اسلام آباد(مانیٹرنگ ڈیسک) دبئی کے اقامہ کی پٹاری کھل گئی ہے ، سیاستدانوں کے ساتھ بیوروکریٹس کے نام بھی جلد سامنے آئیں گے، یہ انکشاف سینئر صحافی نے نجی ٹی وی سے گفتگو کرتے ہوئے کیا، انہوں نے کہا کہ وزیردفاع کا اقامہ بھی سامنے آگیا ہے ، اس سے قبل وزیراعلیٰ سندھ، وزیرداخلہ سندھ اور وزیراعظم پاکستان کا بھی دبئی کا اقامہ سامنے آچکا ہے ، ابھی قوم بہت سے مزید اقامے بھی دیکھے گی، صرف سیاستدان ہی دبئی کے اقامہ ہولڈر نہیں ہیں بہت سے بیوروکریٹس بھی خفیہ جیبوں میں اقامے چھپائے ہوئے ہیں، جو جلد منظر عام پر آنے والے ہیں۔

اسلا م آباد(صباح نیوز) ایف آئی اے کے زیر حراست سابق چیرمین ایس ای سی پی ظفر حجازی کی بیماریوں نے تفتیشی ٹیم کے لیے مشکلات کھڑی کردی ہیں جب کہ ایف آئی اے کی 2 رکنی ٹیم کو دوران تفتیش ظفرحجازی سے احتیاط برتنے کی ہدایت کی گئی ہے،نجی ٹی وی نے زرائع کا حعوالہ دیتے ہوئے کہا ہے کہ ظفر حجازی ایف آئی اے کی حوالات میں بند ہیں جب کہ افسران کی جانب سے تفتیشی ٹیم کو ان سے دوران تفتیش نرمی برتنے اور تفتیش جلد مکمل کرنے کا حکم دیا گیا ہے جس کے بعد تفتیشی ارکان بھی پریشانی کا شکار ہیں کہ قانونی تقاضے دیکھیں،افسران کی سنیں یا طبی ماہرین کی۔گزشتہ روز وزرات خزانہ نے بھی ظفر حجازی کی معطلی اور نئے چیرمین ظفر عبداللہ کی قائم قام تقرری کا نوٹی فکیشن جاری کردیا ہے جس کے مطابق ظفرحجازی کیس کا فیصلہ ہونے تک معطل رہیں گے۔

اسلام آباد (اے پی پی) تحریک انصاف کے بانی رکن اکبر ایس بابر نے کہا ہے کہ عمران خان کی جانب سے غیر ملکی فنڈنگ کیس پر سپریم کورٹ میں جو جواب جمع کرایا گیا ہے اس میں اکثر دستاویزات خود ساختہ ہیں، ایک طرف تحریک انصاف نے الیکشن کمیشن میں مسلم لیگ (ن) کے رکن کے خلاف توہین عدالت کا مقدمہ دائرکررکھا ہے اور دوسری طرف اپنی باری آنے پر انہوں نے الیکشن کمیشن کا توہین عدالت کی کارروائی کے حوالے سے دائرہ اختیار تسلیم کرنے سے انکار کردیا ہے ۔ ہندو اور یہودی کمپنیوں سے فنڈ ریزنگ کے دوران حاصل کئے گئے فنڈز کی تفصیلات امریکی محکمہ انصاف کی ویب سائٹ پر موجود ہے۔ منگل کو الیکشن کمیشن میں توہین عدالت کیس کی سماعت کے بعد میڈیا سے گفتگو کرتے ہوئے اکبر ایس بابر نے کہاکہ عمران خان نے وعدہ کرکے الیکشن کمیشن میں جواب نہیں دیا ۔ عمران خان کو الیکشن کمیشن شوکاز نوٹس جاری کرے۔ عمران خان الیکشن کمیشن سے معافی مانگے ۔ انہوں نے کہاکہ تحریک انصاف بچہ سقہ اور رنگیلا بادشاہ کے دورکے نظام کے قائل ہیں ۔ ایک طرف عمران خان کے خلاف الیکشن کمیشن میں توہین عدالت کے کیس پر ان کے وکیل کا مو¿قف ہے کہ الیکشن کمیشن کو اس کا اختیار ہی نہیں جبکہ دوسری طرف تحریک انصاف کی جانب سے مسلم لیگ (ن) کے رکن دانیال عزیز کے خلاف یہیں پر توہین عدالت کاکیس دائر کیا گیا ہے۔ انہوں نے کہاکہ فارن فنڈنگ کیس پر عمران خان کی جانب سے سپریم کورٹ میں جو جواب جمع کرایا گیا ہے اس میں خود ساختہ فہرست بنا کرپیش کی گئی ہے ۔ ہندو اور یہودی کمپنیوں سے فنڈ ریزنگ کے نام پر جمع کی گئی رقم کی تفصیلات امریکی محکمہ انصاف کی ویب سائٹ پر موجود ہے۔ اگر نواز شریف احتساب کے کٹہرے میں آسکتے ہیں تو عمران خان کیوں نہیں آسکتا ۔ عمران خان کی ہٹ دھرمی پوری تحریک انصاف کو ڈبو رہی ہے ۔ ہر روز نظریاتی کارکن ہمارے ساتھ شامل ہو رہے ہیں ۔ انہوںنے کہاکہ الیکشن کمیشن میں فنڈ ریزنگ کیس اپنے منطقی انجام کی طرف چلا گیا ہے ۔2003ءکا قانون توہین عدالت کے حوالے سے واضح ہے ۔ تحریک انصاف چاہتی ہے کہ ان کے لئے جنگل کا قانون ہو اور دوسروں پر ملکی قانون لاگو ہو ۔ انہوں نے کہاکہ تحریک انصاف کے جو ترجمان مجھ پر آج سوال اٹھا رہے تھے ان کا عمران خان کے بارے میں قبل ازیں مو¿قف یہ تھاکہ انہیں سیاست کی الف ب کا پتہ نہیں ۔ وہ بنی گالا منشیات کے عادی افراد کا اڈا قرار دیتا تھا، مفاد پرست لوگوں کو تحریک انصاف میںشامل کرنا اس سیاست کی نفی ہے جس کے لئے تحریک انصاف وجود میںآئی ۔ آج المیہ ہے کہ ایسے مفاد پرست لوگ تحریک انصاف کے ترجمان بنے بیٹھے ہیں ، ہم نے ان کالی بھیڑوںکو باہر نکالنا ہے اور عبرت کا نشان بنائیں گے جو سیاست کا کاروبار بناتے ہیں۔ انہوںنے کہاکہ عمران خان نے سعودی عرب میں فنڈ ریزنگ کی تفصیلات جمع نہیں کرائیں ۔ عمران خان الیکشن کمیشن کو اکاﺅٹس کے فرانزک آڈٹ کا جواب دے ۔ تحریک انصاف نے ایک بھی بینک سٹیٹمنٹ جمع نہیں کرائی ۔ جعلی اکاﺅنٹس کھول کر اس میںپیسے رکھے گئے ہیں۔

اسلام آباد (مانیٹرنگ ڈیسک) پیپلزپارٹی کے رہنما آیت اللہ درانی نے بتایا میں ایک سیاسی کارکن ہوں اوراپنی پارٹی میں ہی خوش ہوں چینل ۵ کے پروگرام نیوز ایٹ 8میں گفتگو کرتے ہوئے انہوں نے کہا کہ دہشت گردی کے خلاف سیاستدانوں اور فوج کو مل کر کام کرنے کی ضرورت ہے۔ کیونکہ دہشت گردی میں معصوم لوگ جان سے جاتے ہیں دھماکہ لاہور میں ہو یا کابل میں اس پر افسوس ہوتا ہے پنجاب میں آپریشن ہونا چاہیے پاکستان کو مضبوط خارجہ پالیسی کی ضرورت ہے انہوں نے کہا پانامہ کے معاملے پر شواہد کی بنیاد پر سپریم کورٹ کے فیصلے کے اثرات صدیوں تک رہیں گے۔ ماہر قانون احمد رضا قصوری نے کہا کہ ملک میں پانامہ کا شور مچا ہوا ہے اور سب کوفیصلے کا انتظار ہے نوازشریف کو جس طرح تذلیل ہورہی ہے انہیں تو استعفیٰ دے دینا چاہیے لیکن یہ نسلوں کا معاملہ ہےجس کے باعث وہ اقتدار سے چمٹے ہوئے ہیں دو ججوں نے وزیراعظم کے خلاف فیصلہ دیدیا اگر ایک اور جج نے بھی خلاف فیصلہ دیا تو نوازشریف نااہل ہوجائیں گے۔

اسلام آباد (اے پی پی) پارلیمنٹ کی پبلک اکاﺅنٹس کمیٹی نے پیپلز ورکس پروگرام کے تحت منصوبوں کی غلط پیمائش اور کام مکمل ہونے سے قبل ادائیگیوں پر تشویش کا اظہار کرتے ہوئے وزارت ہاﺅسنگ کو ہدایت کی ہے کہ ” تھرڈ پارٹی” کے ذریعے اس کی چھان بین مکمل کرکے پی اے سی کو رپورٹ پیش کی جائے۔ اجلاس منگل کو پی اے سی کے چیئرمین سید خورشید احمد شاہ کی زیر صدارت منعقد ہوا جس میں کمیٹی کے ارکان شیخ روحیل، ارشد خان لغاری، جنید انوار چوہدری، محمود خان اچکزئی، راجہ جاوید اخلاص، سردار عاشق گوپانگ، سید نوید قمر، شاہدہ اختر علی، ڈاکٹر عارف علوی، سینیٹر اعظم سواتی، میاں عبدالمنان ، پرویز ملک، سید نوید قمر، خالد مقبول صدیقی، سینیٹر تنویر خان، ڈاکٹر درشن کے علاوہ متعلقہ سرکاری اداروں کے اعلیٰ حکام نے شرکت کی۔ اجلاس میں وزارت ہاﺅسنگ و تعمیرات کے آڈٹ اعتراضات کا جائزہ لیا گیا۔ سیکرٹری ہاﺅسنگ نے ٹھلیاں ہاﺅسنگ سکیم کے حوالے سے بریفنگ دینا تھی مگر کمیٹی کے رکن سردار عاشق گوپانگ نے کہاکہ ان کی سربراہی میں ایک ذیلی قائمہ کمیٹی کو پہلے اس معاملے کا تفصیلی جائزہ لینے دیا جائے۔ پی اے سی کے چیئرمین خورشید شاہ نے ان کی اس تجویز سے اتفاق کیا اور کہاکہ ہمیں اس پر کوئی اعتراض نہیں ۔پہلی ذیلی کمیٹی اس معاملے کا تفصیلی جائزہ لے، اس کے بعد مرکزی پی اے سی وزارت ہاﺅسنگ و تعمیرات کے 2013-14ءکے آڈٹ اعتراضات کے جائزے کے دوران آڈٹ حکام نے پی اے سی کو بتایاکہ ضلع چکوال میں شاہراہ کی تعمیر کی بولی میں ٹمپرنگ سے سرکاری خزانے کو 5کروڑ 95لاکھ کا نقصان نہیں پہنچایا گیا۔ سیکرٹری ہاﺅسنگ شاہ رخ ارباب نے بتایا کہ اس میں ملوث افراد ریٹائر ہوگئے ہیں۔ ایف آئی اے حکام کو ہدایت کی گئی کہ ملوث افراد کے نام ای سی ایل پر ڈالے جائیں۔ پی اے سی کے چیئرمین نے ہدایت کی کہ ایکسیئن شاہ جہاں اور اکاﺅنٹس آفیسر شکیل کی پنشن روک دی جائے اور تحقیقات مکمل کی جائیں۔ آڈٹ حکام نے پی اے سی کو بتایا کہ ملتان، اسلام آباد، گوجرانوالہ، سکھر، نوشہرہ، پشاور اور لاہور ڈویژنوں میں مختلف سکیموں کی غلط پیمائش سے خزانے کو 32 کروڑ روپے سے زائد کا نقصان پہنچایا گیا۔ ادائیگی کے لئے مقررہ 90 سے 180 دنوں کی بجائے 3 سے 30 دنوں میں ادائیگی کی گئی۔ پاک پی ڈبلیو ڈی کی طرف سے بتایا گیا کہ یہ بات درست ہے کہ کام کی پیمائش پہلے کی گئی اور کام بعد میں مکمل ہوا۔ ہم نے واقع کی تحقیقات کا حکم دے دیا ہے۔ ڈاکٹر عارف علوی نے کہا کہ تین دنوں میں ادائیگی مجرمانہ فعل ہے۔ میاں عبدالمنان نے کہا کہ پی اے سی ذیلی کمیٹی بنا کر ان منصوبوں کا موقع پر جا کر جائزہ لے۔ سردار عاشق حسین گوپانگ نے کہا کہ جو لوگ اس میں ملوث تھے ان کے خلاف کارروائی کی گئی۔ سیکرٹری ہاﺅسنگ شاہ رخ ارباب نے پی اے سی کے استفسار پر بتایا کہ اگر ہم سے تحقیقات کی اجازت طلب کی گئی تو ہم اس کی اجازت دے دیں گے۔ شاہدہ اختر علی نے کہا کہ اس کیس میں سپریم کورٹ کے متعلقہ احکامات پر بھی عملدرآمد نہیں کیا گیا۔ سیکرٹری نے کہا کہ وزارت کی طرف سے چارج شیٹ جاری کی گئی ہے اور تحقیقاتی کارروائی شروع ہے۔ راجہ جاوید اخلاص نے کہا کہ پیپلز ورکس پروگرام کی سکیموں میں 5سے 7 ارب روپے کی خورد برد کی گئی ہے۔ ہمارے علاقوں میں کام بند پڑے ہیں جبکہ ادائیگیاں ہو چکی ہیں۔ کوئی ایسا طریقہ کار اختیار کیا جائے تاکہ وہ کام مکمل ہوسکیں۔ سیکرٹری ہاﺅسنگ شاہ رخ ارباب نے کہا کہ ہم اس کی چھان بین کرکے ایکشن لے رہے ہیں۔ سید خورشید احمد شاہ نے کہا کہ تیسرے فریق سے ان معاملات کی چھان بین کرا کے ہمیں رپورٹ پیش کی جائے۔ انہوں نے کہا کہ چار سال گزر گئے ہیں مگر تاحال تاخیری حربے استعمال کئے جا رہے ہیں۔ اتنے بڑے نقصانات پر پاک پی ڈبلیو ڈی کو بند ہونا چاہیے۔ جن لوگوں نے فراڈ کئے ہیں ان کے خلاف کارروائی ہوگی۔ پی اے سی نے ہدایت کی تھرڈ پارٹی تحقیقات کرا کے رپورٹ پیش کی جائے۔