بلوچستان کی ترقی ملکی ترقی کا باعث بنے گی:شبلی فراز

(ویب ڈیسک)وفاقی وزیر اطلاعات کا کہنا ہے کہ بلوچستان کی ترقی ملکی ترقی کا باعث بنے گی، وزیراعظم کا دورہ بلوچستان خوشحالی کی نوید ثابت ہوگا۔

تفصیلات کے مطابق سماجی را بطے کی ویب سائٹ ٹوئٹر پر جاری اپنے پیغام میں وفاقی وزیر اطلاعات شبلی فراز نے لکھا کہ معاشی و سماجی ترقی کے ذریعے صوبے کے عوام کا احساس محرومی دور کریں گے، آگے بڑھنے کے یکساں مواقعوں سمیت ترقی کے نئے عہد کا آغاز ہوگا۔

واضح رہےکہ وزیر اعظم عمران خان آج بلوچستان کا ایک روزہ دورہ کریں گے۔

 وزیر اعظم وزیراعلیٰ اور گورنر بلوچستان سے ملاقات کریں گے۔

وفاقی وزیر اسدعمر، مرادسعید، شبلی فراز وزیر اعظم کے ہمراہ ہوں گے۔

وزیر اعظم بلوچستان میں سی پیک منصوبہ کی نئی شاہراہ کا افتتاح اور بلوچستان کے لیے ترقیاتی پیکج کا بھی اعلان کریں گے۔

وزیر اعظم صوبائی ممبران اسمبلی اور پارٹی رہنماوں سے ملاقات کریں گے اور انھیں صوبہ میں سیکورٹی صورتحال پر بریفنگ دی جائے گی۔

 وزیر اعظم کو بلوچستان میں جاری ترقیاتی منصوبوں میں پیش رفت سے بھی آگاہ کیا جائے گا۔

وزیر اعلیٰ بلوچستان جام کمال خان نے سماجی رابطے کی ویب سائٹ ٹوئٹر پر جاری اپنی ٹوئٹ میں کہا ہے کہ وزیر اعظم عمران خان کا تربت کا دورہ تاریخی ہوگا۔ا

وزیراعظم کے دورے کے موقع پر وزیراعلیٰ جام کمال خان، ارکان صوبائی کابینہ بھی تربت میں ان کے ہمراہ موجود ہونگے، وزیراعظم عمران خان کا تربت کا یہ پہلا دورہ ہے۔