لاہور: (ویب ڈیسک) پاکستان تحریک انصاف کے چیئرمین اور سابق وزیراعظم عمران خان نے حفاظتی ضمانت پر دستخط کی تصدیق کیلئے آج لاہور ہائی کورٹ میں پیش ہونے کا فیصلہ کر لیا۔
عمران خان کی لاہور ہائیکورٹ میں پیشی کے معاملہ پر چیئرمین پی ٹی آئی کی ذاتی سکیورٹی ٹیم نے ہائیکورٹ کا دورہ کیا، سکیورٹی ٹیم نے عدالت کے مرکزی گیٹس پر سکیورٹی چیک کی، سکیورٹی ٹیم نے ہائیکورٹ کے اندر بھی سکیورٹی کا جائزہ لیا۔
پی ٹی آئی کارکنوں کا سپیشل سکواڈ بھی ایکٹو، سابق وزیراعظم عمران خان کے ساتھ عدالت جائے گا۔
دوسری جانب زمان پارک کے باہر تحریک انصاف کے کارکنان سرگرم ہیں، زمان پارک کے اطراف میں شدید نعرے بازی کی گئی، پولیس پارٹی کو زمان پارک میں جانے سے روکنے پر پی ٹی آئی کارکنان اور پولیس میں تلخ کلامی اور دھکم پیل بھی ہوئی۔
گاڑی کو اندر سے اجازت اور مکمل چیکنگ کے بغیر اندر نہیں جانے دے سکتے، پولیس اندر سے اجازت ملنے پر گاڑی اندر چلی گئی۔
قبل ازیں لاہور ہائیکورٹ نے چیئرمین پی ٹی آئی عمران خان کی گاڑی کو ہائیکورٹ کے احاطے میں داخلے کیلئے اجازت کی درخواست مسترد کر دی ہے۔

لاہور : (ویب ڈیسک) لاہور ہائیکورٹ میں عمران خان کی پیشی کا معاملہ ، عمران خان کی گاڑی کو ہائیکورٹ کے احاطے میں داخلے کیلئے اجازت کی درخواست مسترد کردی گئی ۔
لاہور ہائیکورٹ میں جسٹس عابد عزیز شیخ نے بطور انتظامی جج فیصلہ سنایا ، عمران خان کے وکلا نے گاڑی کو احاطہ عدالت میں لانے کے لیے انتظامی سطح پر ہائیکورٹ سے رجوع کیا تھا ۔
عمران خان کی ہائیکورٹ میں پیشی بارے لیگل ٹیم عمران خان سے دوبارہ مشاورت کرے گی ۔
واضح رہے کہ لاہور ہائیکورٹ نے عمران خان کو حفاظتی ضمانت کی درخواست میں دستخط کی تصدیق کےلیے طلب کر رکھا ہے۔

میونخ: (ویب ڈیسک) پاکستان کے وزیر خارجہ بلاول بھٹو زرداری اور یورپین یونین کے امورِ خارجہ کے سربراہ جوزپ بوریل کے درمیان جرمنی میں جاری میونخ سکیورٹی کانفرنس کی سائیڈ لائنز پر ملاقات ہوئی ہے۔
ملاقات میں دونوں رہنماؤں نے ماحولیات، علاقائی سکیورٹی، مائیگریشن، قوانین پر مشتمل ورلڈ آرڈر، باہمی اور دیگر بین الاقوامی امور پر گفتگو کی۔
یونین کے امورِ خارجہ کے سربراہ جوزپ بوریل نے اس ملاقات کے حوالے سے کہا کہ پاکستان کے وزیر خارجہ بلاول بھٹو زرداری سے علاقائی مسائل اور سلامتی پر تبادلہ خیال کیا گیا، میں نے اس ملاقات میں بین الاقوامی قوانین پر مبنی آرڈر کے تحفظ کے لیے یورپین یونین کے ساتھ مل کر کام کرنے کی خواہش پر زور دیا۔
اُنہوں نے مزید کہا کہ اس کے علاوہ موسمیاتی لچکدار بحالی، تجارت اور نقل مکانی سے متعلق چیلنجوں پر بھی بات کی۔
دوسری جانب، پاکستان کے وزیر خارجہ بلاول بھٹو زرداری نے مائیکروبلاگنگ ویب سائٹ ٹوئٹر پر جاری کردہ اپنے پیغام میں بتایا کہ میونخ سکیورٹی کانفرنس کے موقع پر جوزپ بوریل کے ساتھ اچھی بات چیت ہوئی، علاقائی اور عالمی اہمیت کے امور پر تبادلہ خیال کیا۔

اسلام آباد: (ویب ڈیسک) قومی ادارہ صحت ( این آئی ایچ) نے کہا ہے کہ گزشتہ 24 گھنٹوں کے دوران ملک بھر میں 3 ہزار 605 کورونا ٹیسٹ کئے گئے ہیں۔
این آئی ایچ کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 3 ہزار 605 کورونا ٹیسٹ کئے گئے جن میں سے 17 افراد کے کورونا ٹیسٹ مثبت آئے ہیں۔
اس طرح گزشتہ 24 گھنٹوں میں کئے گئے مثبت کورونا ٹیسٹ کی شرح 0.47 فیصد رہی ہے، مزید برآں اس دوران کورونا وائرس سے کوئی بھی مریض جاں بحق نہیں ہوا جبکہ 12 مریضوں کی حالت تشویشناک ہے۔

میونخ : (ویب ڈیسک) پاکستان پیپلز پارٹی( پی پی پی) کے چیئرمین اور وفاقی وزیر خارجہ بلاول بھٹو زرداری نے کہا ہے کہ پاکستان اپنی تاریخ کے بدترین معاشی بحران کا سامنا کر رہا ہے، یوکرین جنگ اور سیلاب نے ملکی معیشت کو تباہ کیا لیکن پاکستان ایک بار پھر ابھرتی معیشت بن کر اپنے مسائل حل کر سکتا ہے۔
میونخ سکیورٹی کانفرنس کے موقع پر امریکی نشریاتی ادارے کنزیومر نیوز اینڈ بزنس چینل (سی این بی سی ) کو دیئے گئے اپنے حالیہ انٹرویو میں چیئرمین پیپلز پارٹی نے پاکستان میں موسمیاتی تبدیلی، ملکی معیشت اور افغانستان کی صورت حال پر گفتگو کی۔
وزیر دفاع خواجہ آصف کے بیان جس میں انہوں نے کہا تھا کہ پاکستان نادہندہ اور دیوالیہ ہو گیا ہے کے بارے میں وزیر خارجہ نے کہا کہ وزیر دفاع سیاسی تناظر میں بات کر رہے تھے ، وہ تکنیکی نہیں بلکہ مشکل معاشی دور کا ذکر کر رہے تھے، انہوں نے ملک دیوالیہ ہونے کا بیان سیاسی جلسے میں دیا۔
بلاول بھٹو نے کہا کہ ہمیں بدترین معاشی طوفان کا سامنا ہے، پاکستان کا ایک بڑا حصہ حالیہ سیلابی پانی میں ڈوب گیا ہے ، سیلاب کی تباہی موسمیاتی تبدیلیوں کی وجہ سے ہے، موسمیاتی سیلاب نے پاکستان کی معیشت کا رخ بدل دیا ہے اور پاکستان ابھی تک مشکلات سے باہر نہیں نکل سکا ہے۔
انہوں نے کہا کہ پاکستان میں سیلاب سے 5 ملین ایکڑ فصلیں تباہ ہوئیں، پاکستان معاشی بحران سے نکلنے کے لیے انٹرنیشنل مانیٹری فنڈ ( آئی ایم ایف ) سے مذاکرات کر رہا ہے، یوکرین جنگ اور سیلاب نے ملکی معیشت کو تباہ کیا لیکن پاکستان ایک بار پھر ابھرتی معیشت بن کر اپنے مسائل حل کر سکتا ہے۔
انہوں نے پشاور اور کراچی میں حالیہ دہشت گردی کے حملوں کا حوالہ دیتے ہوئے کہا کہ پاکستان حالیہ دنوں میں دہشت گردی سے بھی متاثر ہوا ہے اور افغانستان سے امریکی انخلا کے بعد دہشتگردی کی لہر میں اضافہ ہوا، پشاور حملے میں 100 لوگ مارے گئے اور کراچی میں بھی دہشت گردی کا واقعہ ہوا ہے۔
ان کا مزید کہنا تھا کہ پاکستان ایسے دور سے گزر رہا ہے جہاں غیر آئینی اقدام نہیں ہوں گے، اپوزیشن نے جو اقدامات اٹھائے وہ تاریخ میں پہلی بار ہوئے ہیں، جمہوریت میں سابق وزیر اعظم عمران خان جمہوری انداز اپنا کر واپس آسکتے ہیں مگر وہ جمہوری انداز نہیں اپنا رہے جو ان کے لئے سود مند نہیں ہے۔

عمر کوٹ : (ویب ڈیسک) صوبہ سندھ کے شہر عمر کوٹ میں زائرین کی کشتی کلانکر جھیل میں الٹ گئی جس کے نتیجے میں 3 افراد جاں بحق ہو گئے۔
ریسکیو ذرائع کے مطابق کشتی الٹنے کے باعث 6 افراد جھیل میں ڈوبے، زائرین نوری والی کے مزار پر حاضری کے لئے جا رہے تھے، حادثے میں جاں بحق ہونے والے تین افراد کی لاشیں نکال لی گئی ہیں جبکہ دیگر تین کی تلاش کے لئے جاری ریسکیو آپریشن کو اندھیرے کے باعث روک دیا گیا ہے۔
دوسری جانب حادثے میں جاں بحق ہونے والے افراد کی لاشیں گھر پہنچنے پر کہرام مچ گیا۔

کلر کہار: (ویب ڈیسک) کلرکہار کے نزدیک موٹروے سالٹ رینج پر باراتیوں کی بس الٹ گئی جس کے نتیجے میں 12 افراد جاں بحق جبکہ 50 سے زائد افراد زخمی ہو گئے، جاں بحق ہونے والوں میں خواتین بھی شامل ہیں۔
موٹر وے پولیس کے مطابق بس اسلام آباد سے لاہور جا رہی تھی جبکہ حادثہ بریک فیل ہونے کی وجہ سے پیش آیا، بس درمیانی دیوار توڑ کر دوسری طرف کئی گاڑیوں سے ٹکرانے کے بعد الٹی، بس کے اندر پھنسے افراد کو نکالنے کے لئے ریسکیو آپریشن مکمل کر لیا گیا ہے۔
پولیس نے مزید بتایا کہ حادثے کے نتیجے میں جاں بحق ہونے والوں میں تین خواتین بھی شامل ہیں جبکہ حادثے کے تمام زخمیوں کو ٹراما سنٹر منتقل کر دیا گیا ہے، ہسپتال میں موٹروے پولیس، پنجاب پولیس ، ریسکیو 1122 اور ہیلتھ کا عملہ موجود ہے۔
دوسری جانب وزیر اعظم شہباز شریف نے حادثے پر اظہار افسوس کرتے ہوئے جاں بحق ہونے والے افراد کے لواحقین سے ہمدردی اور تعزیت کا اظہار کیا ہے جبکہ زخمیوں کو بہترین طبی سہولیات فراہم کرنے کی بھی ہدایت کی ہے۔
علاوہ ازیں وفاقی وزیر داخلہ رانا ثناء اللہ نے بھی افسوسناک حادثے میں قیمتی جانوں کے ضیاع پر گہرے دکھ اور افسوس کا اظہار کیا ہے، انہوں نے حادثے میں جاں بحق ہونے والے افراد کی بلندی درجات کے لئے دعا بھی کی ہے۔
وفاقی وزیر داخلہ نے ریسکیو حکام کو حادثے کے نتیجے میں زخمی ہونے والوں کو ہر ممکن امداد فراہم کرنے کی بھی ہدایت کی ہے۔

لاہور : (ویب ڈیسک) چیئرمین پی ٹی آئی عمران خان نے کل لاہور ہائیکورٹ میں پیش ہونے کا فیصلہ کر لیا۔
پاکستان تحریک انصاف کی جانب سے اعلان کیا گیا ہے کہ چیئرمین پی ٹی آئی عمران خان حفاظتی ضمانت کے لیے کل لاہور ہائیکورٹ میں پیش ہوں گے۔
عمران خان کے پولیٹیکل سیکریٹری نے عمران خان کی لاہور ہائیکورٹ میں پیشی کی تصدیق کی ہے۔
ذرائع کے مطابق عمران خان کی سیکیورٹی کلیئرنس کے لیے بھی لاہور ہائیکورٹ سے رجوع کرلیا گیا ہے۔پی ٹی آئی رہنما شبلی فراز نے انتظامی جج عابد عزیز شیخ کو درخواست دے دی ہے۔
درخواست موقف دیا گیا کہ عمران خان کی زندگی کو لاحق خطرات کے پیش نظر پیشی پر سیکیورٹی کلیئرنس کروائی جائے، ایڈمنسٹریٹو جج کی طرف سے سیکیورٹی کلیئرنس ملنے کے بعد عمران خان ہائیکورٹ میں پیش ہوں گے۔
واضح رہے کہ لاہور ہائیکورٹ کے سنگل رکنی بینچ نے عمران خان کو پیر تک پیش ہونے کی مہلت دی تھی۔عمران خان نے اسلام آباد میں درج مقدمے پر حفاظتی ضمانت کیلئے عدالت سے رجوع کیا تھا۔

کراچی : (ویب ڈیسک) کراچی پولیس آفس (کے پی او) پر حملے میں زخمی ہونے والا ایک اور پولیس اہلکار آج دم توڑ گیا جس کے بعد حملے میں شہادتوں کی تعداد 5 ہوگئی ۔
پولیس کے مطابق جمعےکی شام کراچی پولیس آفس میں ہونے والے حملے میں زخمی ہونیوالا اہلکار عبدالطیف ہسپتال میں زیر علاج تھا تاہم وہ جانبر نہ ہوسکا۔
پولیس حکام کے مطابق اہلکار عبدالطیف سکیورٹی ڈویژن میں تعینات تھا۔
دوسری جانب کراچی پولیس آفس پر حملےکا مقدمہ کاؤنٹرٹیررازم ڈیپارٹمنٹ (سی ٹی ڈی) تھانے میں درج کرلیا گیا ہے، مقدمہ صدر تھانے کے ایس ایچ او کی مدعیت میں درج کیا گیا ہے۔
درج مقدمے میں دہشت گردی، قتل اور اقدام قتل سمیت دیگر دفعات شامل ہیں، مقدمہ تینوں حملہ آوروں، فرار ملزمان اور سہولت کاروں کے خلاف درج کیا گیا ہے۔
واضح رہے کہ جمعہ17 فروری کی رات کراچی پولیس ہیڈ آفس پر ہونے والے حملے میں تمام دہشت گرد مارے گئے تھے جبکہ پولیس اور رینجرز اہلکار سمیت 4 افراد شہید اور 18افراد زخمی ہوئےتھے۔

کراچی: (ویب ڈیسک) پولیس آفس حملے کی تحقیقات کے دوران قانون نافذ کرنے والے اداروں نے شہر کے مختلف علاقوں میں چھاپے مار کر 10سے زائد مشتبہ افراد کو حراست میں لے لیا۔
تحقیقاتی ادارے کراچی، ملتان اور پشاور میں پولیس پر ہونے والے حملوں کی کڑیاں جوڑنے لگے، قانون نافذ کرنے والے ادارے واقعہ کی مختلف زاویوں سے تفتیش کر رہے ہیں۔
تفتیشی ذرائع کا کہنا ہے کہ دہشت گردوں نے پشاور پولیس لائن پر حملہ جمعہ کو کیا، کراچی پولیس پر حملے کیلئے بھی جمعہ کے روز کا انتخاب کیا گیا، دہشت گردوں کا ہدف صرف پولیس تھی۔