اسلام آباد (نامہ نگار خصوصی) وزیراعظم عمران خان نے کہا ہے کہ احساس کیش ایمرجنسی پروگرام تمام سیاسی وابستگیوں سے بالا تر ہو کر نہایت شفاف اور میرٹ کی بنیاد پر چلا یا جا رہا ہے،عوام کی مشکلات کا مکمل احساس ہے۔ کرونا کے ساتھ ساتھ غربت سے نمٹنا بڑا چیلنج ہے، اپنے عوام کی معاشی مشکلات کو مد نظر رکھ کر لائحہ عمل تشکیل دیا جا رہا ہے،مشکلات کا شکار عوام خصوصاً کمزور اور غریب طبقے کو ریلیف کی فراہمی میں حکومت کے ساتھ ساتھ مخیر حضرات کا بھی تعاون درکار ہے،سیاسی قیادت مخیر حضرات کو متحرک کرنے اور ہر مستحق تک پہنچنے میں کردار ادا کرے۔ بدھ کو وزیر اعظم عمران خان سے پی ٹی آئی کے مرکزی نائب صدر اور سندھ اسمبلی میں پی ٹی آئی کے پارلیمانی لیڈر حلیم عادل شیخ نے ملاقات کی جس میں حلیم عادل شیخ نے وزیرِ اعظم کو کرونا وائرس کے تناظر میں صوبہ سندھ کی مجموعی صورتحال اور عوام کو درپیش مسائل سے آگاہ کیا۔ حلیم شیخ نے کہاکہ صوبہ سندھ کے عوام مشکل کی اس گھڑی میں وفاقی حکومت کی جانب سے احساس کیش ایمرجنسی پروگرام کے تحت ملنے والی مالی معاونت پر وزیرِ اعظم عمران خان کے مشکور ہیں۔مشکل ترین حالات کے باوجود موجودہ صورتحال میں اربوں روپے کا پیکیج فراہم کرنے پر وزیرِ اعظم کو خراج تحسین پیش کیا ۔ انہوںنے کہاکہ زمینی حقائق کو مدنظر رکھ کر تعمیرات اور ایکسپورٹ انڈسٹری کے حوالے سے بروقت فیصلے لینے پر وفاقی حکومت کے مشکور ہیں۔ حلیم عالد نے کہاکہ صوبے بھر کے نوجوانوں میں کرونا ریلیف ٹائیگر فورس کا حصہ بننے میں انتہائی جوش و خروش پایا جاتا ہے،ریلیف فراہم کرنے کی کوششوں میں سندھ کا نوجوان پیش پیش ہوگا اور وزیرِ اعظم کی طاقت بنے گا۔ انہوںنے کہاکہ پاکستان تحریک انصاف سندھ باب اور اسکی قیادت مشکل کی اس گھڑی میں صوبے کی عوام کو تنہا نہیں چھوڑے گی اور وزیرِ اعظم عمران خان کی کوششوں کا بھرپور ساتھ دے گی۔اس موقع پر وزیر اعظم نے کہاکہ احساس کیش ایمرجنسی پروگرام تمام سیاسی وابستگیوں سے بالا تر ہو کر نہایت شفاف اور میرٹ کی بنیاد پر چلا یا جا رہا ہے۔ عمران خان نے کہاکہ مشکل کی اس گھڑی میں وفاقی حکومت ملک بھر کی عوام کو ریلیف فراہم کرنے کی ہر ممکنہ کوشش کر رہی ہے۔انہوںنے کہاکہ عوام کی مشکلات کا مکمل احساس ہے۔ کرونا کے ساتھ ساتھ غربت سے نمٹنا بڑا چیلنج ہے۔ وزیر اعظم نے کہاکہ اپنے عوام کی معاشی مشکلات کو مد نظر رکھ کر لائحہ عمل تشکیل دیا جا رہا ہے۔ وزیر اعظم نے کہاکہ کرونا ریلیف ٹائیگر فورس میں شمولیت کے حوالے سے نوجوانوں کا جذبہ قابل تحسین ہے۔انہوںنے کہاکہ مشکلات کا شکار عوام خصوصاً کمزور اور غریب طبقے کو ریلیف کی فراہمی میں حکومت کے ساتھ ساتھ مخیر حضرات کا بھی تعاون درکار ہے۔ سیاسی قیادت مخیر حضرات کو متحرک کرنے اور ہر مستحق تک پہنچنے میں کردار ادا کرے۔ وزیر اعظم عمران خان نے کہا ہے کہ نوجوان کرونا ریلیف ٹائیگر فورس میں بھرپور دلچسپی لے رہے ہیں، اب تک مختلف شعبو ںسے تعلق رکھنے والے 9لاکھ سے زائد افراد نے اس فورس کے لئے رجسٹریشن کرائی ہے اور اس کی تعداد میں مسلسل اضافہ ہو رہا ہے۔ بدھ کو اپنے ٹویٹ میں انہوں نے کہا کہ کروناریلیف ٹائیگر فورس میں اب تک 9 لاکھ 43ہزار 473 رضاکاروں نے رجسٹریشن کرائی ہے۔ ان میں سے پنجاب سے 6 لاکھ 19 ہزار 809، سندھ سے ایک لاکھ 44 ہزار 474، خیبر پختونخوا سے ایک لاکھ 34 ہزار 637، بلوچستان سے 13 ہزار 907، اسلام آباد سے 13 ہزار 795، گلگت بلتستان سے 5 ہزار 686 اور آزاد کشمیر سے 11 ہزار 298 رضاکاروں نے رجسٹریشن کرائی ہے۔
عوام کی مشکلات کا احساس، کرونا کے ساتھ غربت سے نمٹنا بڑا چیلنج،عمران خان
