عمران نے جو معاہدے کیے انکی پاسداری نہ کریں تو پاکستان ڈیفالٹ کرسکتا ہے : مریم نواز

بہاولپور : (ویب ڈیسک) چیف آرگنائزر ، سینئر نائب صدر مسلم لیگ ن مریم نواز کا کہنا ہے کہ عمران خان نے جو معاہدے کیے اس کی پاسداری نہ کریں تو پاکستان ڈیفالٹ کرسکتا ہے۔
بہاولپور میں چیف آرگنائزر مسلم لیگ ن مریم نواز نے میڈیا سے گفتگو کرتے ہوئے کہا ہے کہ عوام نے بہت عزت سے نوازا، شکر گزار ہوں، عوامی رابطہ مہم مسلم لیگ ن کی قوت میں اضافہ کرے گی۔
انہوں نے کہا کہ ہمارا کسی سے کوئی ذاتی جھگڑا نہیں، ہمارا بیانیہ حقائق پر مبنی ہے، آج کل بڑا انتقام کا شور مچا رہے ہیں، میں اور حکومت انتقام پر یقین نہیں رکھتے، نوازشریف بہت جلد آنے والے ہفتوں میں پاکستان آئیں گے۔
مریم نوازنے سابق حکومت پر تنقید کرتے ہوئے کہا کہ خیبرپختونخوا میں اس گھڑی چور کی حکومت 10سال رہی، آپ نے دہشتگردوں کے لئے دروازے کھولے، خیبرپختونخوا میں پولیس نہتی ہے، کمزوری کو ماننا پڑے گا ۔
مریم نواز نے ملکی معیشت پر بات کرتے ہوئے کہا کہ معیشت پر حملہ اس فتنہ خان نے کیا ہے ، آئی ایم ایف معاہدے نے ہمارے ہاتھ باندھے ہوئے ہیں، ہم اگر ریلیف دینا چاہیں بھی تو نہیں دے پارہے ہیں ۔
مسلم لیگ ن کے رہنما شاہد خاقان عباسی کے استعفی پر سوال کا جواب دیتے ہوئے مریم نواز نے کہا کہ وہ ہمارے فیملی ممبر ہیں اور نوازشریف کے دیرینہ ساتھی اور ن لیگ کا حصہ ہیں ۔