بدھ کو قومی اسمبلی میں راجہ پرویز اشرف اور  مسلم لیگ (ن) کے خواجہ آصف کی طرف سے نکتہ ہائے اعتراض پر جواب دیتے ہوئے شاہ محمود قریشی نے کہا کہ پاکستان کی معاشی اور اقتصادی خودمختاری کا تحفظ ہم سب کی ذمہ داری ہے۔ پاکستان آج جن اقتصادی مشکلات سے دوچار  ہے حسابات جاریہ ، تجارتی خسارہ اور ریونیو کے بیشتر حصے کے بیرونی قرضوں کی ادائیگیوں جیسے معاملات پر سنجیدہ بات کرنے کی ضرورت ہے، ہم سب نے مل کر اسے ٹھیک کرنا ہے۔

وزیر خارجہ نے کہا کہ کلی معیشت کے اشاریے گزشتہ تین برسوں میں نہیں بگڑے یہ ایک طویل داستان ہے جن کا جائزہ لینا ضروری ہے۔

وزیر خارجہ نے کہا کہ معاشی خودمختاری کا تحفظ ہم سب کی ذمہ داری ہے، ہم ملک کی معاشی خودمختاری کا دفاع کریں گے۔

شاہ محمود قریشی نے کہا کہ ایک فاضل ممبر نے پاکستان کے جوہری اثاثوں کے حوالے سے بات کی ہے، کم سے کم دفاعی صلاحیت پر  قومی اتفاق رائے تھا، ہے اور رہے گا۔ ہم کسی غفلت اور کوتاہی کے متحمل نہیں ہو سکتے۔ پاکستان کی پوری قوم اس حوالے سے متفق ہے۔

وزیر خارجہ نے کہا کہ کورم کی بنیادی ذمہ داری حکومت کی ہے لیکن اپوزیشن کے ارکان سے دست بدست درخواست ہے کہ وہ ایوان کو فعال رکھنے کیلئے گھڑی گھڑی کورم کی نشاندہی نہ کریں تاکہ ہم ان کے خیالات سے بھی مستفید ہوں۔

قبل ازیں پیپلز پارٹی کے رکن قومی اسمبلی راجہ پرویز اشرف نے نکتہ اعتراض پر کہا تھا کہ ایوان کے اندر اور باہر چہ مگوئیاں ہو رہی ہیں کہ حکومت مَنی بل یا مِنی بجٹ لا رہی ہے، مہنگائی، بیروزگاری اور گیس کی قلت نے لوگوں کے دکھوں میں پہلے سے اضافہ کیا ہے، ہمیں اس کی مزاحمت کرنی چاہیے۔

اس موقع پر ایوان کی کارروائی چلانے والے ڈپٹی اسپیکر قاسم سوری نے کہا کہ جب یہ بل ایوان میں آجائے گا تو اس پر بحث ہوگی۔

لاہور میں سال نو پر موسیقی کی تقریبات اور آتشبازی پر پابندی عائد کردی گئی۔
لاہور میں نیو ایئر نائٹ پر موسیقی کی تقریبات اور آتشبازی پر پابندی ہوگی، ضلعی انتظامیہ کی جانب سے نوٹیفکیشن جاری کردیا گیا۔ضلعی انتظامیہ کا کہنا ہے کہ نیو ایئرنائٹ پر سیکیورٹی خدشات کے تحت عوامی اجتماع، کنسرٹ اور موسیقی کی تقریب کی اجازت نہیں ہوگی۔
انتظامیہ کے مطابق فضائی آلودگی، اسموگ کے مسائل اور آتش بازی کی آڑ میں ہوائی فائرنگ کے خدشات کے پیش نظر آتش بازی کے لیے دی جانے والی تمام درخواستیں مسترد کردی گئی ہیں۔واضح رہے کہ اس سے قبل لاہور میں سال نو کے دوران آتش بازی کی اجازت کے لیے ضلعی انتظامیہ کو درخواستیں بھیجی گئی تھیں۔
یاد رہے کہ اس سے قبل بھی سال نو کے موقع پر ہوائی فائرنگ کے نتیجے میں کئی افراد اپنی قیمتی جانوں سے ہاتھ دھو بیٹھتے ہیں اور متعدد افراد فائرنگ سے زخمی ہوجاتے ہیں۔

اداکارہ ماہرہ خان کا کہنا ہے کہ وہ پہننے اوڑھنے کے معاملے میں ذرا دقیانوسی خیالات کی مالک ہیں۔
کچھ روز قبل اداکارہ نے ایک ویب شو میں شرکت کی جس میں انہوں نے اپنی طلاق سے لے کر بیٹے کی پرورش اور اپنی زندگی میں آنے والی مشکلات کے حوالے سے گفتگو کی۔
ماہرہ خان نے کہا کہ اپنے پہناوے کو لے کر میں بچپن سے ہی کافی دقیانوسی ہوں، مجھے نہیں معلوم کہ ایسا کیوں ہے، حالانکہ میں کئی عرصے بیرونِ ملک رہ چکی ہوں، چاہوں تو شارٹس اور ٹی شرٹ پہن سکتی ہوں۔
اداکارہ نے مداحوں سے متعلق بات کرتے ہوئے کہا کہ ناظرین کو اچھا نہیں لگتا اگر میں کپڑوں میں سے ذرا سی بھی ٹانگ دکھا دوں، وہ اسے ناپسند کرتے ہیں۔
انہوں نے مزید کہا کہ میں ناظرین کی جانب سے آنے والی رائے سے آگاہ ہوتی ہوں لیکن اس کا یہ مطلب نہیں کہ میں ان کے بارے میں بہت زیادہ سوچتی ہوں۔