متحدہ عرب امارات کے نائب صدر اور وزیراعظم شیخ محمد بن راشد المکتوم کی صاحبزادی شیخہ مہرہ المکتوم نے ‘طلاق’ کے نام سے اپنا پرفیوم لانچ کردیا۔
دبئی کی شہزادی شیخہ مہرہ محمد راشد المکتوم حال ہی میں چرچوں میں آئی تھیں جب انہوں نے جولائی میں انسٹاگرام پوسٹ میں اپنے شوہر کو سرِ عام طلاق دے دی تھی۔
شہزادی نے 2 روز قبل اپنے انسٹاگرام اکاؤنٹ پر ایک پوسٹ میں اپنے برانڈ، مہرہ ایم 1 کی خوشبو کا ایک ٹیزر بھی شیئر کیا تھا، جس نے سوشل میڈیا پر تہلکہ مچا دیا۔
مذکورہ ویڈیو میں ٹوٹے ہوئے شیشے، سیاہ گلاب، سیاہ پنکھڑیاں اور ایک بلیک پینتھر کا ایک مونٹیج دکھایا گیا تھا۔
اب حالیہ ایک پوسٹ میں 30 سالہ شہزادی نے ایک چکنی سیاہ بوتل پیش کی جس پر انگریزی میں لفظ طلاق تحریر تھا۔
یاد رہے کہ رواں برس جولائی میں انسٹاگرام پر ایک پوسٹ کرتے ہوئے شیخہ مہرہ نے خود کو سابقہ اہلیہ قرار دیتے ہوئے اپنے شوہر سے طلاق کا سرعام اعلان کیا تھا۔
مذکورہ پوسٹ میں شہزادی نے اپنے شوہر کو مخاطب کرتے ہوئے تین بار طلاق کے الفاظ کہے اور لکھاکہ،’ پیارے شوہر، جیسا کہ آپ دوسرے ساتھیوں کے ساتھ مشغول ہیں، میں یہاں طلاق کا اعلان کرتی ہوں، میں آپ کو طلاق دیتی ہوں، طلاق دیتی ہوں، طلاق دیتی ہوں، اپنا خیال رکھنا۔’
یاد رہے کہ اماراتی شہزادی شیخہ مہرہ 5 اپریل 2023 کو شیخ مَانع المکتوم کے ساتھ رشتہ ازدواج میں منسلک ہوئی تھیں۔بعدازاں انہوں نے رواں سال مئی میں اپنی پہلی بیٹی کا استقبال کیا۔
رپورٹس کے مطابق شیخہ مہرہ 1994ء میں پیدا ہوئیں اور انہوں نے برطانیہ کی یونیورسٹی سے بین الاقوامی تعلقات میں گریجویشن مکمل کی ہے۔
