آرمی چیف کا اہم اعلان, صوبائی حکومتوں کیلئے ہدایات جاری

کوئٹہ(بیورو رپورٹ) آرمی چیف جنرل قمر جاوید باجوہ نے دہشت گردوں کے خلاف بلاامتیاز آپریشن جاری رکھنے کی ہدایت کرتے ہوئے کہا کہ دہشت گردی کوکسی صورت برداشت نہیں کیا جائے گا جبکہ قیام امن کے لیے صوبائی حکومت سے ہرممکن تعاون کیا جائے۔ پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے کور ہیڈکوارٹر سدرن کمانڈ کا دورہ کیا جہاں کورکمانڈر سدرن کمانڈ لیفٹیننٹ جنرل عامر ریاض نے آرمی چیف کا استقبال کیا جب کہ جنرل قمر جاوید باجوہ نے یادگار شہدا پر حاضری دی اور پھول چڑھائے۔ ترجمان کے مطابق آرمی چیف کو بلوچستان کی سکیورٹی صورتحال پر بریفنگ دی گئی جبکہ انہوں نے قانون نافذ کرنے والے اداروں کی کارکردگی کو سراہا۔ پاک فوج کے سربراہ نے دہشت گردوں کے خلاف بلا امتیاز آپریشن جاری رکھنے کی ہدایت کرتے ہوئے کہا کہ دہشت گردی کوکسی صورت برداشت نہیں کیا جائے گا جبکہ دہشت گردوں کے خلاف آپریشن میں انٹیلیجنس اور سکیورٹی اداروں سے تعاون کیا جائے۔ انہوں نے کہا کہ بلوچوں نے امن وامان کی بہتری کے لیے قربانیاں دی ہیں، سکیورٹی اداروں ، عوام کی قربانیاں رائیگاں نہیں جائیں گی جب کہ صوبے میں امن کی بحالی کے لیے صوبائی حکومت کو ہرممکن مدد فراہم کی جائے گی۔ آرمی چیف نے بلوچستان میں جاری ترقیاتی منصوبوں کو جلد مکمل کرنے کی ہدایت کرتے ہوئے کہا کہ اقتصادی راہداری منصوبوں کو فول پروف سکیورٹی دی جائے اور پسماندہ علاقوں میں جاری ترقیاتی منصوبوں کو بھی مکمل سکیورٹی فراہم کی جائے گی۔