اسلام آباد: (ویب ڈیسک) وزیراعظم شہباز شریف نے یورپی یونین کی جانب سے 2.15 ملین یورو کی امداد دینے پر یورپی یونین کونسل کے صدر چارلس مشیل کا شکریہ ادا کیا ہے۔
وزیراعظم سے یورپین کونسل کے صدر چارلس مشیل کا ٹیلی فون پر رابطہ ہوا، صدر یورپی یونین کونسل نے پاکستان میں تباہ کن سیلاب کے نتیجے میں قیمتی جانوں کے ضیاع اور املاک کے نقصان پر افسوس کا اظہار کیا۔
شہباز شریف نے پاکستان میں سیلاب متاثرین کے لیے یورپی یونین کی جانب سے 2.15 ملین یورو کی امداد پر شکریہ اداکرتے ہوئے یورپی یونین کے صدر کو غیرمعمولی بارشوں سے پاکستان بھر میں ہونے والی وسیع پیمانے پر تباہی سے آگاہ کیا گیا۔
وزیراعظم نے یورپی یونین کے صدر کو حکومت کی سیلاب متاثرین کیلئے ریسکیو اور امدادی کاروائیوں سے بھی آگاہ کیا
اس موقع پر وزیراعظم نے کہا کہ سیلاب سے انسانی جانوں، روزگار، مویشیوں، فصلوں، نجی املاک اور انفراسٹرکچر کو بڑے پیمانے پر نقصان پہنچا، صورتحال مزید خراب ہونے کا خدشہ ہے، دو ماہ سے زائد سیلاب کی زد میں آنے والے علاقوں میں بارشوں کا سلسلہ جاری رہنے کی توقع ہے۔ سیلاب سے متاثرہ افراد میں خوراک، ادویات اور امدادی سامان کی فوری ترسیل اور تقسیم شامل ہے، حکومت نے ملک بھر کے لوگوں کے لیے ریلیف فنڈ بھی قائم کیا ہے، بیرون ملک مقیم لوگوں کے لیے سیلاب کی امدادی کوششوں میں عطیات دینے کے انتظامات کیے، امید ہے عالمی برادری اقوام متحدہ کی طرف سے اعلان شدہ فنڈنگ کو پورا کرنے میں اپنا حصہ ڈالے گی۔
دوسری طرف وزیرِ اعظم کی اپیل پر ملک بھر میں مخیر حضرات کی سیلاب زدگان کیلئے 2 کروڑ روپے کی امداد پر شہباز شریف نے کہا کہ سیلاب میں گھرے مصیبت زدہ لوگوں کی مدد کرنا عبادت سے کم نہیں، جو لوگ متاثرین کی مدد میں پیش پیش ہیں وہ انصارِ مدینہ کی سنت پر عمل کرکے اللہ تعالیٰ کی خوشنودی حاصل کر رہے ہیں، قوم سے اپیل ہے مخیر حضرات کی طرح بڑھ چڑھ کر سیلاب متاثرین کی مدد میں اپنا حصہ ملائیں، حالیہ سیلاب پاکستان کی تاریخ کا سب سے بڑا سیلاب ہے۔
انہوں نےکہا کہ ملک بھر میں لاکھوں لوگ اس وقت سیلاب سے متاثر ہوکر بے گھر ہیں، گیارہ سو سے زائد لوگ جاں بحق اور 15 سو سے زائد لوگ زخمی ہیں، حکومت ترجیحی بنیادوں پر لوگوں کو ریسکیو کر رہی ہے، حکومت نے فوری سیلاب متاثرین کو 25 ہزار روپے فلڈ ریلیف کیش فراہم کرنا شروع کیا، حکومت سیلاب متاثرین کو راشن، صاف پانی، خیمے اور مچھر دانیاں فراہم کر رہی ہے۔
یورپی یونین کی 2.15 ملین یورو کی امداد ، وزیراعظم شہباز شریف مشکور
