ٹیلنٹ ہنٹ ونٹر لیگ، قائداعظم کلب نے بلاسٹرز کلب صادق آباد کو ہرا کر فائنل جیت لیا

لاہور: (ویب ڈیسک) قائداعظم کرکٹ کلب رحیم یار خان نے بلاسٹر کرکٹ کلب صادق آباد کو شکست دیکر ٹیلنٹ ہنٹ ونٹر لیگ کا فائنل میچ جیت لیا۔
صادق آباد میں پاکستان کرکٹ بورڈ کے زیر اہتمام ملک بھر کی طرح ٹیلنٹ ہنٹ اور بوگس کرکٹ کلبز کی نشان دہی کیلئے سدرن پنجاب کرکٹ ایسوسی ایشن کے زیر اہتمام ونٹر لیگ کا انعقاد کیا گیا جس میں 24 کلبوں کی ٹیموں نے شرکت کی۔ پاکستان کرکٹ بورڈ نے ونٹر لیگ کی نگرانی کی۔ فائنل میچ قائداعظم کرکٹ کلب رحیم یارخان اور بلاسٹر کرکٹ کلب صادق آباد کے درمیان کھیلا گیا جس میں بلاسٹر کرکٹ کلب نے ٹاس جیت کر پہلے بیٹنگ کا فیصلہ کیا اور 39.5 اوورز میں پوری ٹیم 172رنز بنا کر آؤٹ ہوگئی۔
شہزاد ذوالفقار نے ناٹ آؤٹ رہتے ہوئے 80رنز کی اننگ کھیلی، جواب میں قائداعظم کرکٹ کلب نے چھ وکٹوں کے نقصان پر 38ویں اوور میں سکور پورا کرکے میچ جیت لیا، فاتح ٹیم کی جیت میں احمد رضا کی آل راؤنڈ کارکردگی نے نمایاں کردار ادا کیا۔ انہوں نے بیٹنگ کرتے ہوئے 45رنز ناٹ آؤٹ بنائے جبکہ پہلے اپنی ٹیم کی جانب سے باولنگ کرتے ہوئے انہوں نے آٹھ اوورز میں 37رنز دیکر 4کھلاڑی آوٹ کیے۔ آل راؤنڈ کارکردگی پر انہیں پلئیر آف دی میچ کا انعام دیا گیا۔
میچ کے اختتام پر فاتح ٹیم نے خوب جشن منایا، مہمان خصوصی اسسٹنٹ کمشنر کلیم یوسف اور سابق انٹرنیشنل کھلاڑی چوہدری اظہر شفیق اور جنرل منیجر آپریشنل سدرن کرکٹ ایسوی ایشن نوید باقر نے انعامات تقسیم کیے۔