لاہور اور راولپنڈی سمیت پنجاب کے مختلف شہروں میں شادی ایکٹ ون ڈش کی خلاف ورزی کرنے پر دو درجن افراد گرفتار جب کہ 25 لاکھ روپے سے زائد جرمانے بھی عائد کردیے گئے ہیں۔
نگراں وزیر اعلی پنجاب محسن نقوی کی جانب سے پنجاب میں شادی ایکٹ کے تحت ٓتقریبات میں ون ڈش کی پابندی یقینی بنانے کے لیے سخت عملی اقدامات شروع کر دیے گئے ہیں۔
کمشنرز، ڈپٹی کمشنرز اور اسسٹنٹ کمشنرز نے شادی ہالوں پر چھاپے مار دو درجن سے زائد افراد کو گرفتار کر لیا جب کہ 5 شادی ہالز سیل کردیے اور متعدد کو وارننگز بھی جاری کی گئی۔
محسن نقوی نے انتظامیہ کو سختی سے ہدایت کی کہ ون ڈش کی خلاف ورزی کرنے والوں کے ساتھ کوئی رعایت نہ برتی جائے اور ان کے خلاف سخت ترین قانونی کارروائی عمل میں لائی جائے۔
