لاہور‘ میرپور‘ پشاور‘ فیصل آباد‘ گوجرانوالہ‘ راولپنڈی‘ کراچی (مانیٹرنگ ڈیسک) تحریک لبیک کے دھرنے کے باعث ملک بھر میں ٹرانسپورٹ کا پہیہ جام‘ پٹرول پمپس میں تیل کی شدید قلت‘ مارکیٹیں بند‘ سکول و کالج اور یونیورسٹیاں 2روز کیلئے بند‘ ہسپتالوں میں ایمرجنسی لگا دی گئی۔ لاہور سمیت ملک بھر میں اہم قومی عمارتوں کو پولیس اور سکیورٹی اداروں نے حصار میں لے رکھا ہے۔ اگرچہ حکومت اور دھرنا جماعت کے درمیان معاہدہ طے پا گیا ہے مگر خوف و ہراس کی فضا پھر بھی برقرار ہے۔ درہم برہم نظام زندگی کی بحالی میں ابھی چند روز لگیں گے۔ تفصیلات کے مطابق تحریک لبیک یا رسول اللہ کے دھرنوں کے نتیجے میں کئی شہروں میں پٹرول‘ ڈیزل کی شدید قلت پیدا ہو گئی ہے جبکہ ٹرینیں اور موٹروے کو بند کر دیا گیا ہے۔ اسلام آباد میں کشیدگی کے باعث 2چیک پوسٹوں‘ 3گاڑیوں‘ 5موٹرسائیکلوں کو نذرآتش کر دیا گیا جس پر آج تاجروں نے مکمل شٹر ڈاﺅن جبکہ ٹرانسپورٹروں نے مکمل پہیہ جام ہڑتال کا اعلان کیا۔ مجلس وحدت المسلمین نے سنی تحریک‘ لبیک یا رسول اللہ‘ سجادہ نشینوں‘ مشائخ عظام‘ جماعت اہلسنت کی اپیل پر ہڑتال کی مکمل حمایت کرتے ہوئے کہا کہ مجلس تحریک ختم نبوت کے معاملے پر دھرنے والوں کے ساتھ ہے اور کٹ مرنے سے گریز نہیں کرے گی۔ نمائندگان ”نیااخبار“ کے مطابق ملک بھر میں بڑے بڑے کاروباری مراکز بند رہیں گے جبکہ ٹرانپورٹ کے اڈوں پر بھی گاڑیاں دوسرے شہروں کو روانہ نہ ہو سکیں۔ علاوہ ازیں دھرنوں کے باعث راستے بندہونے سے ہمدر دایجوکیشن سسٹم ماڈل ٹاﺅن،گرینڈ چارٹرڈ سکول ماڈل ٹاﺅن لنک روڈ اوربحریہ میڈیکل کالج کے سینکڑوں بچے شاہدرہ اور شیخوپورہ انٹر چینج پر پھنس گئے ۔ گارڈن شاہدرہ کے مقام پر گاڑیوں میں محصورششم سے دہم تک کے طالبعلم 3روز سے راستے کھلنے کی امید پر سردی میں ٹھٹھر رہے ہیں۔تفصیلات کے مطابق ہمدرد ایجوکیشن سسٹم ماڈل ٹاﺅن کے 300سے زائد بچے 4روز قبل سیر کیلئے کلر کہار گئے تھے ، واپسی پر احتجاج کے باعث لاہور گارڈن شاہدرہ کے مقام پر تین روز سے گاڑیوں میں محصور ہیں اور سردی کے ساتھ بے آرامی اور ناقص خوراک کے باعث بیماریوں میں مبتلا ہور ہے ہیں ۔ گزشتہ دنوں 20سے 25بچوں کو ان کے والدین کسی نہ کسی طرح سے وہاں سے نکالنے میں کامیاب ہو گئے جبکہ گزشتہ رات چند بچوں کو ریسکیو1122کی ایمبولینس میں لٹا کر شہر کی حدود میں داخل کیا گیا۔بچوں کے ساتھ10مرد اور 10خواتین اساتذہ بھی ہیں۔بچوں کے والدین نے حکام سے اپیل کی ہے کہ بچوں کی گھروں کو بحفاظت واپسی کیلئے فوری اقدامات کیے جائیں۔دریں اثنا گرینڈ چارٹرڈ سکول ماڈل ٹاﺅن لنک روڈ کے 70بچے 3روز قبل اساتذہ کے ساتھ کھیوڑہ مائن کے معلوماتی دورے پر گئے تھے لیکن واپسی پر راستے بند ہونے کے باعث شیخوپورہ انٹر چینج پر پھنس کر رہ گئے ۔ بحریہ میڈیکل کالج کے 200کے قریب طلبہ بھی شیخوپورہ انٹر چینج پر راستے کھلنے کے منتظر ہیں۔دوسری طرف جی سی یونیورسٹی لاہور کے 150سے زائد طلبہ و طالبات تین بسوں پر مطالعاتی دورے پر کلر کہار،کھیوڑہ، سالٹ مائنز گئے تھے اوردوروز سے سکھیکی میں پھنسے ہوئے تھے جنہیں گزشتہ روز شیخوپورہ ضلعی انتظامیہ نے سکھیکی منڈی سے ریسکیو کر کے شیخوپورہ سرکاری ریسٹ ہاﺅس منتقل کیا ، متعدد طالبات کو طبیعت ناساز ہونے پر ڈی ایچ کیو ہسپتال سے ابتدائی طبی امداد بھی دی گئی۔
ملک گیر،پہیہ جام ،شٹر ڈاﺅن ہڑتال،تعلیمی ادارے بند
