کراچی(آئی این پی) ورلڈکپ 1992 کی فاتح ٹیم کے رکن اور قومی ٹیم کے سابق کپتان عامر سہیل کا کہنا ہے کہ یونس خان کا ریٹائرمنٹ لینے کا فیصلہ غلط تھا۔ایک انٹرویو میں گفتگو کرتے ہوئے ان کا کہنا تھا کہ مصباح الحق اور یونس خان کی ریٹائرمنٹ کے اعلان سے قبل پاکستان کرکٹ بورڈ کو یونس خان سے بات کرنی چاہیئے تھی۔ان کا کہنا تھا کہ یونس خان سے بات کرکے انہیں ایک سال کے لئے ریٹائرمنٹ کا پلان ملتوی کرنے کا مشورہ دے کر کپتان مقرر کردینا چاہیئے تھا۔سابق کپتان کا کہنا تھا کہ سینیئر بلے باز یونس خان کو قیادت سونپ کر ان کی زیرنگرانی مستقبل کے نئے کپتان کی تیاری کرنی چاہیئے تھی۔اپنے خیالات کا اظہار کرتے ہوئے ان کا مزید کہنا تھا کہ سرفراز احمد کو کپتانی سے ہٹانا مسئلہ کا حل نہیں ہے کیونکہ اس وقت ٹیم میں ایسا کوئی کھلاڑی نہیں جو کپتانی کا اہل ہو یا یہ ذمہ داری بخوبی انجام دے سکے۔
