لاہور: (ویب ڈیسک) سربراہ عوامی مسلم لیگ و سابق وفاقی وزیر شیخ رشید احمد نے کہا ہے کہ سپریم کورٹ سے درخواست ہے کہ کیس معاف کرانے والوں کے نام ای سی ایل میں ڈالے جائیں۔
زمان پارک کے باہر میڈیا سے گفتگو میں شیخ رشید نے کہا کہ چور، نیب زدہ حکومت نےغیر قانونی ترامیم پاس کیں، کوئی رہ گیا ہے تو اس کے بھی کیس معاف کرا لو۔
سابق وفاقی وزیر کا کہنا تھا کہ ملک معاشی طور پر ڈوب رہا ہے، افغانستان کے ساتھ صورتحال بھی خراب ہو رہی ہے، لوگوں کی آواز کو دبانا قومی جرم ہوگا، عوام کو ووٹ کا حق دیا جائے، الیکشن میں عمران خان اکثریت حاصل کرے گا۔
شیخ رشید نے کہا کہ ان کا دو نکاتی ایجنڈا ہے کہ عمران کو نااہل اور نگران حکومت کی مدت کو لمبا کیا جائے جو عمران خان کسی صورت نہیں مانیں گے، عمران خان سےموجودہ سیاسی صورتحال پربات ہوئی، وہ 17 دسمبر کو اسمبلیاں توڑنے کا اعلان کریں گے
میڈیا سے گفتگو میں سربراہ عوامی مسلم لیگ کا کہنا تھا کہ سیاسی عدم استحکام ملک کی معاشی موت ہے، 17 دسمبر کو میں بھی لبرٹی میں عمران خان کی تقریر سنوں گا، انہوں نے کہا کہ اگر مذاکرات کامیاب ہونے ہیں تو یہی ہفتہ ہے، اگر ملک کو الیکشن کی طرف جانے کا ایجنڈا دیا جائے تو مذاکرات سے انکاری نہیں۔
شیخ رشید نے کہا کہ فوج اور عدلیہ پر کوئی بات نہیں کروں گا، عمران خان کی سیاست کو دیوار سے لگانے کی ناکام کوشش کی جا رہی ہے، انتخابات نہ کرائے گئے تو ملک میں انارکی پھیلے گی، سیاست میں مذاکرات کے دروازے بند نہیں کیے جاسکتے۔
آخر میں شیخ رشید کا کہنا تھا کہ امید ہے سپریم کورٹ ان چوروں کے کیسز کا نوٹس لے گی۔
