زرداری قانون کا ہاتھ گردن تک پہنچتا ، دیکھ کر گھبرا گئے : فواد چودھری

لاہور، اسلام آباد (آئی این پی) وزیراعظم کے معاون خصوصی برائے سیاسی امور نعیم الحق نے کہا ہے کہ آصف علی زرداری چند ہفتوں میں قانون کا ہاتھ اپنے گریبان تک پہنچتا دیکھ کر گھبراگئے ہیں اور اسی بوکھلاہٹ میں حکومت پر حملے کی کوشش کی جارہی ہے ،ہم نے کسی بھی کرپٹ آدمی کو نہیں چھوڑنا اور حکومت میں آنے کے بعد ہمارے پاس لوٹ مار کے خلاف قانونی کارروائی کےلئے بہت سے شواہد آ گئے ہیں ۔ پیپلز پارٹی کے شریک چیئرمین آصف علی زرداری کی پریس کانفرنس پر اپنے رد عمل میں نعیم الحق نے کہا کہ آڈیٹر جنرل آف پاکستان کی گزشتہ حکومت میں شائع ہونے والی رپورٹ میں بتایا گیا ہے کہ 600ارب کے بجٹ میں سے 300ارب روپے کا غبن کر لیا گیا ۔ پی ٹی آئی کی حکومت کا واضح مو¿قف ہے کہ ہم نے کرپٹ افراد کو کسی صورت نہیں چھوڑنا ۔ مسلم لیگ (ن) اور پیپلز پارٹی نے دس سالوںمیں ملک کو بیدردی سے لوٹا ہے جس کی وجہ سے ہر ادارہ زبردست خسارے کا شکار ہے ،گزشتہ دس سالوں کی پالیسیوں کا نتیجہ ہے کہ آج خزانہ خالی ہے۔ انہوں نے کہا کہ آصف علی زرداری بوکھلا گئے ہیں اس لئے حکومت پرحملے کوشش کی جارہی ہے ۔ موجودہ حکومت کو تو ابھی آئے ہوئے دو ماہ ہوئے ہیں اور ہماری مختلف امور پر گرفت مضبوط ہو رہی ہے ۔ انہوں نے کہا کہ وزیر اعظم عمران خان کا واضح مو¿قف ہے کہ لوٹ مار کرنے والے جو کھلم کھلا پھررہے ہیں ہم نے انہیں چھوڑنا نہیں اور حکومت میں آنے کے بعد ہمارے پاس ایسے شواہد آگئے ہیں جن سے ان کے خلاف قانونی کارروائی ہو گی اور اسی بوکھلاہٹ کی وجہ سے حکومت کے خلاف اعلانات کئے جارہے ہیں۔ انہوںنے کہا کہ اپوزیشن کے فرشتے بھی حکومت کے خلاف اسمبلی میں کوئی قرارداد منظور نہیں کرا سکتے انہیں اپنے گریبان میں منہ ڈال کر جھانکنا چاہیے ۔ ہم آئندہ چند روز تک سابقہ ادوار کی لوٹ مار کے حقائق عوام کے سامنے لائیں گے۔ وفاقی وزیر اطلاعات و نشریات فواد چوہدری نے کہا ہے کہ آصف زرداری کو کئی کیسز میں ریلیف دیا گیا، زرداری پاکستان کی قابل شرم داستان کا حصہ ہیں، اسحاق ڈار کو لانے کے حوالے سے مرحلہ وار کام ہورہا ہے۔ اتوار کو آصف زرداری کی پریس کانفرنس پر ردعمل دیتے ہوئے فواد چوہدری نے کہا کہ امید ہے کہ اسحاق ڈار کو پاکستان کے حوالے کیا جائے گا۔ اسحاق ڈار کو وطن واپس لانے کے حوالے سے مرحلہ وار کام ہورہا ہے۔ انہوں نے کہا کہ آصف زرداری کو کئی کیسز میں ریلیف دیا گیا۔ زرداری پاکستان کی قابل شرم داستان کا حصہ ہیں۔