیوں کی طرف سے شکریہ ادا کرتا ہوں۔ انہوں نے مزید کہا کہ
ہم الیکشن میں جانے کے لئے تیار ہیں مگر قومی اور صوبائی اسمبلیوں کے انتخابات ایک ساتھ کرانے کی رائے رکھتے ہیں۔
انہوں نے مزید کہا کہ عمرا ن خان نے سیاسی مخالفت کو دشمنی میں تبدیل کردیا جبکہ ہم نے انہیں متعدد بار میثاق معیشت کیلیے ساتھ بیٹھنے کی دعوت دی۔
نابلس: (ویب ڈیسک) اسرائیلی فوج نے ایک مرتبہ پھر روایتی بربریت و وحشت کا مظاہرہ کرتے ہوئے مقبوضہ مغربی کنارے پہ واقع شہر نابلس پر حملہ کر کے کم از کم دس فلسطینیوں کو شہید اور 102 کو زخمی کردیا ہے۔
ٹائمز آف اسرائیل، العربیہ ڈاٹ نیٹ اور اناطولو نیوز ایجنسی سمیت عالمی خبر رساں اداروں کے مطابق اسرائیلی فوج نے نابلس میں جاری اپنی چھاپہ مار کارروائیوں کی تصدیق کی ہے لیکن اس حوالے سے مزید تفصیلات فراہم نہیں کی ہیں البتہ مؤقف اپنایا ہے کہ وہ آپریشن میں مصروف ہے۔
خبر رساں ایجنسی کے مطابق فلسطینی تنظیم جہاداسلامی نے اس حوالے سے کہا ہے کہ نابلس میں اسرائیلی فوج نے اس کے دوکمانڈروں کوایک گھر میں گھیرلیا تھا جس کے بعد جھڑپ شروع ہوئی جو بعد میں بڑھ گئی۔
اسرائیلی میڈیا کے مطابق فوج نے جب ایک گھر کو گھیرا تو پھر اس پر میزائل برسائے جس سے عمارت مکمل طور پر تباہ ہو گئی اور نتیجتاً وہاں موجود دونوں کمانڈرز بھی جاں بحق ہو گئے۔
عالمی خبر رساں ایجنسیوں کے مطابق جس وقت جھڑپیں ہوئیں اس وقت زور دار دھماکوں کی آوازیں بھی سنی گئیں جب کہ فلسطینی نوجوانوں نے اسرائیلی فوج کی بکتر بند گاڑیوں پر پتھراؤ کیا اور موجود پھل بھی مارے۔
فلسطینی حکام کے حوالے سے العربیہ ڈاٹ نیٹ کا کہنا ہے کہ حملے میں جہاد اسلامی کے دونوں کمانڈرزشہید ہوئے ہیں جب کہ باقی دیگر عام شہری ہیں جن میں سے ایک 72 سالہ بزرگ اور 14 سالہ لڑکا بھی شامل ہے۔ شہدا کی اکثریت نوجوانوں پر مشتمل ہے۔
خبر رساں اداروں کے مطابق اسرائیلی فوج کی جانب سے جاری آپریشن کے نتیجے میں اب تک 102 سے زائد افراد زخمی ہو چکے ہیں۔
ٹائمز آف اسرائیل کے مطابق زیر علاج زخمیوں میں سے سات کی حالت تشویشناک بتائی جاتی ہے۔
اسلام آباد: (ویب ڈیسک) پاک فوج کے شعبہ انٹرسروسز پبلک ریلیشنز ( آئی ایس پی آر ) کے مطابق شمالی وزیرستان میں آپریشن کے دوران ایک دہشت گرد ہلاک ہو گیا۔
آئی ایس پی آر کے مطابق شمالی وزیرستان کے علاقے اسپن وام میں سکیورٹی فورسز اور دہشت گردوں کے درمیان فائرنگ کا تبادلہ ہوا، فائرنگ کے تبادلے میں ایک دہشت گرد ہلاک ہوا۔
پاک فوج کے شعبہ تعلقات عامہ کے مطابق ہلاک دہشت گرد سکیورٹی فورسز اور شہریوں کے خلاف دہشت گردانہ کارروائیوں میں ملوث تھا، اہل علاقہ نے سکیورٹی فورسز کے ردعمل کو سراہا۔
ملتان: (ویب ڈیسک) ایچ بی ایل پاکستان سپر لیگ (پی ایس ایل) کے 11 ویں میچ میں ملتان سلطانز نے سنسنی خیز مقابلے کے بعد کراچی کنگز کو ہرادیا۔
ملتان کے 197 رنز کے تعاقب میں کراچی کنگز کی ٹیم مقررہ 20 اوورز میں 5 وکٹوں کے نقصان پر 193 رنز بناسکی اور یوں اسے 3 رنز سے شکست ہوئی۔
ملتان میں کھیلے گئے میچ کراچی کنگز نے ملتان سلطانزکے خلاف ٹاس جیت کر پہلے بولنگ کا فیصلہ کیا اور ملتان نے پہلے کھیلتے ہوئے 196 رنز اسکور کیے۔
ملتان سلطانز کے کپتان محمد رضوان نے شاندار سنچری اسکور کی۔ رضوان 64 گیندوں پر 4 چھکوں اور 10 چوکوں کی مدد سے 110 رنز بناکر ناٹ آؤٹ رہے۔ شان مسعود نے 51 اور ریلی روسو نے 29 رنز بنائے۔
ملتان سلطانز نے مقررہ اوورز میں 2 وکٹوں کے نقصان پر 196 رنز بنائے، کراچی کی جانب سے محمد عمر اور شعیب ملک نے ایک ایک وکٹ لی۔
ٹاس جیتنے کے بعد کراچی کنگز کے کپتان عماد وسیم نے کہا کہ ہمارے لیے ہر میچ اہم ہے، ملتان کی بیٹنگ اچھی ہے، کوشش کریں گے انہیں کم سےکم اسکور کرنے دیں۔
عماد وسیم نے کہا کہ ٹیم میں چار تبدیلیاں کی ہیں۔
خیال رہے کہ ملتان سلطانز رواں سیزن کی ٹاپ ٹیم ہے، اس نے 4 میچز کھیلے ہیں اور صرف ایک میں شکست ہوئی ہے۔ کراچی کنگز نے بھی چار میچز کھیلے ہیں جن میں سے اسے 3 میں شکست کا سامنا کرنا پڑا ہے۔
کوئٹہ: (ویب ڈیسک) بارکھان میں خاتون اور اس کے 2 بیٹوں کے قتل کے الزام میں سردار عبدالرحمان کھیتران کو حراست میں لے لیا گیا۔
پولیس کی جانب سے بھی بلوچستان کے وزیر مواصلات سردار عبدالرحمان کھیتران کو حراست میں لینے کی تصدیق کر دی گئی ہے، سردار عبدالرحمان کھیتران کو بارکھان میں 3 افراد کے قتل کے الزام میں حراست میں لیا گیا ہے۔
واضح رہے کہ سردار عبدالرحمان کھیتران پر گراں ناز مری اور ان کے بیٹوں کو یرغمال بنانے اور قتل کرنے کا الزام ہے، صوبائی وزیر نے خود پر لگے الزامات کی تردید کی تھی جبکہ سردار عبدالرحمان کھیتران کے گھر سے گراں ناز مری کے بچوں کی مبینہ تصاویر بھی سامنے آئی ہیں جس میں سردار عبدالرحمان کھیتران کو بھی دیکھا جا سکتا ہے۔
گزشتہ روز بلوچستان کے علاقے بارکھان سے تعلق رکھنے والی خاتون اور ان کے دو بیٹوں کی لاشیں ملیں تھیں، چند روز قبل سوشل میڈیا پر خاتون کی قرآن پاک ہاتھ میں لیے نجی جیل سے رہائی کی دہائیاں دیتی ہوئی ویڈیو سامنے آئی تھی۔
