ہانگ کانگ اور جنوبی چین کو گزشتہ دنوں رواں سال کے طاقتور ترین سمندری طوفان راگاسا کا سامنا ہوا۔
اس سپر طوفان راگاسا کے دوران ہانگ کانگ اور جنوبی چین کے رہائشیوں نے اپنے تحفظ کا ایک نیا ذریعہ تلاش کیا اور وہ تھا ہانگ کانگ کے معروف اداکار و گلوکار نکولس سی ٹنگ فنگ کی تصاویر کا استعمال۔
جی ہاں واقعی نکولس سی ٹنگ فنگ کو خراب موسم میں خوش قسمت چہرے کے طور پر نئی شہرت حاصل ہوئی۔
ہانگ کانگ اور جنوبی چین میں لوگوں کی جانب سے اپنے تحفظ کے لیے نکولس سی ٹنگ فنگ کی تصاویر کھڑکیوں میں لگائی گئیں۔
تو اس کی وجہ کیا تھی؟ تصاویر کے ساتھ چینی اور کینٹنی زبان میں اداکار کا نام ایک جملے جیسا محسوس ہوتا ہے جس کا مطلب ہے کہ ہوا کو روکنے پر شکریہ۔
اسی وجہ سے لوگوں کی جانب سے اپنے تحفظ کے لیے کھڑکیوں پر ٹیپ کے ذریعے تصاویر کو چپکایا گیا۔
آسان الفاظ سے بیشتر افراد اداکار کی تصویر کو شدید موسم کے خطرات سے تحفظ کے لیے استعمال کر رہے تھے۔
45 سالہ نکولس سی ٹنگ فنگ خود بھی اس وائرل شہرت پر حیران ہوئے۔
21 ستمبر کو سمندری طوفان کی آمد سے قبل وہ گوانگزو میں ایک ایونٹ میں گانا گا رہے تھے۔
اس موقع پر تیز بارش ہوئی تو انہوں نے چھتری یا رین کوٹ کا استعمال نہیں کیا اور وہاں موجود افراد سے کہا کہ ‘میرا نام سائی ٹنگ فنگ ہے، شائی ٹنگ یو نہیں (اس کا مطلب بارش کو روکنے پر شکریہ ہے)’۔
انہوں نے کہا کہ ‘ایسی تیز ہوا بڑا مسئلہ نہیں، مگر میں بارش کو کنٹرول کرنے کے قابل نہیں’۔
اداکار کے نام کو اس طرح سب سے پہلے اپریل میں مشرقی چین کے صوبے Anhui میں استعمال کیا گیا تھا۔
