وزیراعظم شہباز شریف نے کہا ہے کہ فتنۃ الہندوستان جیسے گروہوں کو مقامی حمایت دینا ملک دشمنی ہے اور بلوچستان میں امن و ترقی کی راہ میں رکاوٹیں ڈالنے والے دہشتگردوں کو کچل دیا جائے گا۔
کوئٹہ میں گزشتہ روز بلوچستان کے عمائدین کے جرگے سے خطاب میں وزیراعظم شہباز شریف کا کہنا تھاکہ بھارت کی سرپرستی میں بلوچستان میں پراکسی وار شدت اختیار کر چکی ہے۔ انہوں نے اعلان کیا کہ بلوچستان میں امن و ترقی کی راہ میں رکاوٹیں ڈالنے والے دہشتگردوں کو کچل دیا جائے گا، فتنۃ الہندوستان جیسےگروہوں کو مقامی حمایت دینا ملک دشمنی ہے۔
ان کا کہنا تھاکہ حکومت، فوج، ادارے اور عوام مل کر دہشتگردی کو انجام تک پہنچائیں گے، دہشتگردوں کے سہولت کار اور مددگار بھی قانون کی گرفت سے نہیں بچ سکیں گے۔ وزیراعظم کا کہنا تھاکہ بلوچستان کی ترقی کیلئے اربوں روپے کے منصوبے جاری ہیں،ثمرات عوام تک پہنچیں گے، قوم، حکومت اور سکیورٹی ادارے شہدا کے خاندانوں کے ساتھ کھڑے ہیں۔
دوسری جانب جرگے سے خطاب میں آرمی چیف و فیلڈ مارشل عاصم منیر کا کہنا تھاکہ بھارتی مداخلت اب چھپی نہیں، بلوچستان میں دہشتگرد نیٹ ورکس کے شواہد موجود ہیں۔ انہوں نے کہا کہ پاکستان آرمی ملکی خودمختاری پر کوئی سمجھوتہ نہیں کرے گی، بلوچستان کا امن پاکستان کے مستقبل کے ساتھ جڑا ہوا ہے اورپاکستانی فوج اور عوام ہر دشمن کے ناپاک عزائم کو خاک میں ملا دیں گے۔
بلوچ قبائلی عمائدین نے حکومت اور پاک فوج کے ساتھ مکمل یکجہتی کا اظہار کیا۔ اس کے علاوہ وزیراعظم شہبازشریف نے کمانڈ اینڈ اسٹاف کالج کوئٹہ میں افسران سے بھی خطاب کیا جس میں انہوں نے پیشہ ورانہ مہارت، اسٹریٹجک تیاری اور قومی سلامتی پر زور دیا گیا۔
شہباز شریف کا کہنا تھاکہ بھارتی اسپانسرڈ پراکسیز بلوچستان میں ترقی کے دشمن ہیں۔
