تہران (نیٹ نیوز) شہری انتظامیہ نے کرونا وائرس سے ہونے والی ممکنہ اموات کے پیش نظر تہران میں 10ہزار قبریں تیار کرلی ہیں۔ غیر ملکی خبر رساں ادارے کے مطابق تہران کی سٹی کونسل کے ایک رکن مجتبیٰ یزدانی کے مطابق دارالحکومت کے جنوب میں واقع ملک کے سب سے بڑے قبرستان بہشتِ زہرا کے رقبے میں 12 سو 35 ایکڑ کا اضافہ کرکے کرونا وائرس سے ہونے والی ممکنہ ہلاکتوں کے پیش نظر 10 ہزار قبریں تیار کرلی گئی ہیں۔ اس کے علاوہ قبرستان میں قائم ایمرجینسی شیلٹر میں میت کو غسل دینے کا انتظام بھی کردیا گیا ہے۔مجتبیٰ یزدانی کے مطابق کرونا وائرس سے مرنے والوں کے لیے دو میٹر گہری قبر بنائی جاتی ہے۔ ایران کے بعض شہروں میں میت کو جراثیم سے پاک کرنے کے لیے تدفین کے وقت قبر میں ان بجھا چونا بھی ڈالا جاتا ہے اور بعض علاقوں میں اس کی پابندی نہیں کی جاتی۔ واضح رہے بہشت زہرا ایران کا سب سے بڑا قبرستان ہے جس میں 17 لاکھ قبریں موجود ہیں۔ ایران میں اب تک 73 ہزار سے زائد افراد میں کرونا وائرس کی تشخیص ہوچکی ہے جبکہ 4 ہزار 5سو سے زائد اموات ہوچکی ہیں۔
