اسلام آباد: صدر مملکت ڈاکٹر عارف علوی نے ٹک ٹاک کی دنیا میں قدم رکھ دیا، جس کی تصدیق اُن کے ترجمان نے خود کی ہے۔
ترجمان کی جانب سے جاری کیے گئے اعلامیے میں بتایا گیا ہے کہ ’صدر پاکستان اب ٹک ٹاک پر موجود ہوں گے، جہاں اُن کے مثبت اور حوصلہ افزائی سے متعلق پیغامات شیئر کیے جائیں گے‘۔
صدارتی ہاؤس کے ترجمان نے بتایا کہ صدر پاکستان کے پیغامات بالخصوص پاکستانی نوجوانوں کے لیے ٹک ٹاک پر شیئر کیے جائیں گے، جن کے ذریعے صارفین کو متاثر کن ویڈیوز بنانے پر آمادہ کیا جائے گا‘۔
حیران کن طور پر حال ہی میں سندھ ہائی کورٹ نے ٹک ٹاک بند کرنے کا حکم دیا تھا، جس پر عمل کرتے ہوئے پاکستان ٹیلی کمیونیکیشن اتھارٹی نے اس ایپ کی سروسز پاکستان میں بند کردیں تھیں، بعد ازاں انتظامیہ نے شکایات دور کیں تو ایپ کو دوبارہ بحال کردیا گیا۔
یاد رہے کہ ڈاکٹر عارف علوی سماجی رابطے کی ویب سائٹ ٹویٹر پر اپنا علیحدہ اکاؤنٹ بھی آپریٹ کرتے ہیں، جبکہ بطور صدر پاکستان اُن کے ٹویٹر، انسٹاگرام پر اکاؤنٹ موجود ہیں جبکہ فیس بک پر آفیشل پیج بھی موجود ہے۔
