چینی جنگی جہاز گوادر پہنچ گئے, مقابلہ کرنے کی تیاریاں

گوادر (مانیٹرنگ ڈیسک)پاکستان میری ٹائم سیکیورٹی ایجنسی(پی ایم ایس اے)کیلئے چین میں بنائے گئے 2 میری ٹائم گشتی جہاز گوادر پہنچ گئے ہیں۔ ان گشتی جہازوں کو پی ایم ایس ایس ہینگول اور پی ایم اس ایس بسول کا نام دیا گیا ہے اور پی ایم ایس اے کو ان جہازوں کی فراہمی سے دہشت گردی سمیت دیگر جرائم کے خلاف سمندری حدود کی سیکیورٹی مزید بہتر ہو جائے گی۔پاکستان اور چین اس وقت تقریبا 3 ہزار کلومیٹر لمبی اقتصادی راہداری کی تعمیر میں مصروف ہیں جس کے باعث دونوں ممالک کے درمیان آمدورفت مزید بہتر ہو گی۔ اس راہداری کی تعمیر سے چین کو تیل کی فراہمی اور چینی مصنوعات کی مشرق وسطی اور افریقہ کو فراہمی کیلئے سستا راستہ فراہم ہو گا۔پاکستان نیوی کے ایک افسر کا کہنا ہے کہ پاک، چین اقتصادی راہداری کے تحت معاشی سرگرمیوں میں اضافے اورگوادر بندرگاہ کے آغاز کے باعث میری ٹائم سیکیورٹی ایجنسی کا کردار اہم ہو گیا ہے۔ پاکستانی نیوی کے میرینز، پی ایم ایس اے کے گشتی جہاز اور عملہ اس وقت تمام بندرگاہوں کی حفاظت کرنے کیساتھ ساتھ پورٹ قاسم پر آنے والی ایل این جی کی سپلائی کو بھی مکمل تحفظ فراہم کر رہا ہے۔میری ٹائم کی سرگرمیوں میں بے مثال اضافہ اور سمندری حدود میں سیکیورٹی خدشات کے باعث پاکستان نیوی اور پی ایم ایس اے کی استعداد کار میں اضافہ کیا گیا ہے تاکہ روائتی چیلنجز کا مقابلہ کرنے کیساتھ ساتھ ان خدشات کا مقابلہ بھی کیا جا سکے جو پاکستان کے روائتی دشمن کی جانب سے پیدا کئے گئے ہیں۔