حوثیوں کا بڑا حملہ، یمن کے اہم ساحلی شہر موخا پر قبضہ
یمن میں ایران نواز حوثی جنگجوؤں نے بحیرۂ احمر کے اہم بندرگاہی شہر موخا (Mokha) کا کنٹرول سنبھال لیا ہے۔ چار یمنی حکومتی فوجی ذرائع نے رائٹرز کو بتایا کہ حوثیوں نے جمعرات کو شہر پر قبضہ کیا، جس سے انہیں باب المندب آبنائے کے قریب مزید اسٹریٹجک برتری حاصل ہوگئی ہے۔
رپورٹس کے مطابق حوثی فورسز نے بحیرۂ احمر کے ساحلی علاقوں میں پیش قدمی کرتے ہوئے موخا میں داخل ہونے کے بعد حکومتی فورسز کو جنوب کی جانب ذباب کی طرف پیچھے ہٹنے پر مجبور کیا۔ حوثی جنگجو قریبی حنیس جزائر کی جانب بھی کارروائیاں کر رہے ہیں۔
موخا پر قبضہ اس لیے انتہائی اہم سمجھا جا رہا ہے کیونکہ یہ شہر باب المندب کے قریب واقع ہے، جو بحیرۂ احمر کو خلیج عدن اور بحر ہند سے ملانے والی دنیا کی اہم ترین سمندری گزرگاہوں میں شامل ہے۔ اس راستے سے تیل، ایندھن اور عالمی تجارتی سامان کی بڑی مقدار گزرتی ہے۔
یمن میں حالیہ دنوں حوثیوں اور سعودی حمایت یافتہ حکومتی فورسز کے درمیان لڑائی میں شدت آئی ہے۔ 2022 میں اقوام متحدہ کی ثالثی سے جنگ بندی کے بعد بڑے پیمانے پر لڑائی کافی حد تک رک گئی تھی، تاہم تازہ جھڑپوں نے ملک میں دوبارہ وسیع جنگ کے خدشات پیدا کردیے ہیں۔
ماہرین کے مطابق موخا اور اس کے آس پاس کے ساحلی علاقوں پر حوثیوں کا بڑھتا ہوا کنٹرول باب المندب میں تجارتی جہاز رانی کے لیے خطرات بڑھا سکتا ہے اور خطے میں جاری توانائی کے بحران کو مزید سنگین بنا سکتا ہے۔
