مکہ معاہدہے کے حامی خطے کے ممالک کا اپنی سلامتی کی ذمہ داری خود سنبھالنا خوش آئیند روسی سفیر

اسلام آباد (ملک منظور احمد) پاکستان میں روس کے سفیر البرٹ پی خوریف نے پاکستان، سعودی عرب اور ترکیہ کے درمیان مکہ مشترکہ دفاعی معاہدے کی حمایت کرتے ہوئے اسے مثبت قدم قرار دے دیا۔ روسی سفیر کا کہنا ہے کہ خطے کے  ممالک کی جانب سے اپنی سلامتی کی ذمہ داری خود سنبھالنے اور باہمی تعاون کے ذریعے علاقائی استحکام یقینی بنانے کی کوشش مثبت پیش رفت ہے۔ انہوں نے یہ بات اسلام آباد میں روسی سفارتخانے میں یوکرین کی صورت حال سے متعلق بریفنگ کے بعد گفتگو کرتے ہوئے کہی۔ البرٹ پی خوریف نے کہا کہ روس مکہ مشترکہ دفاعی معاہدے کو ایک مثبت پیش رفت کے طور پر دیکھتا ہے۔ ان کے مطابق اس معاہدے کی اہمیت اس حوالے سے بھی ہے کہ خطے کے ممالک اپنی سلامتی کے معاملات میں خود زیادہ فعال کردار ادا کرنے کی کوشش کر رہے ہیں۔ روسی سفیر نے کہا کہ علاقائی ممالک کا اپنی سلامتی اور دفاع کے حوالے سے ذمہ داری لینا خطے میں تعاون کے نئے امکانات پیدا کر سکتا ہے۔ روسی سفیر کے مطابق مکہ مشترکہ دفاعی معاہدہ مشرق وسطیٰ میں پیدا ہونے والی براہ راست کشیدگی کے پس منظر میں سامنے آیا۔ انہوں نے کہا کہ اس معاہدے کو وقت کے ساتھ خود کو مضبوط اور مؤثر ثابت کرنا ہوگا۔ ان کے بیان کے مطابق روس علاقائی ممالک کے درمیان سلامتی کے شعبے میں تعاون کو اہم سمجھتا ہے۔ پاکستان، سعودی عرب اور ترکیہ نے 7 اگست 2026 کو مکہ مکرمہ میں مکہ مشترکہ دفاعی معاہدے پر دستخط کیے تھے۔ معاہدے کے تحت تینوں ممالک نے باہمی دفاعی تعاون اور علاقائی سلامتی کو مضبوط بنانے کا عزم کیا ہے۔ پاکستان کی وزارت خارجہ کے مطابق کسی ایک ملک پر مسلح حملے کو تینوں ممالک پر حملہ تصور کیا جائے گا، جبکہ معاہدہ دفاعی نوعیت کا ہے اور کسی ملک کے خلاف نہیں ہے۔ معاہدے کے تحت تینوں ممالک نے علاقائی امن، استحکام اور کشیدگی میں کمی کے لیے مشترکہ کوششیں جاری رکھنے پر بھی اتفاق کیا ہے۔ 31 اگست کو استنبول میں مکہ معاہدے کے تحت قائم اسٹریٹجک سیاسی و دفاعی کمیٹی کے پہلے اجلاس میں تینوں ممالک نے تعاون کو مزید ادارہ جاتی شکل دینے، مشترکہ دفاعی صلاحیتوں کو مضبوط بنانے اور دفاعی صنعت کے شعبے میں تعاون بڑھانے پر اتفاق کیا تھا۔ روسی سفیر کی جانب سے مکہ معاہدے کی حمایت ایسے وقت میں سامنے آئی ہے جب خطے میں سلامتی اور دفاعی تعاون کے حوالے سے اہم پیش رفت جاری ہے۔ مکہ معاہدے کے تحت پاکستان، سعودی عرب اور ترکیہ نے مشترکہ دفاعی تعاون کو مزید منظم کرنے کے لیے مستقل رابطہ اور مشاورت کا سلسلہ شروع کر رکھا ہے۔ ادھر یکم اکتوبر کو ڈی جی آئی ایس پی آر لیفٹیننٹ جنرل احمد شریف چوہدری نے بھی مکہ مشترکہ دفاعی معاہدے کے حوالے سے کہا کہ پاکستان اس معاہدے پر عملدرآمد کے لیے مکمل طور پر پرعزم ہے اور حرمین شریفین اور سعودی عرب کی سلامتی کے لیے پاکستان کا عزم واضح ہے روسی سفیر نے اسی بریفنگ کے دوران یوکرین تنازع، مغربی پابندیوں، عالمی سلامتی اور بین الاقوامی بحری قانون سمیت مختلف امور پر روس کا مؤقف بھی پیش کیا۔ انہوں نے کہا کہ روس یوکرین بحران کے سیاسی اور سفارتی حل کے لیے مذاکراتی عمل جاری رکھنے کے لیے تیار ہے اور روس کے مطابق تنازع کا حل سفارتی ذرائع سے تلاش کیا جانا چاہیے۔ مکہ مشترکہ دفاعی معاہدے کے حوالے سے روسی سفیر کے بیان کو خطے میں ابھرتے ہوئے علاقائی سلامتی کے تعاون کے تناظر میں اہم قرار دیا جا رہا ہے، کیونکہ روس نے اس معاہدے کو مثبت قدم قرار دیتے ہوئے علاقائی ممالک کی جانب سے اپنی سلامتی کی ذمہ داری خود سنبھالنے کی کوشش کو سراہا ہے۔
روسی سفیر