لاہور (نیوز ایجنسیاں) اداکارہ ماہرہ خان نے کہا ہے کہ میں نامور ڈائریکٹر شعیب منصور کی دریافت ہوں جنہوں نے مجھے اپنی فلم میں کاسٹ کیا جس کے بعد فلمسازوں کی نظریں مجھ پر اٹھنے لگیں اور میں تیزی سے سفر کرتی ہوئی بالی ووڈ تک جا پہنچی ، اس سارے سفر میں جہاں میری اپنی محنت شامل ہے وہاں میں شعیب منصور کے کردار کو کبھی بھی فراموش نہیں کر سکتی ۔ انہوں نے ایک انٹرویو کے دوران کہا کہ فلم ” رئیس “ نے جس طرح سے کامیابی حاصل کی وہ میرے تصور سے باہر ہے اور اگر دوبارہ موقع ملا تو شاہ رخ خان میری پہلی ترجیح ہو گی مگر سلمان خان کے ساتھ کام کرنے کی بھی خواہش ہے ۔ انہوں نے کہا کہ فلم ” رئیس “ کی کامیابی سے مجھے پاکستانی فلمسازوں کی جانب سے ایک درجن سے زیادہ فلموں کی پیشکش کی جا چکی ہے تاہم ابھی تک میں نے کسی فلم میں کام کرنے کا فیصلہ نہیں کیا ۔ جب میں میرے مطلب کا سکرپٹ آئے گا تو میں اچھے ڈائریکٹر کے ساتھ کام کرنا پسند کروں گی ۔ ماہرہ خان نے کہا کہ آج کل میری کراچی میں متعدد ڈرامہ سیریل کی ریکارڈنگ کا سلسلہ جاری ہے اور اس کے ساتھ میرے کمرشل بھی چل رہے ہیں ۔ انہوں نے ایک سوال کے جواب میں بتایا کہ سب سے زیادہ معاوضہ لینے کی باتیں درست نہیں البتہ میں پراجیکٹ کے مطابق اپنا معاوضہ طے کرتی ہوں ۔
ماہرہ خان نے کا میابی کے راز سے پردہ اُٹھا دیا
