سٹاک ہوم (نیٹ نیوز) سویڈن کے ماہرین نے ایک خاص گوند ایجاد کی ہے جو صرف 5 منٹ میں ٹوٹی ہڈی اور فریکچر کو جوڑ سکتی ہے۔ اس عمل میں کوئی تکلیف بھی نہیں ہوتی ہم جانتے ہیں کہ دندان ساز ٹوٹے ہوئے دانتوں کو جوڑنے کیلئے خاص قسم کے مصالحے ایک عرصے سے استعمال کررہے ہیں جنہیں بونڈنگ کہا جاتا ہے اسی بنا پر ماہرین نے خیال کیا کہ جس طرح ٹوٹے دانتوں کو جوڑا جاسکتا ہے عین اسی طرح جسم کی ٹوٹی ہڈیوں اور ان کے فریکچرز بھی دور کیے جاسکتے ہیں لیکن لاکھ کوششوں کے باوجود ایسا کوئی میٹریل بنانے میں کامیابی نہیں مل رہی تھی کیونکہ وہ جسم کے اندرونی نظام کے لحاظ سے نہ تھا ۔ اب حال ہی میں سویڈن کے کے ٹی ایچ رائل انسٹیٹیوٹ آف ٹیکنالوجی نے ایسی حیاتیاتی گوند تیار کرنے کا دعوی کیا ہے جو ان تمام خطرات سے پاک ہے ۔ اس گوند میں عین وہی خواص ہیں جو دانتوں کو جوڑنے یا انہیں منہ میں لگانے والے گوند کے ہوتے ہیں۔
