سنگین الزامات لگانے والے قانون کا سامنا کریں : رانا ثناءاللہ

اسلام آباد: (ویب ڈیسک) وزیرداخلہ رانا ثناءاللہ نے شیخ رشید کی گرفتاری پر ردعمل دیتے ہوئے کہا ہے کہ قتل اور ہشت گرد تنظیموں سے رابطے ہونے کے سنگین الزامات لگانے والے قانون کا سامنا کریں۔
وزیرداخلہ رانا ثناءاللہ نے سابق وزیر داخلہ شیخ رشید کی گرفتاری پر بیان دیتے ہوئے کہا کہ سیاسی مسخرہ سیاسی رنگ دینے کی کوشش کررہا ہے ، صرف قانون پر عمل ہوا ہے، پسلیاں تو نہیں تڑوائیں ؟ قانونی کارروائی ہورہی ہے ، 15 کلوہیروئن تو نہیں ڈالی، اس سے حکومت کاکوئی تعلق نہیں۔
رانا ثنا اللہ نے کہا کہ میڈیا کے سامنے پولیس والوں کو دھکے دینے والامارپیٹ کرنے کا جھوٹ بول رہا ہے ، ”قانون کے نیچے لاﺅں گا“ کے ڈائیلاگ بولنے والا قانون کے نیچے آنے سے کیوں ڈرتا ہے؟ قانون کی خلاف ورزی پر قانونی کارروائی کرنا پولیس کا قانونی فرض ہے ، طیبہ گل کی طرح اغوا کیا ہے نہ بشیر میمن کی طرح واش روم میں بند کیا ہے ، خلاف قانون کام نہیں کیا تو عدالت کو بتادیں قانون کے سامنے سب برابر ہیں، قانون توڑنے پر جواب تو دینا پڑے گا ۔
وزیر داخلہ نے کہا کہ عمران نیازی نے سیاسی مخالفین، سچ بولنے والے صحافیوں کو جیلوں میں ڈالا ، جھوٹے مقدمے بنوائے، گزشتہ چار سال کے سیاہ دور میں صحافیوں کو گولیاں ماری گئیں ، پسلیاں توڑی گئیں۔
ان کا کہنا تھا کہ باس اور چپڑاسی دونوں کی قانون کا سامنا کرنے سے ہوا نکلی ہوئی ہے، یہ ہر اُس ادارے کو گالیاں دیتے ہیں جو اِن سے جواب مانگے۔