جدہ(ویب ڈیسک) سعودی عرب کی ایک وادی میں نامعلوم لڑکی کی لاش ملی ہے جس نے آس پاس کے مکینوں میں خوف و ہراس پھیلا دیا ہے۔ ابھی تک اس لڑکی کی شناخت نہیں ہو سکی ، آیا کہ یہ سعودی ہے یا اس کا تعلق کسی دوسرے ملک سے ہے۔ نامعلوم لڑکی کی لاش حائل کے علاقے کی ایک وادی سے مِلی ہے۔حائل پولیس کے مطابق مریفق وادی میں ایک 20 سالہ لڑکی کی لاش ملی ہے۔اس لاش کی اطلاع ایک مقامی شہری نے پولیس کو دیتے ہوئے بتایا کہ شہر کے جنوب میں حائل، مریفق ہائی وے پر ایک گہری وادی میں لڑکی کی لاش پائی گئی ہے۔اطلاع ملنے کے بعد پولیس اور طبی اہلکاروں کی ایک مشترکہ ٹیم فوری طور پر جائے وقوعہ پر پہنچ گئی۔ جہاں ایک لڑکی کی لاش پڑی ہوئی تھی۔ پولیس کے مطابق ابتدائی جائزے سے معلوم ہو رہا ہے کہ واقعہ جرم پر مبنی ہے۔ابھی تک متوفیہ کی شناخت نہیں ہوسکی البتہ متعلقہ اداروں نے تفتیش کا آغاز کر دیا ہے۔پولیس کی جانب سے ان خطوط پر بھی تفتیش کی جا رہی ہے کہ کہیں لڑکی کو زیادتی کا نشانہ تو نہیں بنایا گیا یا زیادتی کی کوشش میں ناکامی پر اس کی جان لے لی گئی ہو۔ پولیس ترجمان کے مطابق نامعلوم لڑکی کی لاش حائل جنرل ہسپتال کے مردہ خانے میں منتقل کر دی گئی ہے، ابھی تک کسی تھانے سے بھی لڑکی کی گمشدگی کی اطلاع نہیں ملی۔واقعے کی تفتیش کے لیے علاقے میں نصب کلوز سرکٹ کیمروں کی فوٹیج حاصل کر لی گئی ہیں، جس سے اس مبینہ بہیمانہ واردات کے حقائق تک پہنچنے میں بڑی مدد ملنے کا امکان ہے۔

دبئی(ویب ڈیسک) متحدہ عرب امارات نے دو ہفتے تک ملک میں تمام پروازوں کی آمد ورفت معطل کر دی ہے۔ اتوار کو تمام ملکی اور بین الاقوامی پروازیں معطل کرنے کی اطلاع دی تھی اور کہا تھا کہ اس فیصلے پر 48 گھنٹے کے بعد منگل سے عمل درآمد کا آغاز ہوگا۔دو ہفتے کے بعد صورت حال کا جائزہ لیا جائے گا اور اس کے بعد پروازوں کی بحالی یاعدم بحالی کے بارے میں کوئی فیصلہ کیا جائے گا۔امارات کی فضائی کمپنی فلائی دبئی نے کرونا وائرس کو پھیلنے سے روکنے کے لیے دبئی ائیرپورٹ کے اقدامات کی روشنی میں 26 مارچ سے 9 اپریل تک اپنی تمام پروازیں منسوخ کرنے کا اعلان کیا ہے۔العربیہ کے مطابق یو اے ای کی سول ایوی ایشن اتھارٹی نے ایک بیان میں وضاحت کی ہے کہ مال بردار اور ہنگامی اخراج کے لیے پروازیں اس حکم سے مستثنا ہوں گی۔یو اے ای کی حکومت نے سوموار کو بیرون ملک مقیم تمام طلبہ کو 48 گھنٹے میں وطن لوٹنے کی ہدایت کی تھی۔اس کے بعد ابو ظبی کی فضائی کمپنی اتحاد ائیرویز نے کہا تھا کہ وہ سمندر پار سے صرف یو اے ای کے شہریوں یا سفارت کاروں کو اپنی پروازوں پر سوار کرے گی اور ان کی منزل ابو ظبی شہر ہی ہونا چاہیے۔اتحاد ائیرویز نے کرونا وائرس کی وبا پھیلنے کے بعد اپنی مسافر پروازوں کی تعداد میں کمی کردی تھی اور جن روٹس پر اس کی مسافر پروازیں چل رہی تھیں، وہاں مال بردار پروازوں کی تعداد بڑھانے کا اعلان کیا تھا۔ دنیا بھر میں نصف مال اور اشیائے تجارت کی حمل ونقل مسافر پروازوں کے ذریعے ہوتی ہے لیکن کرونا کی وبا پھیلنے کے بعد بیشتر ممالک نے اپنی مسافر پروازیں بند کردی ہیں جس کی وجہ سے اب سامان تجارت کی حمل ونقل کے لیے مال بردار طیاروں کی مانگ میں اضافہ ہوا ہے۔واضح رہے کہ کرونا وائرس نے دنیا بھر میں شہری ہوابازی کی صنعت کو بری طرح متاثر کیا ہے اور فضائی کمپنیوں کو بھاری مالی نقصان برداشت کرنا پڑرہا ہے کیونکہ بیشتر ملکوں نے اس مہلک وبا کو پھیلنے سے روکنے کے لیے اپنی زمینی اور فضائی سرحدیں بند کردی ہیں۔اندرون اور بیرون ملک مسافر پروازیں دو ، دو ہفتے یا اس سے زیادہ عرصے کے لیے منسوخ کر دی ہیں۔

دبئی(ویب ڈیسک) متحدہ عرب امارات میں کورونا پر قابو پانے کی خاطر بہت سے اقدامات کیے گئے ہیں، جن میں کاروباری مراکز اور عوامی مقامات کی بندش ہے۔ لوگوں کی نقل و حمل محدود کرنے کے باوجود امارات میں کورونا وائرس اپنی جڑیں مضبوط بناتا جا رہا ہے۔ خلیج ٹائمز کے مطابق گزشتہ 24 گھنٹوں کے دوران مملک میں وائرس کے 50 نئے کیسوں کی تصدیق کی ہے۔جس کے امارات میں کرونا وائرس کے مریضوں تعداد بڑھ کر 248 ہوگئی ہے۔متاثرین میں سب سے زیادہ بھارتی باشندے ہیں جن کی گنتی چھ ہے۔ امریکا، بنگلہ دیش اور فلسطین کے تین، تین شہری کورونا کا تازہ شکار بنے ہیں۔ اٹلی ، مصر ، یو اے ای،اسپین ، نیدر لینڈز، اردن اور فلپائن کے دو، دو شہری کورونا کے مریض بنے ہیں۔جبکہ پاکستان، سری لنکا، برطانیہ ، سعودی عرب ، یمن ، تونس ، جنوبی افریقا ، بیلجیئم ،جنوبی کوریا ، بلغاریہ ،فرانس ، جمہوریہ چیک ، آسٹریلیا، لبنان ، کینیا، مالدیپ، سوڈان ، ایران ، آئیرلینڈ، مراکش، اور سویڈن کا ایک، ایک شہری کورونا سے متاثر ہوا ہے۔تین، تین کا تعلق امریکا ، بنگلہ دیش اور فلسطین اور چھے کا تعلق بھارت سے ہے۔وزارت صحت کے جاری کردہ بیان کے مطابق تمام نئے کیس پہلے سے متاثرہ افراد سے میل ملاپ اور رابطوں کی وجہ سے اس مہلک وائرس کا شکار ہوئے ہیں۔کورونا کے ان تازہ ترین مریضوں کی حالت مستحکم ہے، جنہیں قرنطینہ میں رکھا گیا ہے اور انہیں ضروری طبی امداد مہیا کی جارہی ہے۔وزارت کے مطابق ایک اچھی خبر یہ ہے کہ مملکت میں کرونا وائرس سے متاثرہ مزید چار کیس صحت یاب ہوگئے ہیں۔ان میں تین پاکستانی اور ایک بنگلہ دیشی ہے۔اب تک یو اے ای میں کرونا وائرس کا شکار ہونے والے 45 افراد صحت یاب ہوچکے ہیں۔واضح رہے کہ امارات نے کورونا وائرس سے نمٹنے کے لیے پرانے قانون میں ترمیم کر کے اس میں کورونا کو بھی شامل کر لیا ہے۔اس قانون کے تحت اگر کورونا وائرس میں مبتلا شخص اپنی بیماری چھ±پائے تو اسے قید کی سزا دی جائے گی اور جرمانہ بھی عائد ہو گا۔ وزارت انصاف کی جانب سے تصدیق کی گئی ہے کہ متعدی امراض سے متعلق وفاقی قانون کے 2014ء کے قانون نمبر 14میں کرونا کی بیماری کو بھی شامل کر لیا گیا ہے جس کا مقصد عوام کی صحت کا تحفظ اور کورونا سے نمٹنے کی خاطر حکومت کی کوششوں کو مستحکم بنانا ہے۔ وزرات انصاف کی جانب سے واضح کیا گیا ہے کہ مذکورہ قانون کے تحت کورونا کی بیماری چھپانے والے یا اس کے دانستہ پھیلاوکا سبب بننے والے افراد کو قید یا 10 ہزار درہم جرمانے کا سامنا کرنا ہو گا، بعض صورتوں میں یہ دونوں سزائیں اکٹھی بھی دی جا سکتی ہیں۔

دوحہ(ویب ڈیسک) خلیجی ریاستوں میں کورونا وائرس کے مریضوں کی گنتی میں اضافہ ہوتا جا رہا ہے۔قطر ٹی وی نے سپریم کمیٹی برائے کرائسس مینیجمنٹ کے حوالے سے منگل کو ٹویٹر پرجاری ایک خبر میں بتایا کہ ملک میں کرونا وائرس کے 25 نئے کیسز کا اندراج کیا گیا ہے جس کے بعد کرونا کے متاثرہ افراد کی تعداد 526 ہوگئی ہے۔ کویت کی وزارت صحت نے گزشتہ 24گھنٹوں کے دوران کرونا وائرس سے دو نئے کیسز کی تصدیق کی ہے۔ گذشتہ چوبیس گھنٹوں کے دوران کویت میں کرونا کے 9 مریض صحت یاب ہوئے ہیں جبکہ مجموعی کیسوں کی تعداد 39 ہے۔اس کے علاوہ دیگر خلیجی ریاستوں اور عرب ممالک میں کرونا وائرس کے نئے کیسز سامنے آنے کی اطلاعات ہیں۔ کل منگل کے روز خلیجی ریاستوں قطر اور کویت جب کہ مشرق وسطیٰ میں اردن اور افریقی ملک تیونس میں کرونا کے نئے کیسز سامنے آئے۔وزیر صحت سعد جابر نے بتایا کہ منگل کے روز کرونا وائرس کے 26 نئے کیسز ریکارڈ ہوئے ہیں۔تیونس کی وزارت صحت نے فیس بک پر پوسٹ کردہ ایک بیان میں کرونا کے 25 نئے کیسز کے اندراج کی تصدیق کی اور بتایا کہ تیونس میں کرونا کے متاثرین کی تعداد 114 ہوگئی ہے جب کہ عراق میں کرونا متاثرین کی تعداد 316 تک پہنچ گئی ہے۔واضح رہے کہ کورونا کے باعث کئی خلیجی ممالک میں تمام مساجد میں نمازوں کی ادائیگی پر عارضی پابندی عائد کر دی گئی ہے۔ وہ نماز پنجگانہ گھروں سے ہی ادا کریں۔ ایک اور خلیجی ملک میں مساجد کو عبادت کے لیے بند کر دیا گیا ہے۔ کویتی اخبار القبس کے مطابق بحرین کی حکومت نے تمام مساجد میں نماز اور جمعہ کے اجتماعات پر پابندی عائد کر دی ہے جو کہ عارضی نوعیت کی ہے۔ اس پابندی کا اطلاق گزشتہ روز مغرب کے نماز سے ہو گیا ہے۔بحرین کی اسلامی امور کی سپریم کونسل کی جانب سے کورونا وائرس کے پیش نظر مساجد میں نمازوں کی ادائیگی پر پابندی کا فتویٰ دیا گیا تھا، جس کے بعد سنی محکمہ اوقاف کی جانب سے اس پابندی کا اعلان کر دیا گیا۔محکمہ اوقاف نے تارکین وطن اور مقامی افراد کو تاکید کی ہے کہ وہ اس بحرانی گھڑی میں نمازیں گھروں سے ہی ادا کریں۔ عبادت کے معاملے میں بالکل غفلت نہ کریں کیونکہ آج کے بحرانی دور میں پیدا ہونے والی آزمائش سے نجات کے لیے زیادہ سے زیادہ عبادت کرنی لازمی ہو گئی ہے۔ ہر اذان میں لوگوں سے کہا جائے گا کہ وہ گھروں پر ہی نماز ادا کریں۔ واضح رہے کہ متحدہ عرب امارات میں کورونا وائرس کے خدشے کے باعث تمام مذاہب کی عبادت گاہیں عارضی طور پر بند کر دی گئی ہیں۔تمام مساجد میں بھی صرف اذان دی جا رہی ہے، اور لوگوں کو نمازیں گھر پر ہی پڑھنے کی تلقین کی جا رہی ہے۔اماراتی مساجد میں ادا ہونے والی اذانوں کے اختتام پر کچھ الفاظ کا اضافہ کر دیا گیا ہے۔ اذان کے اختتام پر موذن یہ کہتا سنائی دیتا ہے ”الصلاة فی بیوتکم“ یعنی گھروں پر ہی نماز اد اکرو“۔ شارجہ کی النور مسجد میں بھی جب فجر کی اذان میں پہلی بار یہ الفاظ دہرائے گئے تو بہت سارے نمازی حیران رہ گئے، کیونکہ ان کی زندگیوں میں یہ پہلا موقع تھا کہ اذان کے اختتام پر ’نماز گھروں میں ہی اداکرو“ کے الفاظ دہرائے جا رہے تھے۔ مملکت بھر میں مساجد میں نماز کی ادائیگی پر چار ہفتوں کے لیے پابندی عائد کی گئی ہے۔ یہ پابندی نماز جمعہ پر بھی عائد ہو گی۔