اسلام آباد( اشفاق ساجد) معلوم ہوا ہے کہ سابق وزیر خزانہ سنیٹر اسحاق ڈار نے وزیرمملکت انوشہ رحمان کی وزارت کو بچانے کےلئے کوششیں تیز کر دی ہیں ،زرائع کے مطابق انتخابی اصلاحاتی بل ہیں ختم نبوت کے حلف ناموں میں تبدیلی میں مبینہ طور پر ملوث انوشہ رحمان کو بچانے کےلئے راجہ ظفر الحق سے لندن سے گزشتہ ایک ہفتہ کے دوران تین بار ٹیلی فوننک رابطہ کیا ہے انتہائی اہم زرائع نے بتایا ہے کہ اسحاق ڈار نے کمیٹی کے چئیر مین راجہ ظفر الحق سے رابطہ کر کے انہیں التجاءکی ہے کہ اپنی رپورٹ میں انوشہ رحمان کو زاہد حامد کے ساتھ حلف ناموں میں تبدیلی میں ملوث نہ کیا جائے اور کسی طرح اسے اس سے بری الذمہ قراردے دیا جائے ۔زرائع کا دعوی ہے کہ راجہ ظفر الحق نے اسحاق ڈار کو صاف انکار کر دیا ہے اور کہا ہے کہ وہ کسی صورت اپنے موقف سے پیچھے نہیں ہٹھیں گے اور اپنی رپورٹ کو انتہائی دیانتداری سے حتمی شکل دیں گے اسی زرائع نے خبریں کو بتایا کہ راجہ ظفر الحق کی رپورٹ میں زاحد حامد اور انوشہ رحمان کو مذکورہ بالا حلف ناموں میں تبدیلی کا ذمہ دار ٹھرایا گیا ہے اسی بنا پر اسحاق ڈار نے راجہ ظفر الحق سے رابطہ کر کے انوشہ رحمان کو بے گناہ قرار دینے کی التجا کی ہے جسے راجہ ظفر الحق نے مسترد کر دیا ہے۔
