دبئی: (ویب ڈیسک) ٹیسٹ رینکنگ میں پاکستان کی ساتویں پوزیشن برقرار ہے جبکہ بیٹنگ میں اظہر علی ٹاپ 10 میں موجود ہیں،زمبابوے سے ٹیسٹ سیریز جیتنے پر ویسٹ انڈین پلیئرز نے نمایاں بہتری حاصل کرلی جبکہ میزبان ٹیم میں شامل پاکستانی نژاد سکندر رضا نے بیٹنگ اور بولنگ میں بڑی چھلانگیں لگالیں۔ تفصیلات کے مطابق آئی سی سی کی جاری کردہ نئی ٹیسٹ رینکنگ میں پاکستان نے ساتویں پوزیشن برقرار رکھی،اظہر علی ٹاپ10 میں ملک کی نمائندگی جاری رکھے ہوئے ہیں، بھارت بدستور پہلے، جنوبی افریقہ دوسرے، انگلینڈ تیسرے، نیوزی لینڈ چوتھے، آسٹریلیا پانچویں اورسری لنکا چھٹے نمبر پر ہیں، ویسٹ انڈیز نے 75 پوائنٹس کے ساتھ آٹھویں پوزیشن بچائے رکھی، زمبابوے کو 2 ریٹنگ پوائنٹ ملنے پر ٹاپ 10 میں جگہ مل گئی، بیٹنگ میں ٹاپ 5 پوزیشنز میں کوئی تغیر رونما نہیں ہوا، اس پر حسب سابق اسٹیون اسمتھ، جوئے روٹ، کین ولیمسن، چتشور پجارا اور راہول ڈریوڈ شامل ہیں، کوہلی چھٹے، ہاشم آملا ساتویں، لوکیش راہول آٹھویں، اجنکیا راہنے نویں اور اظہر علی دسویں نمبر پر ہیں۔زمبابوے سے دوسرے ٹیسٹ میں سنچریاں داغنے والے کپتان جیسن ہولڈر اور شین ڈوریچ نے بھی ترقی کی منازل طے کیں، ہولڈر5 درجے بہتری ملنے پر 57 ویں نمبر پر آگئے، ڈوریچ نے17 سیڑھیاں طے کرکے 83 ویں پوزیشن پالی،اوپنر کیرین پاول نے 63ویں پوزیشن پائی، انھیں 5 درجے بہتری ملی، ناکام سائیڈ کے ہیملٹن مساکیڈزا 8 درجے ترقی پانے پر41ویں نمبر پر آگئے،پاکستانی نژاد بیٹسمین سکندر رضا نے 12 درجے ترقی پاکر کیریئر بیسٹ 44 ویں پوزیشن پائی، پیٹر مور بھی 77ویں نمبر پر آگئے، انھیں 18 درجے ترقی ملی، ریگس چاکابوا 9 درجے بہتری پر 93ویںنمبر پر پہنچ گئے۔
بولنگ میں شینن گیبرئیل نے ٹاپ 20 میں واپسی اختیار کرلی، 5 درجے ترقی نے انھیں 20 ویں پوزیشن پر پہنچادیا، کیمار روئچ بھی ترقی کے 4 زینے طے کرکے 23ویں نمبرکے حقدار بن گئے، سکند رضا نے 24 درجے کی چھلانگ لگاکر83ویں پوزیشن پائی، جیمز اینڈرسن سرفہرست ہیں، رویندرا جڈیجا نے دوسری پوزیشن سنبھالے رکھی،کیگاسو ربادا تیسرے، ایشون چوتھے اور ہیراتھ پانچویں درجے پر ہیں، ٹاپ 5آل رائونڈرز میں شکیب الحسن، رویندراجڈیجا، ایشون،بین اسٹوکس اور معین علی شامل ہیں۔
