لاہور (مانیٹرنگ ڈیسک) کالم نگار مریم ارشد نے کہا کہ اورنج لائن کے باعث لاہور کا حسن تباہ ہوگیا۔ ارفع کریم ٹاور کے قریب سبزی منڈی ختم کردی گئی۔ چینل ۵ کے پروگرام کالم نگار میں گفتگو کرتے ہوئے انہوں نے کہا اورنج لائن ٹرین میں کرپشن کی گئی۔ راوی میں کبھی ڈولفن پائی جاتی تھی آج اس کا کیا حال ہے۔ انہوں نے کہا کہ آئی ایم ایف اپنی شرائط پر قبضہ دیتا ہے جس کا فائدہ صرف آئی ایم ایف کو ہوتا ہے۔ آئی ایم ایف کی ایک شرط یہ بھی ہوتی کہ تعلیم پر پیسہ خرچ نہ کیا جائے تاکہ قوم کو شعور نہ آجائے ہوسکتا ہے ہمیں آئی ایم ایف کے پاس جانا ہی نہ پڑے۔ تحریک انصاف کی حکومت سے عوام کو بہت امیدیں ہیں۔ کالم نگار توصیف احمد خان نے کہا کہ پانی کا مسئلہ بہت سنگین ہے اس کے بغیر بقا ممکن نہیں۔ ایوب خان کے دور میں ڈیمز بنے اس کے بعد یہ سلسلہ تھم گیا۔ تحریک انصاف کو معاشی میدان میں کافی زیادہ چیلنجز کا سامنا کرنا پڑے گا۔ انہوں نے کہا کہ پوری دنیا میں گرین پاسپورٹ کی عزت بحال کرانا بھی ایک چیلنج ہے۔ عوام کی آنکھوں میں امیدوں کے چراغ روشن ہیں۔ کالم نگار اعجاز حفیظ نے کہا کہ گزشتہ حکومت نے ملکی معیشت کا بیڑہ غرق کردیا اور قوم کو بے پناہ داغ دیئے اصل منصوبے ترک کرکے فضول منصوبوں پر کام کیا گیا۔ قوم کا کھربوں روپیہ ضائع کیا گیا۔ کیا ان پیسوں سے ڈیم نہیں بن سکتے تھے۔ لوگ صاف پانی سے محروم ہیں۔ انہوں نے کہا کہ آئی ایم ایف سے جان چھوٹ جائے تو بڑی کامیابی ہوگی لیکن یہ بہت مشکل ہے۔ شریف خاندان نے قوم کو کرپٹ کردیا۔ شہبازشریف اپنے دور میں کارکردگی کے نام پر ڈرامے کرتے تھے۔ کالم نگار وسیم اخترنے کہا کہ گزشتہ حکمرانوں کی ترجیحات میں ڈیم تھے ہی نہیں صرف وقت گزاری کی گئی۔ کرپٹ لوگوں سے پیسہ نکلوا کر ڈیمز بنائے جاسکتے ہیں۔ شریف خاندان نے انسانوں پر پیسہ خرچ نہیں کیا۔ پورے پنجاب کا بجٹ صرف لاہور پر خرچ کردیا گیا۔ سروے کے مطابق ملک کے گیارہ لاکھ افراد سالانہ گندے پانی کے باعث مرتے ہیں۔ ہر دسواں آدمی ہیپاٹائٹس کا مریض ہے۔ آشیانہ ہاﺅسنگ سکیم کا ٹھیکہ کاسہ ڈویلپرز کو دیا گیا تھا جو پیراگون سٹی گروپ ہے۔
