فٹبال کی عالمی جنگ اختتام کی جانب گامزن، کل سے سیمی فائنل کیلئے میدان لگے گا

دوحہ: (ویب ڈیسک) قطر میں فٹبال کی عالمی جنگ اختتام کی جانب گامزن ہے، فائنل میں پہنچنے کی جنگ کا کل سے آغاز ہو گا، پہلے سیمی فائنل میں ارجنٹائن اور کروشیا کے درمیان رات 12 بجے لوسیل اسٹیڈیم میں میدان لگے گا، دوسرا سیمی فائنل دفاعی چیمپئن فرانس اور مراکش کے درمیان 14 دسمبر کو شیڈول ہے۔
ارجنٹینا کا ورلڈ کپ کا سفر اپ سیٹ شکست سے شروع ہوا، میسی کی ٹیم کو سعودی عرب کے ہاتھوں 1-2 سے شکست کا سامنا کرنا پڑا تھا، تاریخی شکست کے بعد ارجنٹائن نے شاندار کم بیک کیا۔
میکسیکو اور پولینڈ کو شکست دے کر ارجنٹائن نے سپر 16 راؤنڈ تک رسائی حاصل کی، پری کوارٹر فائنل میں ارجنٹینا نے آسٹریلیا کو دو ایک سے ہرا کر سپر ایٹ مرحلے میں جگہ بنائی۔
سنسنی خیز کوارٹر فائنل میچ میں ٹیم ارجنٹائن نے نیدر لینڈز کو پنلٹی شوٹ آؤٹ پر چار تین سے شکست دی جبکہ سپراسٹار میسی کی ٹیم قطر میں عالمی کپ کے فائنل میں جگہ بنانے کے لئے پر عزم ہے۔
قطر میں جاری فٹبال کے عالمی میلے میں کروشیا کا سفر ناقابل شکست رہا ہے، گروپ راؤنڈ میں کروشیا نے کینیڈ ا کو ایک کے مقابلے میں 4 گول سے ہرایا جبکہ مراکش اور بیلجئم سے کروشین ٹیم کا مقابلہ برابر رہا۔
سپر 16 راؤنڈ میں کروشیا نے جاپان کو پنلٹی شوٹ آؤٹ پر شکست سے دوچارکیا، کوارٹر فائنل میچ میں کروشین ٹیم نے پانچ بار کی عالمی چیمپئن ٹیم برازیل کو ہرا کر ایونٹ سے باہر کر دیا۔
کروشیا نے 2018 کے بعد 2022 کے عالمی کپ میں مسلسل دوسری بار فائنل کھیلنے کی ٹھان لی ہے جبکہ دوسرا سیمی فائنل دفاعی چیمپئن فرانس اور مراکش کے درمیان 14 دسمبر کو شیڈول ہے۔