پاکستان میں عدالتی نظام کو بہت اہمیت کی نگاہ سے دیکھا جاتا ہے اور کسی بھی ملک کا عدالتی نظام اس ملک کی ریڑھ کی ہڈی تصور کیا جاتا ہے ۔ آج پاکستان کے چیف جسٹس کی جانب سے ایک بیان منظر عام پر آیا جس میں انہوں نے پنجاب گورنمنٹ کو آڑے ہاتھوں لیتے ہوئے حکومت پنجاب کی کارکردگی پر عدم اعتماد کا اظہار کرتے ہوئے کہا کہ حکومت پنجاب اپنی کارکردگی پر توجہ برتے ۔۔نیز یہ کہ آپ نے سب کچھ پرائیویٹ سیکٹر کے حوالے کر دیا۔یہ بیان سرکاری یا عدالتی حیثیت کا کم اور ذاتی نوعیت کا زیادہ لگا کیونکہ پنجاب کے مختلف شعبوں میں جاری کاموں اور ترقیاتی منصوبوں کی مثال دنیا دے رہی ہے۔ وزیر اعلیٰ شہباز شریف کی کارکردگی کو پاکستان سمیت بین الاقوامی سطح پر کافی سراہا جا رہا ہے اور حکومت پنجاب کی کاوشوں کو بے انتہا پسند کیا گیا ہے۔شہباز شریف کے ویژن کو باقی ترقی پزیر ممالک کے حکمرانوں کے لئے ایک کامیاب مثال کے طور پر گردانا جا رہا ہے۔۔ ترقیاتی کاموں کا اتنی شفافیت اور کم وقت میں ہونا کسی معجزے سے کم نہیں۔۔ ابھی چندروز قبل وزیر اعلیٰ پنجاب محمد شہباز شریف کی جانب سے1ارب روپے کی لاگت سے تعمیر ہونیوالے ملکی تاریخ میں اپنی نوعیت کے پہلے اور جدید ترین منصوبے ’’پنجاب کڈنی اینڈ لیور انسٹیٹیوٹ ‘‘کا افتتاح کیا گیا۔پاکستان سمیت دنیا بھر سے تعلق رکھنے والے افراد اور ڈاکٹرز کی جانب سے بھی خادم پنجاب کی اس کاوش کو بے پناہ پسند کیا گیا۔۔ بین الاقوامی معیار کے ڈاکٹروں کو اس ہسپتال میں بھرتی کرنے کا مقصد اتنا ہے کہ ہمارے یہاں کے لوگوں کو علاج کی غرض سے بیرون ممالک نہ جانا پڑے اور پوری دنیا سے اپنے اپنے شعبے کے ماہر ڈاکٹروں کو اس ہسپتال میں بھرتی کرنا ہمارے لئے کسی اعزاز سے کم نہیں ہونا چاہئے ہم اگر تجربے اور مہارت کو صرف پیسوں کی بنیاد پر تولتے رہے تو کبھی بھی آگے نہیں بڑھ پائیں گے۔ اور جو بھی ڈاکٹر حضرات بیرون ملک میں ملین روپوں کی نوکری اور عیش و عشرت کی زندگی چھوڑ کرخادم پنجاب کے اس مشن کو آگے بڑھانے کے لیے پاکستان پہنچے ہیں، چیف جسٹس کا یہ بیان کیا ان کی پیشہ ورانہ خدمات اور حب الوطنی کی تذلیل نہیں!
