سرگودھا (نمائندہ خبریں ) حکومت نے منہ کے کینسر کا موجب بننے والے بھارتی گٹکے کی ملک بھر میں فروخت پر پابندی عائد کردی ہے ذرائع کے مطابق بھارتی گٹکا ملک بھر کے مختلف شہروں میں سرعام فروخت ہورہا ہے جس کے استعمال سے نوجوان گلے کے کینسر میں مبتلا ہورہے ہیں اس گٹکے پر لگا کیمیکل انسانی نسیں سکیڑتا ہے جس کے باعث یہ گلے کے کینسر کا موجب بنتا ہے ڈاکٹروں کا کہنا ہے کہ 12 سال سے 25 سال کی عمر کے نوجوان بڑی مقدار میں بھارتی گٹکا استعمال کرتے ہیں جس کی وجہ سے یہ لوگ منہ کے کینسر میں مبتلا ہورہے ہیں حکومت نے حکومتی رپورٹ پر بھارتی گٹکا فروخت کرنیوالوں کےخلاف کاروائی کی ہدایت کردی ہے۔

لاہور (خصوصی رپورٹ) محکمہ پرائمری اینڈ سیکنڈری ہیلتھ کیئر نے 12 اضلاع میں سینکڑوں ڈاکٹروں کو کنٹریکٹ پر بھرتی کا فیصلہ کیا ہے۔ ڈاکٹروں کو دور دراز کے علاقوں میں بھاری تنخواہوں پر تین سال کے لئے بھرتی کیا جائے گا۔ ویمن میڈیکل آفیسر اور میڈیکل آفیسر 30 اپریل تک اپنی درخواستیں محکمہ پرائمری اینڈ سیکنڈری ہیلتھ کیئر کو جمع کروا سکتے ہیں۔ ذرائع کے مطابق کم تنخواہوں اور عدم سہولیات کے باعث ڈاکٹروں کی بڑی تعداد پسماندہ اور دور دراز علاقوں کی سینکڑوں اسامیاں عرصہ دراز سے خالی ہیں‘ اب حکومت نے ان پوسٹوں پر بھرتی کا فیصلہ کیا ہے۔ جن اضلاع میں بھرتیاںکی جائیں گی ان میں اٹک‘ بہاولپور‘ بھکر‘ چکوال‘ چنیوٹ‘ ڈی جی خان‘ خوشاب‘ لیہ‘ منڈی بہاﺅالدین‘ میانوالی‘ نارووال اور راجن پور کے شہر شامل ہیں۔ ڈی ایچ کیو میں بھرتی ہونے والے ڈاکٹروں کو ماہانہ ایک لاکھ‘ ٹی ایچ ہسپتال میں ایک لاکھ دس ہزار‘ رولر ہیلتھ سنٹرز پر ڈاکٹروں کو ایک لاکھ 20 ہزار اور بنیادی مراکز صحت پر بھرتی ڈاکٹر کو ایک لاکھ 30 ہزار روپے تنخواہ ملے گی۔

ملتان (خبرنگار خصوصی) انسانی سمگلنگ میں ملوث بااثر مافیا نے خواتین کی خریدوفروخت کا گھناﺅنا دھندہ عروج پر پہنچادیا۔ اغوا کی جانے والی اور خریدی گئی عورتوں کو فروخت کرنے کے ساتھ ان کے گردے نکال کر فروخت کرنے کا بھی انکشاف ہوا ہے جبکہ دوسری طرف ایف آئی اے اور پولیس بااثر افراد کیخلاف کارروائی سے انکاری نظر آتی ہے۔ اس وقت ڈیرہ غازی خان کے مضافاتی علاقے اس دھندے کا مرکز بنے ہوئے ہیں۔ تحصیل کوٹ چھٹہ کی چوکی خانپور منجوالا کے نزدیک واقع بستی سوجھیلی والا کے رہائشیوں یونس کچھیلا‘ نورکچھیلا‘ بڈو کچھیلا‘ مالک کچھیلا‘ حاجی کچھیلا‘ نسرین مائی اور فوزیہ مائی نے گروہ تشکیل دے رکھا ہے۔ عورتوںکو اغوا یا پھر خرید کر زیادہ تر بلوچستان میں فروخت کرتے ہیں۔اس کے علاوہ دلالوں سعید اللہ رند اور مہر خان کے ذریعے مقامی لوگوں کو بھی فروخت کی جارہی ہیں۔ ڈیرہ ڈویژن سے گزشتہ د و سال کے دوران 170سے زائد خواتین کو دبئی سمگل کرنے کی اطلاعات ہیں۔ تمام کو وزٹ ویزہ پر مختلف اوقات میں 10افراد کے گروپ میں تین تین لڑکیوں کو شامل کرکے ملک سے باہر نکالا گیا۔ معلوم ہوا ہے کہ ان تمام لڑکیوں کو پہلے مختلف این جی اوز کے دفاتر میں ملازمتیں فراہم کی گئیں بعدازاں انہیں فرضی اشتہار دکھاکر دبئی بینک اور مختلف ملٹی نیشنل کمپنیوں میں ملازمت کا جھانسہ دیا گیا جبکہ دبئی کے فرضی اپارٹمنٹ سیٹرز بھی دیئے گئے۔ لڑکیوں کو دبئی اور شارجہ میں رکھ کر ان سے زبردستی جسم فروشی کرائی جارہی ہے۔ لڑکیوں کے لواحقین نے ایف آئی اے حکام کو تحریری درخواستیں بھی دیں مگر کارروائی نہیں ہوئی۔ اسی وجہ سے یہ گھناﺅنا دھندہ دھڑلے سے جاری ہے جس میں زیادہ تر غریب گھرانوں کی لڑکیاں پھنس رہی ہیں جن کی تلاش بعد میں ناممکن ہوجاتی ہے۔
انسانی سمگلنگ

لاہور (خصوصی رپورٹ) اپریل کے مہینے میں ملکی تاریخ کی بدترین لوڈشیڈنگ پر حکومت کے ہاتھ پاﺅں پھول گئے ہیں۔ لوڈشیڈنگ کیخلاف شدید عوامی ردعمل سے بوکھلاہٹ کا شکار پنجاب حکومت نے گیس پر چلنے والے بھکھی پاور پلانٹ کو ٹرائل رن کے دوران ہی نیشنل گرڈ سے منسلک کر دیا جس سے بھکھی پاور پلانٹ کی ٹربائن اڑ گئی اور پورا پلانٹ ٹرپ کر گیا۔ آر ایل این جی پر چلنے والے بھکھی پاور پلانٹ نے پہلے مرحلے میں 800 میگاواٹ بجلی پیدا کرنا تھی جو تجرباتی بنیادوں پر 700 میگاواٹ پروڈیوس کر رہا تھا جسے بجلی کے قومی نظام سے منسلک کرنے سے پہلے تجربے کے مخصوص عمل سے گزارا جانا لازم تھا۔ اس حوالے سے قائداعظم تھرمل پاور لمیٹڈ کے چیف ایگزیکٹو احد چیمہ نے خصوصی گفتگو کرتے ہوئے تصدیق کی کہ بھکھی پاور پلانٹ سے پیداوار بجلی کے قومی نظام میں شامل نہیں ہو سکی تاہم ٹرائل رن کے دوران پلانٹ ٹرپ کر جانا غیرمعمولی بات نہیں، بھکھی پاور پلانٹ کو ایک آدھ روز میں دوبارہ چلا دیا جائیگا۔ دوسری جانب لیسکو کے اعلیٰ حکام نے بھی نام ظاہر نہ کرنے کی شرط پر دنیا کو بتایا کہ بھکھی پاور پلانٹ کو ٹرائل رن کے دوران نیشنل گرڈ سے منسلک کرنا بہت بڑا بلنڈر تھا جس کے نتیجے میں 700 میگاواٹ بجلی کا خسارہ ہوا۔
ٹربائن اڑ گئی

لاہور (مانیٹرنگ ڈیسک) لاہور، اسلام آباد سمیت ملک کے دیگر علاقوں میں زلزلے کے شدید جھٹکے محسوس کیے گئے۔ زلزلہ کی شدت 5.5 ریکارڈ کی گئی۔ کسی قسم کے جانی نقصان کی اطلاعات موصول نہیں ہوئیں۔ زلزلے کے باعث خوف و ہراس پھیل گیا لوگ کلمہ طیبہ کا ورد کرتے گھروں سے باہر نکل آئے۔ زلزلے کا مرکز افغانستان میں ہندوکش پہاڑی سلسلہ بتایا جاتا ہے۔

حیدرآباد (خصوصی رپورٹ) لاہور میں کومونگ آپریشن کے دوران دہشت گردوں کے ساتھ گرفتار کی گی جانے والی سعید آباد کی رہائشی اور لیاقت میڈیکل یونیورسٹی جامشورہ کی سیکنڈایئر کی طالبہ نورین لغاری کے دہشت گردوں اور انتہا پسندون کے انٹرنیٹ کے ذریعے روابط تھے۔ جند ماہ قبل سوشل میڈیا پر انتہا پسندانہ مواد ڈالنے کی بناءپر ان کا فیس بک اکاﺅنٹ بھی بند کر دیا گیا تھا۔ حیدرآباد کے علاقے حسین آبد کی رہائشی نورین لغاری کے بارے میںمعلوم ہوا ہے کہ ایک سال قبل وہ ذہنی طور پر جہاد اور انتہاپسندی کی طرف مائل ہوئی اور اس کے بعد اس سے اس نے برقعہ پہنا شروع کر دیا تھا۔ نورین لغاری یونیورسٹی برقعہ پہن کر جاتی تھی۔ اپنی سہیلیوں سے جہاد اور انتہا پسندانہ نظریات سے متعلق گفتگو کیا کرتی تھی۔ معلوم ہوا ہے کہ کچھ عرصے قبل ایک ادارے کے افسر نے نورین لغاری کے والد ڈاکٹر عبدالجبار لغاری کی توجہ اس طرف دلائی تھی کہ ان کی بیٹی نورین لغاری کی سوچ انتہاپسندی کی مبنی ہے اور وہ اس حوالے سے سوشل میڈیا کا غلط استعمال کر رہی ہے۔ نورین لغاری 10 فروری کو لیاقت میڈیکل یونیورسٹی جامشورہ پہنچی اور وہاں سے ٹیکسی کرائے پر لیکر ہالانہکہ پر نجی بس اسٹاپ آئیں اور بس کے ذریعے لاہور روانہ ہوئی۔ صوبائی دارالحکومت سے گرفتار ہونے والی نورین عبدالجبار لغاری جسے ایسٹر کے روز خود کش حملہ آور کے طور پر استعمال کیا جانا تھا اسے خود کش جیکٹ استعمال کرنے کی تربیت اسکے مرحوم شوہر محمد علی نے دی جبکہ ابو فوجی عرف عظیم داعش کمانڈر پنجاب بھی اسے تربیت میں کردار ادا کرتا رہا۔ سیکورٹی ذرائع کے مطابق نورین کے دوران تفتیش انکشافات کے حوالے سے چند معلومات بتاتے ہوئے کہا کہ نورین کا شوہر ہی اسکا نظریاتی لیڈر تھا، نورین کا شوہر محمد علی مفرور داعش کمانڈر پنجاب ابوفوجی کا لاہور میں مرکزی عسکری سلیپر سیل کمانڈر تھا وہ اپنی بیوی کو خودکش حملے کے لئے نظریاتی طور پر بھی تیار کرتارہا اور اسے عسکری ٹرینگ بھی دیتا تھا ۔ نورین کو رائفل اور پستول چلانے، دستی بم پھینکنے اور خوسکش جیکٹ اڑانے اور کسی ہنگامی صورت میں دستی بم سے اپنے آپ کو اڑانے اور ریڈنگ پارٹی کو نقصان پہنچانے کا طریقہ سکھایا گیا تھا۔ سکیورٹی ذرائع کے مطابق نورین نے یہ ٹرینگ لاہور میں گھر کے اندر ہی حاصل کی جبکہ فائر کرنے کا پہلا تجربہ اسے اس وقت ہوا جب اس نے عسکری خفیہ ادارے کی آپریشن ٹیم پر گولی چلائی۔ لاہور کے داعش سلیپر سیل کی فنڈنگ کاروں کو بتایا کہ اسے تو پتا ہے کہ اسکا شوہر ہر خفیہ اداروں کے اہلکاروں پر حملے کے ارادے رکھتا تھا مگر یہ نہیں پتا تھا کہ ٹارگٹ کس لیول کا ہو گا۔ ایک سنیئر سکیورٹی آفیشل نے بتایا کہ داعش سے جڑے زیادہ ٹارگٹس کا تعلق لشکر جھنگوی سے ہے کیونکہ پنجاب میں سب سے زیادہ عسکریت پسند اسی گروپ سے تعلق رکھتے تھے۔

لاہور (خصوصی رپورٹ) محکمہ داخلہ حکومت پنجاب نے صوبہ بھر میں جلسے، جلوسوں، ی ریلیز دھرنوں، مظاہروں وغیرہ پر پابندی عائد کر دی ہے۔ پابندی کا یہ حکم ضابطہ فوجداری کی دفعہ 144 کے تحت نافذ کیا گیا ہے۔ یہ پابندی ان اجتماعات پر جن کی منظوری متعلقہ اضلاع کے ڈپٹی کمشنر سے حاصل کی گئی ہو اور وہ چار دیواری کے اندر منعقد ہوں پر لاگو نہیں ہو گی۔ پابندی کا حکم فوری طور پر نافذ العمل ہو کر ساٹھ دن تک موثر رہے گا۔ اس سلسلے میں تمام متعلقہ محکموں کو ہدایت جاری کر دی گئی ہےں۔