افغانستان میں بھارتی فوجی اڈے , اہم انکشاف

اکوڑہ خٹک (نمائندہ خبریں) جمعیت علماءاسلام کے امیر اور دفاع پاکستان کونسل کے چیئرمین مولانا سمیع الحق نے کہا ہے کہ امریکہ پاکستان کا نہیں بھارت کا اتحادی ہے۔ افغانستان میں بھارتی فوج اور ایجنسیوں کو اڈے فراہم کر کے ملک میں دہشت گردی اور فتنہ و فساد پھیلانے کی کوشش کی جا رہی ہیں امریکہ کی بھارت کو خطہ کی تھانیدار بنانے کی کوششوں کی ہر سطح پر مزاحمت کی جائے گی۔ حکومت اور فوج امریکہ کو منہ توڑ جواب دیں۔ پاکستانی قوم کسی قسم کی قربانی سے دریغ نہیں کرے گی۔ ان خیالات کا اظہار انہوں نے اکوڑہ خٹک میں امریکی صدر کے خلاف احتجاجی مظاہرہ سے خطاب کرتے ہوئے کہا۔ واضح رہے کہ آج جمعہ کے بعد پورے ملک میں دفاع پاکستان کونسل کے چیئرمین مولانا سمیع الحق اور دیگر قائدین کی اپیل پر ڈونلڈ ٹرمپ کے پاکستان پر الزامات کے خلاف احتجاجی مظاہرے ہوئے۔ مولانا سمیع الحق نے کہا کہ امریکہ مزید جتنی فوج بھیج سکتا ہے بھیج دیں لیکن شکست ان کا مقدر ہے۔ افغانستان میں اپنی شکست کو چھپانے کیلئے امریکہ پاکستان پر بے بنیاد الزامات لگا رہا ہے۔ مولانا سمیع الحق نے کہا کہ اس ساری صورتحال کی ذمہ دار امریکہ کی غلامی قبول کرنے والے حکمران ہیں انہوں نے ملک سے غداری کی جس کا خمیازہ اب ملک بھگت رہا ہے پرویز مشرف سے لیکر نواز شریف تک سب پر قومی و ملکی غداری کا مقدمہ چلنا چاہیے۔ امریکہ کو بتلایا جائے کہ افغانستان میںمزید فوج بھیجنے کی صورت میں زمینی اور ہوائی سہولتیں قطعاً نہیں دی جائی گی۔ جمعیت کے مرکزی سیکرٹریٹ میں موصولہ اطلاعات کے مطابق لاہور، گجرانوالہ اور فیصل آباد میں مظاہرے سے خطاب کرتے ہوئے جمعیت کے سرپرست میاں محمد اجمل قادری، مولانا عبدالروﺅف فاروقی، مولانا احمد علی ثانی، عاصم مخدوم، مولانا ایوب خان ثاقب، مولانا شبیر احمد عثمانی، مولانا خلیل الرحمن انوری نے کہا کہ نام نہاد دہشت گردی کے خلاف جنگ میں 80ہزار جانوں کا نذرانہ پیش کرنے کے باوجود پاکستان کے خلاف الزامات حکومت کی سفارتی ناکامی ہے۔ خانیوال، رحیم یار خان، خانپور، راجن پور، ملتان، بہاولپور میں مظاہروں سے جمعیت کے رہنماﺅں مفتی حبیب الرحمان درخواستی، مفتی ارشاد احمد، مولانا محمد احمد محمودی، مولانا قاضی خلیل الرحمان، مفتی ممتاز احمد، مفتی خالد محمود اظہر، مولانا عبدالکریم نعمانی، عبدالصمد درخواستی نے کہا کہ امریکہ، پاکستان اور افغانستان کو باہم لڑا کر دونوں برادر اسلامی ملکوں کے عوام میں پائے جانے والی بھائی چارے کے رشتے کوختم کرنا چاہتا ہے۔ مزید فوج بھیج کر بھی امریکہ اپنے مذموم مقاصد میں کامیاب نہیں ہو سکے گا۔ افغان عوام اپنی سر زمین پر امریکی قبضہ کسی صورت میں برداشت کرنے کیلئے تیار نہیں ہیں۔ اکوڑہ خٹک میں مرکزی نائب امیر مولانا حامد الحق حقانی، مولانا عرفان الحق، مولانا رشید احمد سواتی، پشاور میں صوبائی امیر مولانا سید محمد یوسف شاہ، مولانا عبدالحسیب حقانی، حافظ سعید الرحمان اور دیگر نے مظاہرہ سے خطاب کرتے ہوئے کہا کہ پاکستان کو داخلی عدم استحکام کے علاوہ عالمی اسلام دشمن قوتوں کے خطرناک عزائم کا سامنا ہے پاکستان میں دہشت گرد تنظیموں کی موجودگی کا پروپیگنڈا امریکہ کی سرپرستی میں خطہ میں کی جانے والی اپنی دہشت گردی کو ناکام بنانے کی کوشش ہے۔ کراچی میں مفتی احمدالرحمان یار خان، حافظ احمد علی، مفتی حماد مدنی، حیدر آباد میں عبدالواحد سواتی، حافظ ارمان چوہان، کوئٹہ میں مفتی عبدالواحد بنوں، ٹانک اور کرک میں مفتی اسلام نور حقانی، مولانا عبدالحئی، مولانا حبیب اللہ حقانی، محمد عثمان دوتانی، حافظ میر محمد، مولانا سیف الدین، مولانا سبز علی اور دیگر شہروں میں جمعیت کے رہنماﺅں نے کہا کہ دہشت گردی کا تو صرف بہانا ہے۔ امریکہ اور بھارت کا اصل ہدف سی پیک کو نقصان پہنچانا ہے۔ پاکستان نے امریکی جنگ میں 120 ارب ڈالر سے زیادہ نقصان اٹھایا۔ امریکی دھمکیوں کے خلاف رائے عامہ ہموار کرنے کیلئے ملک گیر سطح پر بھرپور مہم چلائی جائے گی۔