لاہور(لیڈی رپورٹر) صوبائی وزیراطلاعات فیاض الحسن چوہان نے کہا ہے کہ وزیراعظم عمران خان کی قیادت میں پاکستان جلد کورونا کے خلاف جنگ جیتے گا۔اپنے بیان میں وزیراطلاعات پنجاب فیاض الحسن چوہان نے کہا کہ وزیراعظم کی قائدانہ صلاحیتوں کو دنیا تسلیم کر رہی ہے، افغانستان میں قیام امن کی کوششوں کے باعث ان کے بیانات کو عالمی لیڈرز اور ادارے سنجیدگی سے لیتے ہیں،امن پر کام کرنے کی بدولت عمران خان کو مسلم مین آف دی ورلڈ کا خطاب دیا جانا اعزاز کی بات ہے۔صوبائی وزیر اطلاعات نے کہا کہ وزیراعظم عمران خان کی اپیل کے بعد جی ٹوئنٹی ممالک نے قرضوں کے ریلیف پر کام شروع کردیا ہے،اس سے نہ صرف پاکستان بلکہ دیگرغریب ممالک کو بھی ریلیف ملے گا۔فیاض الحسن چوہان نے مزید کہا کہ عالمی برادری میں وزیراعظم عمران خان کی کوششوں کا براہ راست فائدہ پاکستان اور پاکستانیوں کو ہو رہا ہے،یہی وجہ ہے کہ وزیراعظم کورونا ریلیف فنڈ کی تعریف میں کئی بین الاقوامی لیڈرز اور کھلاڑی پیش پیش تھے۔اپنے بیان میں صوبائی وزیر اطلاعات نے کہا کہ مجھے قوی امید ہے کہ وزیراعظم عمران خان کی قیادت میں پاکستان جلد کورونا کے خلاف جنگ جیتے گا۔
