مائیکل وان نے پی ایس ایل کو دنیا کا بہترین ٹورنامنٹ قرار دے دیا

لاہور: (ویب ڈیسک) سابق انگلش کپتان مائیکل وان نے پاکستان سُپر لیگ کو دنیا کا بہترین ٹورنامنٹ قرار دے دیا ہے۔
سماجی رابطے کی ویب سائٹ ٹوئٹر پر مائیکل وان نے لکھا کہ پاکستان سپر لیگ (پی ایس ایل) میں اعلیٰ معیار کے کھلاڑی ہوتے ہیں، ایونٹ کے اختتام تک شائقین کی دلچسپی برقرار رہتی ہے۔ دوسرے ٹی ٹوئنٹی ٹورنامنٹ میں ایسا نہیں ہوتا۔
اس سے قبل انگلینڈ کرکٹ ٹیم کے سابق کپتان مائیکل وان پاکستان سپر لیگ (پی ایس ایل) کی تعریف کیے بغیر نہ رہ سکے تھے۔
انہوں نے ٹوئٹر بیان میں پی ایس ایل کو دنیا کی بہترین ٹی ٹوئنٹی لیگز میں سے ایک قرار دیا تھا۔
مائیکل وان کا کہنا تھا کہ پاکستان سپر لیگ دنیا کا دوسرا بہترین ٹی ٹوئنٹی ٹورنامنٹ ہے جب کہ یہ انڈین پریمیئر لیگ سے بھی کم نہیں، پی ایس ایل میں کرکٹ کا معیار شاندار ہے۔
جنوری میں مائیکل وان نے روایتی حریف پاکستان اور بھارت کے مقابلے کو کرکٹ کی مقبول ترین ایشز سیریز سے بھی زیادہ بڑا میچ قرار دیتے ہوئے کہا تھا کہ یہ مقابلہ دنیا بھر کے کروڑوں افراد دیکھتے ہیں۔
مائیکل وان کا کہنا تھا کہ پاکستان اور بھارت کی ٹیمیں جب بھی مدمقابل ہوں تو شائقین کا جوش و خروش عروج پر ہوتا ہے اور یہ میچ صرف دو ممالک کے لوگ نہیں بلکہ دنیا بھر کے کروڑوں افراد دیکھتے ہیں۔