لاہور (مانیٹرنگ ڈیسک) چینل ۵ کے تجزیوں اور تبصروں پر مشتمل پروگرام ”کالم نگار“ میں گفتگو کرتے ہوئے سینئر صحافی اور کالم نگار توصیف احمد خان نے کہا ہے کہ حکومت نے جو ایمنسٹی سکیم دی ہے اس میں بہت سقم ہیں۔ بھارت میں اب تک 11 ایمنسٹی سکیمیں اور بنگلہ دیش بھی 10 سکیمیں دے چکا ہے۔ تاہم وہ دونوں ملک جان چکے ہیں کہ ان کا کوئی فائدہ نہیں ہوگا۔ چیف جسٹس نے بروقت الیکشن کی یقین دہانی کرائی ہے۔ دعا کریں کہ ایسا ہی ہو۔ حکومت کا جو خیال ہے کہ ایمنسٹی سکیم سے اسے 6 ارب ڈالر ملیں گے غلط ثابت ہوگا۔ لیگی قائدین کو عدالت کے فیصلے تسلیم کرنے چاہئیں۔ کشمیر کمیٹی کا چیئرمین جس شخصیت کو بنایا گیا ان کے بزرگ قیام پاکستان کے ہی مخالف تھے۔ کشمیر میں استصواب رائے کی تجویز خود بھارت نے دی تھی۔ بھارتی آئین کے مطابق کشمیر کبھی اس کا حصہ نہیں بن سکتا۔ پاکستان کو پورے خلوص کے ساتھ مسئلہ کشمیر کا حل تلاش کرنا چاہئے۔ سلمان خان کو تو سزا سنا دی لیکن جو اس کے ساتھ جرم میں شامل تھے چھوڑ دیا گیا۔سینئر کالم نگار اعجاز حفیظ خان نے کہا کہ لیگی حکومت ماضی میں بھی ایمنسٹی سکیمیں دیتی رہی ہے جو ناکام ہوئیں۔ حالیہ ایمنسٹی سکیم کا ن لیگ کو الیکشن میں نقصان ہوگا۔ سکیم اناﺅنس ہونے سے اب تک ایک بھی شخص ایسا نہیں ملا جس نے اس کی تعریف کی ہو۔ عوام اور اشرافیہ میں فاصلہ بڑھتا جارہا ہے۔ چیف جسٹس نے اہم بات کی کہ جان بوجھ کر مارشل لا کی باتیں پھیلائی جارہی ہیں۔ شریر حکومت نے حلقہ بندیوں میں بھی شرارت کی ہے۔ اس وقت چیف جسٹس کا طوطی بول رہا ہے اور باقیوں کے طوطے اڑے ہوئے ہیں۔ عدالتوں کے فیصلے نہ مانے گئے تو پھر فیصلے وہاں سے آئیں گے جو صرف پریس ریلیز بھیجتے ہیں۔ کشمیر کے حوالے سے ساری بھارتی لیڈر شپ کی سوچ ایک ہے۔ تاہم بدقسمتی سے ہمارے ہاں ایسا معاملہ نظر نہیں آتا۔ حکومت نے جس کو نوازنا ہے اسے کشمیر کمیٹی کا چیئرمین بنا دیتی ہے۔سلمان خان کو غیرقانونی اقدام پر سزا ملی ہے جو ٹھیک ہے۔سینئر صحافی خالد فاروقی نے کہا کہ ایمنسٹی سکیم حکومت کی ناکامی کا منہ بولتا ثبوت ہے۔ کالے دھن کو سفید کرنے کی پیشکش کی گئی ہے اور وائٹ کالر کرائم کا راستہ کھولا گیا ہے۔ سکیم میں خامیاں زیادہ اور خوبیاں کم دکھائی دے رہی ہیں۔ ملک کے زرمبادلہ کے ذخائر خطرناک حد تک کم ہوچکے ہیں جس کی وجہ بے دریغ بنائے جانے والے بڑے منصوبے ہیں۔ بھارتی شرح سود بانڈ جاری کرکے معیشت کو برباد کیا گیا۔ ایمنسٹی سکیم کو سینٹ میں چیلنج کیا جائیگا۔ الیکشن اپنے مقررہ وقت پر ہوجائیں گے۔ حلقہ بندی کا ایشو آڑے نہیں آئے گا۔ بھارت کشمیر پہ مذاکرات کرنا ہی نہیں چاہتا۔ پاکستان کے تمام دوست ممالک سے لابنگ کرکے یو این میں ایک مشترکہ قرارداد پیش کرنی چاہئے اس سے بھارت پر دباﺅ پڑے گا بدقسمتی سے ہمارے حکمرانوں کی ترجیحات میں ہی مسئلہ کشمیر یا عوام کی خوشحالی شامل نہیں ہے۔ انہیں صرف اپنے مفادات کا تحفظ عزیز ہے اداکار سلمان خان کو قانون کے مطابق سزا سنائی گئی۔تجزیہ کار ثروت روبینہ نے کہا کہ ایمنسٹی سکیم کو سیاسی جماعتوں خصوصاً جماعت اسلامی کو چیلنج کرنا چاہئے۔ ہماری مڈل کلاس جو ٹیکس دیتی ہے وہ کہاں خرچ کیا جارہا ہے۔ چیف جسٹس نے مارشل لا کی بات کیوں کی ہے کیا ملک میں کوئی مارشل لا پھر راستہ بنا رہا ہے۔ کشمیر میں بھارت نے ظلم و بربریت کا کھیل رچا رکھا ہے۔ مولانا فضل الرحمان کو کشمیر کمیٹی کا چیئرمین بنانے کا کیاجواز ہے آج تک انہوں نے مسئلہ کشمیرکے حوالے سے کیا خدمات انجام دی ہیں۔ مسئلہ کشمیر کو جہاد سے ہٹ کر حل کرنا ہوگا۔ یہ ایک قوم کی آزادی کا مسئلہ ہے اپنے بچوں کو قربان کرنے والی بہادر کشمیری ماﺅں کو سلام پیش کرتی ہوں۔ سلمان خان بڑے اچھے اداکار ہیں ان سے غلطی ہوگئی ہے اتنی سخت سزا دینے کی ضرورت نہیں تھی۔
