برسبین: سابق آسٹریلوی اسپنر شین وارن نے بھارتی فاسٹ بولر تھنگاراسو نتا راجن کی نو بالز کو دبے لفظوں میں مشکوک قرار دے دیا۔
تفصیلات کے مطابق بھارت اور آسٹریلیا کے درمیان جاری برسبین ٹیسٹ میں بھارتی لیفٹ آرم فاسٹ بولر تھنگارا سونتاراجن کی جانب سے دو اننگز میں اب تک 8 نوبالز کی گئیں جسے لیجنڈ آسٹریلوی لیگ اسپنر شین وارن نے دبے لفظوں میں مشکوک قرار دیا۔
نتاراجن تینوں فارمیٹ میں بھارتی کرکٹ ٹیم کی نمائندگی کررہے ہیں تاہم ان کی جانب سے کی جانے والی نوبالز نے شین وارن کو تشویش میں مبتلا کردیا اور انہوں نے اس کا کھل کر اظہار بھی کیا۔
شین وارن کا کہنا ہے کہ نتاراجن کی جانب سے ایک میچ میں 8 نوبالز کرائے جانا ایسی چیز ہے جسے نظر انداز نہیں کیا جاسکتا۔
سابق لیگ اسپنر نے کہا کہ نتاراجن کی نوبالز بہت بڑی بھی ہیں جو مجھے کچھ عجیب لگ رہی ہیں۔
شین وارن نے کہا کہ نتاراجن نے 5 نوبالز اپنے مختلف اوورز کی پہلی گیند پر کرائیں اور ان کا پاؤں بہت زیادہ آگے تک گیا، اس چیز نے میری توجہ اپنی جانب مبذول کرائی۔
شین وارن کی جانب سے نوبالز کی نشاندہی کے بعد بھارتی شائقین آپے سے باہر ہوگئے اور ان پر خوب تنقید کررہے ہیں۔
برسبین ٹیسٹ میں نتاراجن نے پہلی اننگز میں 6، دوسری اننگز میں 2 نوبالز کرائیں اور میچ میں تین وکٹیں حاصل کیں۔
واضح رہے کہ بھارت کو برسبین ٹیسٹ جیتنے کے لیے مزید 324 رنز درکار ہیں جبکہ آسٹریلیا کو جیت کے لیے 10 وکٹیں لینا ہوگی، دونوں ٹیموں کے درمیان سیریز 1-1 سے برابر ہے۔
