لاہور (لیڈی رپورٹر) وزیراطلاعات پنجاب فیاض الحسن چوہان نے کہاہے کہ سپریم کورٹ کا بزدار حکومت کے اقدامات پراظہار اطمینان ہماری کارکردگی کا منہ بولتا ثبوت ہے۔تفصیلات کے مطابق اپنے بیان میں وزیراطلاعات پنجاب فیاض الحسن چوہان نے کہا کہ سپریم کورٹ کے معزز جج صاحبان نے پنجاب حکومت کے مثبت اقدامات کو سراہا ہے، عدالت عظمیٰ کے ججز نے ریمارکس دئیے کہ کورونا وائرس سے نمٹنے کے لئے پنجاب حکومت نے مثبت سمت میں اقدامات کئے ہیں۔فیاض الحسن چوہان نے اپنے بیان میں کہا کہ سپریم کورٹ کی ہدایت پر اپنی استعداد کار بڑھانے کے لئے اقدامات جاری رکھے جائیں گے،ہم کورونا سے نمٹنے کے لئے ہر ممکن اقدام کررہے ہیں۔صوبائی وزیر اطلاعات کا کہنا تھا کہ سپریم کورٹ کا بزدار حکومت کے اقدامات پر اظہار اطمینان ہماری کارکردگی کا منہ بولتا ثبوت ہے،سپریم کورٹ کے حوصلہ افزا ریمارکس کی روشنی میں پنجاب حکومت کورونا کے سدباب کے لئے مزید موثر انداز میں اقدامات کرتی رہے گی۔
