انزائٹی ایک ایسا عارضہ ہے جو موجودہ عہد میں بہت زیادہ عام ہوتا جا رہا ہے اور اس کا علاج عموماً سائیکو تھراپی یا ادویات سے کیا جاتا ہے۔
انزائٹی کے شکار افراد کو دماغی اور جسمانی دونوں طرح کے مسائل کا سامنا ہوتا ہے۔
مگر اچھی بات یہ ہے کہ اس سے سے بچنا بہت آسان ہے بس اپنی نیند کو بہتر بنالیں۔
یہ بات امریکا میں ہونے والی ایک طبی تحقیق میں سامنے آئی۔
کیلیفورنیا یونیورسٹی کی تحقیق میں بتایا گیا کہ عمر میں اضافے کے ساتھ جذباتی استحکام اور نیند کے انداز میں نمایاں تبدیلیاں آتی ہیں۔
اس تحقیق میں نیند، عمر میں اضافے کے ساتھ دماغی حجم میں آنے والی کمی اور انزائٹی کے درمیان تعلق کا جائزہ لیا گیا۔
اس تحقیق میں 61 صحت مند افراد کو شامل کیا گیا جن کی عمر 65 سال سے زائد تھی۔
ان تمام افراد کو روزمرہ کی بنیاد پر کسی حد تک انزائٹی کا سامنا ہوتا تھا۔
محققین نے نیند کے دوران دماغی سرگرمیوں کا ڈیٹا اسکینز کے ذریعے حاصل کیا گیا۔
اس ڈیٹا کا تجزیہ کرنے کے بعد دیکھا گیا کہ نیند کے معیار سے انزائٹی کی سطح پر کیا اثرات مرتب ہوتے ہیں۔
نتائج سے معلوم ہوا کہ اچھی اور معیاری نیند انزائٹی سے تحفظ فراہم کرنے میں مدد فراہم کرتی ہے۔
درحقیقت ہر عمر میں اچھی نیند سے انزائٹی سے بچنا آسان ہو جاتا ہے۔
محققین کے مطابق نتائج سے عندیہ ملتا ہے کہ ہر عمر میں اچھی نیند دماغی صحت کے لیے ضروری ہوتی ہے،۔
اس تحقیق کے نتائج جرنل کمیونیکیشنز سائیکولوجی میں شائع ہوئے۔
انزائٹی کیا ہے؟
انزائٹی جسم کا تناؤ کے لیے قدرتی ردعمل ہے، یہ خوف یا فکر کی ایسی کیفیت ہوتی ہے جو مختلف عناصر کا مجموعہ ہوتی ہے۔
دل کی دھڑکن کی رفتار بڑھ جانا، سانس چڑھنا، تھکاوٹ اور توجہ مرکوز کرنے میں مشکلات اس کی کچھ عام علامات ہیں۔
ویسے ہر فرد میں اس کا اظہاریا علامات مختلف ہوسکتی ہیں، جیسے ایک فرد کو شدید گھبراہٹ کا سامنا ہوسکتا ہے تو دوسرے کو تکلیف دہ خیالات یا ڈر کے دورے پڑسکتے ہیں۔
