پنجاب کے خطر ناک قیدیوں نے کمپیوٹرائزڈ روبکاروں کا توڑ ڈھونڈ لیا،24فرار

لاہور (خصوصی رپورٹ)پنجاب کے خطرناک قیدیوں نے کمپیوٹرائزڈ روبکاروں کا بھی توڑ کرلیا۔رواں برس پنجاب کی مختلف جیلوں سے کمپیوٹرائزڈ روبکاروںکے اجراءکے باوجود 24قیدی جعلی روبکاروں پر ضمانتیں کروا کر فرار ہونے میں کامیاب ہوچکے ہیں۔ جعلی روبکاروں پر ضمانت پر رہائی پانے والے قیدیوں میں لاہور، سیالکوٹ، شیخوپورہ اور فیصل آباد سمیت مختلف جیلوں کے قیدی شامل ہیں۔ جعلی روبکاریں بنانے میں جیلوں کے اہلکاروں ، کمپیوٹرآپریٹرز اور بخشی خانوں پر ڈیوٹی دینے والے اہلکاروں نے بھی اہم کردار ادا کیا ہے۔ صوبائی دارالحکومت سمیت صوبے بھر کی جیلوں سے جعلی روبکاروں پر قیدیوں کو رہا کروانے کا معاملہ شدت اختیار کرگیا۔ ذرائع کا کہنا ہے کہ جیلوں میں خطرناک قیدی، دہشت گرد اور معمولی جرائم میں ملوث افراد قید ہیں، وکلائ، عدالتی عملہ، جیل انتظامیہ اور پولیس اہلکاروں کی ملی بھگت سے جیلوں سے آئے روز جعلی روبکاریں بنوا کر قیدیوں کو رہائی دلوائی جارہی ہے۔ آئی جی پنجاب جیل خانہ جات، ڈی آئی جیز جیل خانہ جات اور مختلف جیلوں کے سپرنٹنڈنٹس بھی جعلی روبکاریں بنانے والے گروہ کے کارناموں سے چکرا گئے۔