وزیراعظم کے معاون خصوصی برائے موسمیاتی تبدیلی ملک امین اسلم کا کہناہے کہ پاکستان میں 10 ارب درخت لگانے کے منصوبے پر کام کررہے ہیں، موسمیاتی تبدیلی سے پاکستان پر منفی اثرات مرتب ہورہے ہیں۔
کوئٹہ میں پریس کانفرنس کرتے ہوئے معاون خصوصی نے کہا کہ موسمیاتی تبدیلی سے بلوچستان میں قحط کا خدشہ پیدا ہوا ہے جس کے سدبات کیلئے حکومت کا 2023 تک 10 کروڑ درخت لگانے کا منصوبہ ہے۔
ملک امین اسلم نے کہا کہ کوئٹہ میں دوہزاررقبے پر درخت لگایا جائے گا، شجر کاری کے اس منصوبے سے لوگوں کو روزگار فراہم ہوگا۔
معاون خصوصی نے کہا کہ بلوچستان میں مزید ڈیمز کی ضرورت ہے، اس کے علاوہ نیشنل پارکس ٹریننگ اکیڈمی کے قیام کی بھی اشد ضرورت ہے۔
انہوں نے مزید کہا کہ وزیراعظم نے وفاقی وزراء کو بلوچستان کے دورے کرنے کی ہدایت کی ہے،قحط سالی کے خاتمے کےلئے حکومت تمام وسائل بروئے کار لائے گی۔ اس سلسلے میں ریچارج پاکستان منصوبے کا جلد آغاز کیا جائے گا۔
