لاہور (خصوصی رپورٹ) لاہور ہائیکورٹ نے غیرقانونی طور پر رقم بیرون ملک بھیجنے پر وزیراعظم میاں نوازشریف اور سینٹ میں اپوزیشن رہنما چودھری اعتزاز احسن کو عدالت طلب کرنے جبکہ تحریک انصاف کے سربراہ عمران خان، وزیراعلیٰ پنجاب شہبازشریف، پرویزالٰہی، چودھری شجاعت حسین، سپیکر قومی اسمبلی سمیت 64 سیاستدانوں اور معروف شخصیات کے خلاف کارروائی کی درخواست پر فریقین کے وکلاءکو بحث کیلئے طلب کر لیا۔ درخواست گزار بیرسٹر جاوید اقبال جعفری نے ترمیمی درخواست جمع کراتے ہوئے مو¿قف اختیار کیا کہ عمران خان، نوازشریف، شہبازشریف، پرویزالٰہی، چودھری شجاعت حسین، سردار ایاز صادق، اسحاق ڈار، جاوید ہاشمی، فاروق ستار، نجم سیٹھی‘ میاں منشا، عاصمہ جہانگیر،خواجہ شریف ،حمزہ شہباز شریف ،شاہد خاقان عباسی،رانا تنویر اور شیخ رشید نے 3 سو ارب ڈالر غیرقانونی طور پر بیرون ملک منتقل کئے اور قومی خزانے کو ناقابل تلافی نقصان پہنچایا۔ نوازشریف کے صاحبزادوں نے برطانیہ میں149 جائیدادیں خریدیں جبکہ درخواست میں فریق بنائے گئے تمام سیاستدانوں نے بیرون ملک اثاثے بنا کر ملک کو کنگال کیا۔ ان سیاستدانوں کی طرف سے بیرون ملک بینکوں میں رکھے گئے پیسے وطن واپس لا کر ملک کی حالت تبدیل کی جا سکتی ہے اور حقیقی انقلاب برپا کیا جا سکتا ہے۔ انہوں نے استدعا کی کہ وزیراعظم اور سینٹ میں اپوزیشن لیڈر چودھری اعتزاز احسن کو ذاتی حیثیت میں عدالت میں طلب کیا جائے‘ جس پر عدالت نے کیس کی سماعت19 دسمبر تک ملتوی کرتے ہوئے فریقین کے وکلاءکو بحث کیلئے طلب کر لیا۔
